قانات يسلام قارسىلاسىن العاشقى راۋندتا-اق نوكاۋتقا ءتۇسىردى

اقش-تىڭ دەلاۆەر شتاتىنداعى ۋيلمينگتون قالاسىندا WBO Intercontinental جانە WBA Fedelatin تۇجىرىمدارى بويىنشا ءبىرىنشى ورتا سالماقتا الەم چەمپيونى قانات يسلام (22-0-0, 18 كو) مەن برازيليالىق روبسون اسسيس (16-3-0, 9 كو) اراسىنداعى ايقاس ءوتتى. جەكپە-جەك باستالا سالا العا ۇمتىلعان قانات يسلام قارسىلاسىن بىردەن جويقىن سوققىلارىنىڭ استىنا الدى. الايدا, شىعا سالىپ, ابايسىز قاباعىن جارىپ العانى جانكۇيەردىڭ جۇرەگىن زىرق ەتكىزگەن. اققان قان ءبىر جاق بەتىن جاۋىپ كەتكەندە, كوزىن اشا الماي قالار ما ەكەن دەگەن كۇدىك بولعانى دا بەلگىلى. بىراق وسى ابايسىز كەتكەن سوققى جەڭىستى جىلدامداتىپ جىبەرگەندەي. ءۇستى-ۇستىنە جاۋعان جۇدىرىق, قارسىلاسىن ەس تاپتىرماي, اقىرى ءبىرىنشى راۋندتا-اق سۇلاتىپ ءتۇسىردى. قانات يسلام شارشى الاڭداعى 23-كەزدەسۋىندە جەڭىسكە جەتسە, روبسون اسسيس وسىمەن ءتورتىنشى ۇرىسىندا نوكاۋتپەن جەڭىلىپ وتىر. ايتا كەتەيىك, اقش-تا ءوتىپ جاتقان بوكس كەشىندە باستى ايقاس ءتورت سالماق دارەجەسىندە الەمنىڭ بۇرىنعى چەمپيونى 48 جاستاعى روي دجونس پەن 46 جاستاعى بوببي گان اراسىندا وتەدى. ولار ءبىرىنشى اۋىر سالماقتاعى WBF (World Boxing Foundation) بەلبەۋىن ساراپقا سالادى.