ۋنيۆەرسيادا-2017. حوككەيدەن جەرلەستەرىمىز شۆەتسيانى ۇتتى

الماتىدا ءوتىپ جاتقان قىسقى ۋنيۆەرسيادا ويىندارىندا ەرلەر اراسىندا قازاقستان قۇراماسى شۆەتسيامەن كەزدەسىپ, 5:0 ەسەبىمەن اياقتالدى. «حالىق ارەنادا» وتكەن ويىندا قازاقستان قۇراماسى ايقىن باسىمدىققا يە بولدى. ءا, دەگەننەن العا ۇمتىلعان وتانداستارىمىز 2-مينۋتتا ەسەپ اشىپ ۇلگەردى. كيريلل ساۆيتسكي باعىتتاعان سوققى كوزدەگەن جەرىنەن ءدال تابىلدى. وسىدان كەيىن قوس كوماندا ءبىرىن-ءبىرى اڭدىسىپ, وسال جەرلەرىن تابۋعا تىرىسىپ باقتى. كەزدەسۋدىڭ 18-مينۋتىندا ويىنشى باسىمدىعىن جۇزەگە اسىرعان قازاقستاندىقتار ياروسلاۆ ەۆدوكيموۆتىڭ كومەگىمەن ەكىنشى شايبانى سوقتى. ماتچتىڭ كەلەسى كەزەڭىندە جانكۇيەرلەر ءبىر عانا گولدىڭ كۋاسى بولدى. ۇرىمتال تۇستى ۇتىمدى پايدالانعان كونستانتين ساۆەنكوۆ ەسەپتەگى باسىمدىقتى ارتتىرا ءتۇستى. سونىمەن قاتار, سوڭعى 20 مينۋت تا جوسپار بويىنشا ءوربىدى. الدىمەن, 50-مينۋتتا انتون ساگادەەۆ مۇمكىندىگىن ءمۇلت جىبەرمەسە, كەزدەسۋدىڭ اياقتالۋىنا ءۇش مينۋت قالعاندا دميتري گرەنتس سوڭعى نۇكتەنى قويدى. بۇل جەردە شۆەتسيانىڭ ءبىر ويىنشىسى كەم بولعانىن ايتا كەتكەن ءجون. ۋنيۆەرسيادا ويىندارىندا قازاقستان قۇراماسى وسىعان دەيىن قىتاي كومانداسىن 22:0 ەسەبىمەن ويسىراتا ۇتقان بولاتىن, ال شۆەتسيا چەحيادان 0:5 ەسەبىمەن جەڭىلگەن. شەشۋشى كەزەڭدە قازاقستان مەن چەحيا, شۆەتسيا مەن قىتاي سىنعا تۇسەدى.