اياۋلىمنىڭ العاشقى اسۋى

فرانتسيانىڭ كۋرورتتى شاھارى البيەزدەن التايعا جاعىمدى جاڭالىق جەتتى. ون بەس جاستاعى وسكەمەندىك بويجەتكەن اياۋلىم امىرەنوۆا فريستايلدىڭ موگۋل تۇرىنەن وتكەن ەۋروپا كۋبوگىنىڭ ءبىرىنشى كەزەڭىندە 3-ءشى, جۇپتاسىپ ونەر كورسەتۋدەن سايىسقا تۇسكەن ەكىنشى كەزەڭدە 2-ورىندى يەلەندى. قازىر ەكى كەزەڭ بويىنشا ءساتتى سىرعاناعان قازاق قىزى رەيتينگتە كوش باستاپ, ۇزدىكتەرگە بەرىلەتىن سارى جەيدەنى كيىپتى. شاڭعى جاستانىپ, كونكي توسەنىپ وسكەن ەۋروپانىڭ ازۋلى سپورتشىلارىنىڭ اراسىنان سۋىرىلىپ شىعىپ, ۇزدىك ۇشتىككە ءىلىنۋ ۇلكەن جەتىستىك, ارينە. شەت ەلدە جۇرگەن اياۋلىمنىڭ وزىمەن تىلدەسۋگە مۇمكىندىك بولماعاننان كەيىن وسكەمەندە تۇراتىن اتا-اناسىنىڭ ۇيىنە ارنايى بارىپ, قۇتتىقتاپ, سۇحباتتاسىپ قايتتىق. – بۇل – اياۋلىمنىڭ سپورتتاعى العاشقى ۇلكەن جەتىستىگى. قۋانىش­تان جۇرەگىمىز جارىلارداي بولىپ تۇر. ارينە, ەل ىشىندەگى جارىستاردا توپ جارىپ جۇرگەنىمەن, شەتەلدە وتەتىن ۇلكەن ءدۇبىرلى دودالاردا جۇلدەگە ءىلىنۋ وڭاي شارۋا ەمەس. بۇعان دەيىن قىزىمىز ەكى-ءۇش مارتە ەۋروپا كۋبوگىنا قاتى­سىپ, بىردە 10, بىردە 8-ورىنداردى يەلەنىپ ءجۇردى. ەڭ جوعارعى جەتىستىگى – 6-ورىن. بۇل جولعى جارىستىڭ ءبىرىنشى كەزەڭىندە 1-ورىندى نورۆەگيا, 2-ورىندى بريتانيا سپورتشىلارى العان ەكەن. ون التى مەملەكەتتەن قاتىسقان جيىرما ءتورت قىزدىڭ ىشىنەن 3-ورىننان كورىنۋ ۇلكەن جەتىستىك دەپ ويلايمىن. بولاشاعى ءالى الدا عوي, – دەيدى اناسى گاۋحاريا سابيلدينا. كارى قۇرلىقتا وتكەن بۇل ءدۇبىرلى دوداعا وسكەمەننەن اياۋلىممەن بىرگە ەكى سپورتشى قاتىسقان كورىنەدى. 18 جاستاعى ولەگ تسينن ءبىرىنشى كەزەڭدە 6-ورىنعا تابان تىرەپتى. گاۋحاريا سابيلدينانىڭ ايتۋىنشا, ەۋروپا كۋبوگىنا قا­تىس­قان سپورتشىلاردىڭ ىشىندەگى ەڭ جاسى كىشىسى اياۋلىم ەكەن. قازاق بالاسىنا جالىنان سيپاتپاي جۇرگەن قىسقى سپورت تۇرلەرىندە سوڭعى كەزدەرى قانداستارىمىزدىڭ قاتارى كوبەيىپ كەلە جاتقانى قۋانتادى. اياۋلىمنىڭ اكەسى سەرىك امىرەنوۆ قىزىن العاش وسى سپورت تۇرىنە جەتەلەپ اپارعاندا 80 بالانىڭ تورتەۋى عانا قاراكوزدەرىمىز بولعان ەكەن. وسكەمەندە قازاق قىزدارى اراسىنان فريستايلدىڭ موگۋل تۇرىمەن العاش بولىپ شۇعىلدانىپ جۇرگەن اياۋلىم امىرەنوۆا قازىر قالاداعى دارىندى بالالارعا ارنالعان سپورت مەكتەبىندە 10-سىنىپتا وقيدى. باپكەرى – ەسىمى ەلىمىزگە كەڭىنەن تانىمال, تالاي ساڭلاقتاردى تۇلەتكەن ۆيكتور رەيحارد. – قىزىمىزدى وسى سپورت تۇرىنە جىبەرگەنىمىزگە ەش وكىنبەيمىز. اياۋلىمنىڭ دا ەڭ ۇلكەن ارمانى – اق وليمپيا­داعا قاتىسۋ. باپكەرلەرى بۇعان دەيىن: «اياۋلىم ءالى جاس قوي. اسىقتىرمايمىز», دەپ جۇرەتىن. وسى جولى شەت ەلگە جۇرەر الدىندا:«قايتسەك تە ەۋروپادا بەستىككە ءىلىنۋىمىز كەرەك. ال ازيادادا مىندەتتى تۇردە ورىن الۋىڭ قاجەت», دەپ جاتتى باپكەرلەرى, – دەيدى اناسى. شاڭعىنى ۇرشىقشا ءيىرىپ جۇرگەن قازاقتىڭ قايسار قىزىنىڭ اكەسى سەرىك امىرەنوۆ اياۋلىمدى بۇل سپورت تۇرىنە ءتورت جاسىندا بەرگەنىن ايتادى. ەلىمىزدىڭ بىرنەشە دۇركىن چەمپيونى, جاستار اراسىنداعى سپارتاكيادانىڭ جەڭىم­پازى اتانعان وسكەمەندىك بويجەتكەن قازىر اقپان ايىندا جاپونيانىڭ ساپپورو قالاسىندا وتەتىن ازيادا ويىندارىنا قاتىسۋعا ازىرلەنىپ جاتقان كورىنەدى. ءبىر ايتا كەتەرلىگى, بۇل سايىستا فريستايلدىڭ موگۋل تۇرىنەن قازاق قىزدارى اراسىنان جالعىز اياۋلىم عانا ەل نامىسىن قورعايتىن بولادى. ازامات قاسىم, «ەگەمەن قازاقستان» وسكەمەن