بۇل اتاقتى قاز داۋىستى قازىبەك ءبيدىڭ شاپانى. شاپان پارشا, ماقتا-ماتادان تىگىلگەن. ءون بويى قۇس قاناتى, قۇمىرا, وسىمدىك تەكتەس ورنەكتەرمەن, التىن, كۇمىس جالاتىلعان مىس جىپتەرمەن كومكەرىلگەن. اتادان قالعان اسىل مۇرا, زەرلى شاپاندى قازىبەك ءبيدىڭ جەتىنشى ۇرپاعى قارقارالى اۋدانىنىڭ ەدىرەي اۋىلىندا تۇراتىن التىن قوجاحمەتوۆ اقساقال ساقتاپ كەلىپتى. وسى كىسى 2008 جىلى سول كەزدەگى پرەزيدەنتتىك مادەنيەت ورتالىعىنىڭ باسشىسى, كورنەكتى مەملەكەت جانە قوعام قايراتكەرى مىرزاتاي جولداسبەكوۆتىڭ اتتاي قالاۋىمەن اتالعان ورتالىققا وتكىزگەن.
«قازىبەك ءبيدىڭ ۇرپاقتارى اتادان بالاعا ميراس بولعان قۇندى جادىگەردى ءۇش عاسىر بويى كوزدىڭ قاراشىعىنداي قاستەرلەپ ساقتاعان. ايتسە دە ءار جىلدارى ادامدار قازاقى جولمەن ىرىمداپ, شاپاننىڭ ءار جەر-ءار جەرىنەن كەسىپ, قيىپ الىپ وتىرعان. قۇندى ءجادىگەر باستاپقى قالپىندا ساقتالماعاندىقتان, رەستاۆراتسيا جۇمىستارىن جاساۋدى قاجەت ەتتى. ءبيدىڭ شاپانىنا كوپ كەشىكپەي جاڭارتۋ, قايتا قالپىنا كەلتىرۋ جۇمىستارى جۇرگىزىلدى. شاپاندى شەبەر تۇرسىنكۇل جايلاۋباەۆا 2008-2010 جىلدار ارالىعىندا قايتا جاڭعىرتۋدان وتكىزدى», – دەيدى ۇلتتىق مۋزەيدەگى قازاقستان تاريحى ءبولىمىنىڭ عىلىمي قىزمەتكەرى روزا كەنجەبەكوۆا.
بۇل شاپاننىڭ ۇلتتىق مۋزەيدەگى ورنى – قازاقستان تاريحى زالى. «قازاق قوعامىنداعى قۇقىقتىق قاتىناستار» دەگەن تاقىرىپتاعى زاتتاردىڭ قاتارىندا تۇر.
ايگۇل سەيىلوۆا,
«ەگەمەن قازاقستان»
سۋرەتتەردى تۇسىرگەن
ورىنباي بالمۇرات,
«ەگەمەن قازاقستان»
