جوعارى ءبىلىم بەرۋ جۇيەسى ساپاسىنا ەرەكشە نازار اۋدارىلادى - ەلباسى

پرەزيدەنت نۇرسۇلتان نازارباەۆ حالىققا ارناعان بيىلعى جولداۋىندا ەڭ الدىمەن ءبىلىم بەرۋ جۇيەسىنىڭ ءرولى وزگەرۋگە ءتيىس ەكەنىن ايتتى. سونىمەن قاتار وقىتۋ باعدارلامالارىن سىني ويلاۋ قابىلەتىن جانە ءوز بەتىمەن ىزدەنۋ داعدىلارىن دامىتۋعا باعىتتاۋ قاجەت. سونىمەن بىرگە, IT-ءبىلىمدى, قارجىلىق ساۋاتتىلىقتى قالىپتاستىرۋعا,  ۇلتجاندىلىقتى دامىتۋعا باسا كوڭىل ءبولۋ كەرەك. قالا مەن اۋىل مەكتەپتەرى اراسىنداعى ءبىلىم بەرۋ ساپاسىنىڭ الشاقتىعىن ازايتۋ قاجەت. «ۇكىمەتكە ءتيىستى ۇسىنىستار بەرۋدى تاپسىرامىن. اتاپ ايتقاندا, ءۇش ءتىلدى وقۋعا كەزەڭ-كەزەڭمەن كوشۋ ماسەلەسى بويىنشا ۇسىنىستار ازىرلەنسىن. قازاق ءتىلىنىڭ باسىمدىعى ساقتالادى. ونىڭ ءارى قاراي دامۋىنا زور كوڭىل بولىنەدى. سونىمەن قاتار, بۇگىندە اعىلشىن ءتىلى - جاڭا تەحنولوگيا, جاڭا يندۋستريا, جاڭا ەكونوميكا ءتىلى. قازىرگى كەزدە 90% اقپارات اعىلشىن تىلىندە جاريالانادى. ءاربىر ەكى جىل سايىن ولاردىڭ كولەمى 2 ەسە ۇلعايىپ وتىرادى. اعىلشىن ءتىلىن مەڭگەرمەي, قازاقستان جالپى ۇلتتىق پروگرەسكە جەتە المايدى. 2019 جىلدان باستاپ 10-11 سىنىپتاردا كەيبىر پاندەردى اعىلشىن تىلىندە وقىتاتىن بولامىز. بۇل ماسەلەنى تياناقتى ويلانىپ, اقىلمەن شەشۋ قاجەت», - دەدى پرەزيدەنت. پرەزيدەنتتىڭ ايتۋىنشا, قازىر مەكتەپتەردىڭ جانە مۇعالىمدەردىڭ دەڭگەيى, اسىرەسە اۋىل مەن قالادا ءارتۇرلى. بىلىكتى پەداگوگتاردىڭ جەتىسپەۋ پروبلەماسى دا بار. وسىنى ەسكەرىپ, اعىلشىن ءتىلىن كەزەڭ-كەزەڭىمەن ەنگىزۋ كەرەك. بيىل ەلباسىنىڭ باستاماسى بويىنشا «بارشاعا ارنالعان تەگىن كاسىپتىك-تەحنيكالىق ءبىلىم بەرۋ» جوباسى ىسكە اسىرىلا باستادى. "تەگىن وقىتۋمەن ەڭ اۋەلى جۇمىسسىز جانە ءوزىن ءوزى ءتيىمسىز جۇمىسپەن قامتىعان جاستار, سونداي-اق كاسىپتىك ءبىلىمى جوق ەرەسەك ادامدار قامتىلۋى ءتيىس. كاسىپتىك ءبىلىم بەرۋ جۇيەسىندە, مەن ايتقانداي, ەكونوميكاداعى جاڭا وندىرىستەر ءۇشىن ماماندار دايىنداۋعا دەن قويۋ كەرەك. «ول ءۇشىن كاسىپتىك ستاندارتتار ەڭبەك نارىعىنىڭ تالاپتارىنا جانە ەڭ ۇزدىك الەمدىك وقۋ-وندىرىستىك تاجىريبەلەرگە سايكەس جاڭارتىلۋى قاجەت. سونىمەن قاتار, جوعارى ءبىلىم بەرۋ جۇيەسى ساپاسىنا ەرەكشە نازار اۋدارىلادى. جوعارى وقۋ ورىندارىنىڭ كادرلىق قۇرامىنا, ماتەريالدىق-تەحنيكالىق جابدىقتالۋ دەڭگەيىنە, ءبىلىم بەرۋ باعدارلامالارىنا قاتىستى باقىلاۋ مەن تالاپ كۇشەيتىلۋى قاجەت", - دەدى نازارباەۆ.