مەملەكەتتىڭ ەكونوميكاداعى ۇلەسىن ازايتۋ كەرەك - پرەزيدەنت

مەملەكەتتىڭ ەكونوميكاداعى ۇلەسىن ازايتۋ كەرەك. بۇل تۋرالى پرەزيدەنت نۇرسۇلتان نازارباەۆتىڭ بۇگىن جاريالانعان جولداۋىندا ايتىلعان. «مەملەكەتتىڭ ەكونوميكاداعى ۇلەسىن ىشكى جالپى ءونىمنىڭ 15%-ىنا دەيىن, ەكونوميكالىق ىنتىماقتاستىق جانە دامۋ ۇيىمى (ەىدۇ) ەلدەرى دەڭگەيىنە دەيىن تومەندەتۋ ەكونوميكالىق وسىمگە تىڭ سەرپىن بەرۋگە ءتيىس. بۇدان بۇرىن 2020 جىلعا دەيىن جەكەشەلەندىرىلەتىن 800-گە جۋىق كاسىپورىندى قامتيتىن تىزبە جاسالعان بولاتىن. ءتيىستى جۇمىستار اتقارىلۋدا. ۇكىمەتكە سول تىزبەدەگى كاسىپورىنداردى جەكەشەلەندىرۋدى تەزدەتىپ, ونى 2018 جىلدىڭ سوڭىنا دەيىن اياقتاۋدى تاپسىرامىن», - دەلىنگەن جولداۋدا. سونىمەن قاتار پرەزيدەنت ءىرى كومپانيالاردى ءىرو-عا دايىنداۋ جانە وعان بەيىمدەۋ ءىسىن دە جەدەلدەتۋ كەرەكتىگىن, Yellow Pages قاعيداتتارىن ەنگىزۋ مەملەكەت ءۇشىن ەكونوميكاداعى قىزمەت تۇرلەرىن 47 پايىزعا (652-دەن 346-عا) قىسقارتۋعا مۇمكىندىك بەرگەنىن ايتقان. "كەلەسى كەزەڭدە وسى قاعيداتتارعا ساي كەلمەيتىن مەملەكەت مەنشىگىندەگى بارلىق كاسىپورىندار مەن ۇيىمداردى 2020 جىلعا دەيىن جەكە سەكتورعا بەرۋ نەمەسە جويۋ قاجەت. ال ونداي كاسىپورىندار سانى بىرنەشە مىڭ بولادى. ءاربىر باعدارلاما نەمەسە تاپسىرماعا وراي زاڭدى تۇلعالار قۇرۋ تاجىريبەسى بۇدان بىلاي  توقتاتىلۋعا ءتيىس. جەكەشەلەندىرۋدىڭ جاريالىلىعى مەن تيىمدىلىگىن قامتاماسىز ەتۋ قاجەت", - دەپ تاپسىردى ن. نازارباەۆ.