ەلباسى: ۇلتتىق بانك الدىندا ماڭىزدى مىندەت تۇر

بۇگىندە ۇلتتىق بانك الدىندا ينفلياتسيالىق تارگەتتەۋ رەجىمىن دامىتۋ جونىندەگى ماڭىزدى مىندەت تۇر. بۇل تۋرالى ەلباسى نۇرسۇلتان نازارباەۆ قر حالقىنا جولداۋىندا مالىمدەدى. «ورتا مەرزىم ىشىندە ينفلياتسيا دەڭگەيىن كەزەڭ-كەزەڭمەن 3-4%-عا دەيىن تومەندەتۋگە قول جەتكىزۋىمىز كەرەك», - دەدى پرەزيدەنت. سونىمەن قاتار ول ەلىمىزدىڭ قارجى سەكتورىن «قايتا جاڭعىرتۋ» قاجەتتىلىگىن اتاپ ءوتىپ, ۇلتتىق بانككە بانك سەكتورىن قالىپقا كەلتىرۋ جونىندە شارالار كەشەنىن ازىرلەۋدى تاپسىردى. «بانكتەردىڭ بالانسىن ءتيىمسىز نەسيەلەردەن ارىلتۋ جۇمىسىن جەدەلدەتىپ, قاجەت بولعان جاعدايدا ولاردىڭ كاپيتالىن اكتسيونەرلەر تاراپىنان ارتتىرۋدى قامتاماسىز ەتۋ كەرەك. بانكتەردىڭ احۋالىنا جەدەل باقىلاۋ ورناتۋ ءۇشىن ۇلتتىق بانككە كوبىرەك قۇقىق بەرگەن ءجون. ۇلتتىق بانك بانكتەردىڭ قاتەلىك جىبەرۋىن كۇتپەي, ولارعا ىقپال ەتەتىن شارالار قابىلداۋ ءۇشىن ءفورمالدى كوزقاراستان ىقتيمال قاتەرلەرگە جول بەرمەيتىن قادامدارعا كوشۋگە ءتيىس. سونداي-اق, اۋديتورلىق كومپانيالاردىڭ جاۋاپكەرشىلىگىن ارتتىرىپ, اكتسيونەرلەردىڭ اشىقتىعىن قامتاماسىز ەتۋ, ۇجىمدىق باسقارۋدى جاقسارتۋ قاجەت. وسىنىڭ ءبارىن زاڭنامالىق دەڭگەيدە بەكىتۋ كەرەك. ەكونوميكاداعى قاراجات جەتىسپەۋشىلىگى جانە نەسيەلەر بويىنشا جوعارى مولشەرلەمە تۇيتكىلدەرىن شەشۋ ماقساتىمەن ۇلتتىق بانك پەن ۇكىمەتكە تەڭگە تۇرىندە قولجەتىمدى ورتا جانە ۇزاق مەرزىمگە ارنالعان قور قالىپتاستىرۋدى قامتاماسىز ەتۋ جونىندە كەشەندى شارالار قابىلداۋدى تاپسىرامىن. ۇلتتىق بانك ينفلياتسيا عانا ەمەس, سونىمەن قاتار ۇكىمەتپەن بىرگە ەكونوميكانىڭ ءوسۋى ءۇشىن دە جاۋاپتى بولۋعا ءتيىس», - دەدى ن.نازارباەۆ.