«بايتەرەك» پەن «قازاگرو» حولدينگتەرى قايتا قۇرىلادى

قازاقستان پرەزيدەنتى مەملەكەتتىك حولدينگتەر ءرولىن قايتا قاراستىرۋدى تاپسىردى. «ۇكىمەتكە «سامۇرىق-قازىنا» حولدينگىن ساپالى تۇردە ترانسفورماتسيالاۋ ءىسىن جۇزەگە اسىرۋدى تاپسىرامىن. باسقارۋشىلىق جانە وندىرىستىك بيزنەس ۇدەرىستەرىن تولىق رەۆيزيا مەن  وڭتايلاندىرۋدان وتكىزۋ قاجەت. ناتيجەسىندە ول تيىمدىلىگى جوعارى, جيناقى جانە كاسىبي حولدينگكە اينالۋعا ءتيىس. مەنەدجمەنت پەن كورپوراتيۆتى باسقارۋ ساپاسىن حالىقارالىق دەڭگەيگە جەتكىزۋ كەرەك. مەملەكەتكە قانداي ماڭىزدى سەكتورلاردا, قاتىسۋ ۇلەسىنىڭ قانداي مولشەرىمەن جانە نە قالدىراتىنىمىزدى ناقتى انىقتاپ الۋىمىز كەرەك», – دەدى ەلباسى. نۇرسۇلتان نازارباەۆ اتاپ وتكەندەي, تابيعي مونوپوليالاردى جانە ستراتەگيالىق ماڭىزى بار,  سونىڭ ىشىندە ترانسۇلتتىق كومپانيالار قاتىساتىن جوبالاردى ىسكە اسىرۋ مىندەتىن مەملەكەتكە قالدىرۋ كەرەك. بۇل جوبالار مۋلتيپليكاتيۆتى ناتيجە  بەرۋگە ءتيىس. سونىمەن قاتار ەلباسى «بايتەرەك» جانە «قازاگرو» حولدينگتەرىن دە قايتا قۇرۋدى جۇكتەدى. «ولار مەملەكەتتىك دامۋ باعدارلامالارىن ىسكە اسىرۋ جونىندەگى وپەراتورلار بولۋعا ءتيىس. سوعان وراي ولاردىڭ فۋنكتسيالارىن وڭتايلاندىرۋ كەرەك. جەكە سەكتور جۇزەگە اسىرا الاتىن نارسەنىڭ بارلىعى بيزنەسكە بەرىلۋى قاجەت. سونداي-اق, ولارعا باعدارلامالاردى ىسكە اسىرۋ ءۇشىن مەملەكەتتىك ەمەس قارجى كوزدەرى ارقىلى قور قالىپتاستىرۋمەن اينالىسۋ كەرەك», – دەدى ول.