مەيۋەزەر مەن ماكگرەگور جەكپە-جەك وتكىزۋى مۇمكىن

ارالاس جەكپە-جەكتەن (UFC) جارتىلاي ورتا سالماقتاعى الەم چەمپيونى كونور ماكگرەگور شارشى الاڭدا فلويد مەيۋەزەرمەن جۇدىرىقتاسۋى مۇمكىن. مالىمەتتەر بويىنشا, جەكپە-جەك 2017 جىلدىڭ سوڭىندا نەمەسە 2018 جىلدىڭ باسىندا وتەدى. بۇل تۋرالى vesti.kz حابارلادى. يرلانديالىق سپورتشىنىڭ ايتۋىنشا, ول جۋىق ارادا لاس-ۆەگاسقا بارىپ, بوكسشىنىڭ ليتسەنزياسىن الۋعا دايىندالىپ جاتىر ەكەن. «مەنىڭ ويىمشا, بۇل ميللارد دوللار ءۇشىن وتەتىن ءبىرىنشى جەكپە-جەك بولادى. كەزدەسۋ بيىلعى جىلدىڭ سوڭىندا نەمەسە كەلەر جىلدىڭ باسىندا وتەتىن شىعار. قازىر مەن لاس-ۆەگاسقا بارىپ, بوكسشىنىڭ ليتسەنزياسىن الۋعا دايىندالىپ جاتىرمىن. سودان سوڭ مەيۋەزەردىڭ ۇسىنىسىن كۇتەمىن», – دەيدى كونور worldboxingnews باسىلىمىنا بەرگەن سۇحباتىندا. ايتا كەتەيىك, بۇعان دەيىن الەمدىك باق-تا امەريكالىق بوكسشى فلويد مەيۋەزەر كونور ماكگرەگورعا كەزدەسۋ ءۇشىن 15 ميلليون دوللار ۇسىنعانى حابارلانعان. الايدا, يرلانديالىق سپورتشى بۇل اقشانى ازسىندى. وسىدان كەيىن UFC پرەزيدەنتى دانا ۋايت ەكى سپورتشىعا دا جەكپە-جەك ءۇشىن 25 ميلليون دوللار ۇسىنعان بولاتىن. بىراق بۇل ۇسىنىستى مەيۋەزەر قابىلداعان جوق.