«بارىس» مينسكىدە «دينامودان» جەڭىلدى

قۇرلىقتىق حوككەي ليگاسىنىڭ تۇراقتى چەمپيوناتىندا استانانىڭ «بارىسى» مينسكىدە «دينامو» كومانداسىمەن كەزدەسىپ, 1:2 ەسەبىمەن جەڭىلدى. ويىندا العاشقى گول 11-مينۋتتا سوعىلدى. الەكساندر ءپاۆلوۆيچتىڭ سوققىسىنا قوناقتار بوگەت الا المادى. وسىدان كەيىن دە قوس كوماندا الما كەزەك قاۋىپتى شابۋىلدار ۇيىمداستىرعان. الايدا, ەسەپ ءبىرىنشى كەزەڭدە وزگەرىسسىز قالدى. ماتچتىڭ نەگىزگى گولدارى ەكىنشى 20 مينۋتتا سوعىلدى. 34-مينۋتتا نيكيتا ميتسكەۆيچ مەرگەندىگىمەن تانىلىپ, ەسەپتى ەسەلەي ءتۇستى. اراعا 5 مينۋت سالىپ, برەندون بوچەنسكي «بارىستىڭ» العاشقى ءارى سوڭعى شايباسىن سوقتى. كەزدەسۋدىڭ سوڭعى بولىگىندە ەدۋارد زانكوۆەتس شاكىرتتەرى قورعانىستا ساق قيمىلداپ, شابۋىلدا ساۋاتتى وينادى. الايدا, ورايى كەلگەن ساتتەر ۇيىمداستىرىلعانمەن, جەرلەستەرىمىزدىڭ ۋىسىنان سۋسي بەردى. وسىمەن 54 ويىننان 81 ۇپايى بار ەلوردالىقتار «شىعىس» كونفەرەنتسياسىندا ازىرگە 5-ورىندا كەلەدى. كەلەسى كەزدەسۋىن 1 اقپان كۇنى استانادا حەلسينكيدىڭ «يوكەريت» ۇجىمىمەن وتكىزەدى. «مينسكىنىڭ «ديناموسىن» جەڭىسىمەن قۇتتىقتايمىن. بۇگىن جانكۇيەرلەر جاقسى ويىنعا كۋا بولدى دەپ ويلايمىن. كوماندام ءبارىن جوسپار بويىنشا وتكىزدى. تابلوداعى ەسەپتى بىرنەشە رەت وزگەرتۋىمىزگە بولاتىن ەدى. الايدا, ساتتىلىك بۇل جولى ءبىزدىڭ جاقتا بولمادى. ايدىن يەلەرى مۇمكىندىكتەرىن ءتيىمدى پايدالانا ءبىلدى», – دەدى ەدۋارد زانكوۆەتس ماتچتان كەيىن ۇيىمداستىرىلعان ءباسپاسوز كونفەرەنتسياسىندا.