بىلتىر پاۆلوداردا وتكەن بوكستان ەل چەمپيوناتى, ۇلتتىق قۇرامانى وليمپيادادان سوڭ قاعىپ-سىلكىپ الۋعا تاماشا مۇمكىندىك بولدى. ءار وليمپيادا نەمەسە الەمدىك دودا اياقتالا سالىسىمەن, ۇلتتىق قۇراماعا وزگەرىس كەرەك دەپ جاتامىز عوي. بۇل جولى قۇراما ونسىز دا جاڭارعالى تۇر ەكەن. 49 كيلودا ءۇش وليمپيادا ويىندارىنا قاتىسىپ, شيرەك فينالدا سۇرىنگەن ءبىرجان جاقىپوۆ پەن 60 كيلودا اتوي سالعان بەرىك ءابدىراحمانوۆ رينگپەن قوش ايتىستى. ءبىرى باسشى بولىپ تا ۇلگەردى. ءبىرى مۇمكىن باپكەر بولار. ال 52 كيلودا بوكستاسقان ولجاس ساتتىباەۆ ەندى WSB جوباسىنداعى «استانا ارلاندارى» بوكس كلۋبىنىڭ مۇشەسى ءھام كاپيتانى. قۇراماعا ونىڭ ورنىنا مىقتى بوكسشى كەرەك.
اۋەسقوي بوكسشى الۋى قاجەت اتاقتىڭ ءبارىن يەلەنگەن دانيار ەلەۋسىنوۆتىڭ (69 كيلو) كاسىپقويعا كەتەم دەگەن شەشىمى قۇپتاۋعا تۇرارلىق. اۋەلگى كەزدەسۋىنە شانحايدا شىعادى دەپتى رەسمي دەرەك كوزدەرى.
قوس وليمپيادانىڭ قولاسىن تاققان دىچكو دا انە-مىنە كاسىپقوي بوكس الەمىنە كەتەدى دەگەن ءسوز جەلدەي ەسكەنى قاشان. دەمەك, بۇل جاعداياتتاردى اجەپتاۋىر وزگەرىس دەپ ايتا الامىز. وسىدان سوڭ قۇراماداعى وزگە جىگىتتەر دە «سالماق قوستى». ءىلياس سۇلەيمەنوۆ 56-عا, ابىلايحان ءجۇسىپوۆ 69-عا, جانىبەك ءالىمحان ۇلى 81-گە اۋىستى. باس باپكەر مىرزاعالي ايتجانوۆ قازىر وزگەرگەن قۇراممەن بىرگە ايبا بوكس اكادەمياسىندا دايىندىققا كىرىسىپ كەتتى.
ەندى نەگىزگى تاقىرىپقا ويىسايىق. ارىسى 2000, بەرىسى 2004 جىلدان باستاپ وليمپياداداعى «قازاقتىڭ سالماعى» 69 كيلونىڭ قاھارمانىنا اينالعان دانيار ورىن بوساتقاننان كەيىن, بۇل سالماققا ۇمىتكەر كىم دەگەن زاڭدى ساۋال قويىلارى ءسوزسىز. ءا دەگەندە ەسكە ەكى بىلعارى قولعاپ شەبەرى تۇسەدى. ولار: ابىلايحان ءجۇسىپوۆ (20 جاس) پەن سادريددين احمەدوۆ (19 جاس). ەكەۋى دە 20-عا كەلىپ جالىنداپ تۇرعان, سەن تۇر مەن اتايىن جىگىتتەر. سيدنەيدەگى ەرماحان, افينىداعى باقتيار, بەيجىڭدەگى باقىت, لوندونداعى سەرىك, ريوداعى دانيار سالعان داڭعىلدى توكيودا كىم لايىقتى جالعاستىرا الۋى مۇمكىن؟ ابىلايحان با الدە سادريددين بە؟
باۋىرجان امانباەۆ پەن اندرەي رايشتان ءتالىم الاتىن ابىلايحان جاسوسپىرىمدەر اراسىندا جۇرگەن شاعىندا جەڭىلىستىڭ ءدامىن تاتىپ, تۇزىن بايقاپ كورمەگەن بالا ەدى. قر چەمپيونى دەگەن اتاقتارىن بىلاي قويعاننىڭ وزىندە, ءتۇرلى حالىقارالىق بايگەلەردىڭ الدىن بەرمەي كەلە جاتقان تۇلپار رەتىندە كوزگە ىلىكتى. بىراق, ەرەسەكتەرگە اۋىسا سالىسىمەن ريو دوداسىنا ءتۇسىپ, جەڭىلدى. رينگتەگى قيمىلى مەن بوكسشىلىق الەۋەتى تۋرالى اڭگىمە قىلماي تۇرىپ, كوپكە تانىمال ەمەس, بىراق بوكس ماماندارىنىڭ جوعارى باعاسىنا يە بولعان سادريددين احمەدوۆ تۋرالى دا سىر شەرتە كەتەيىك. ماقتاارالدىڭ تۋماسى دا سان ءتۇرلى قۇرلىقتىق ءھام الەمدىك باسەكەلدەردىڭ التىنىن وڭىرىندە جارقىراتىپتى. 2015 جىلى احمەت كومەرت مەميورالىنىڭ باس جۇلدەسىن, 2016 جىلى كليچكو ءتۋرنيرىنىڭ باس بايگەسىن, Golden Glove of Vojvodina حالىقارالىق باسەكەسىنىڭ التىنىن قانجىعاعا بوكتەرگەن. ءبىراز اي بۇرىن عانا رەسەيگە بارىپ, جاستار اراسىنداعى الەم چەمپيونى دەگەن مارتەبەلى اتاقتى دا يەلەنىپ قايتتى.
بوكستاسۋ تاسىلدەرى
ابىلايحان ءجۇسىپوۆ. شارشى الاڭعا شىققان بەتتە ءبىرىنشى نومىرمەن قيمىلداۋعا ارەكەت جاسايدى. اياقپەن جاقسى وينايدى. بوكس ماماندارى مەن جانكۇيەرلەر وسى قاسيەتى ءۇشىن ونى سەرىك ساپيەۆكە ۇقساتىپ جاتادى. (ايتپاقشى, ەكەۋى دە اباي اۋداندىق بوكس مەكتەبىنىڭ تۇلەگى). وڭ قولىمەن قارسىلاسىن شالعىتىپ, سول قولىمەن قاتتى جانە ءدال سوققىلار جاسايدى. قورعانىستا قاتەلىكتەر جىبەرگەنىمەن, اياعىنىڭ جىلدامدىعى ارقاسىندا قارسىلاستىڭ سوققىسىنان جالتارىپ كەتە الادى. سادريددين احمەدوۆ. رينگتە ءوزىن رينگ قوجايىنى رەتىندە ەركىن سەزىنەدى جانە قارسىلاسقا رەتى كەپ تۇرسا ءبىرىنشى بولىپ سوعۋعا ۇمتىلادى. قارسىلاسى شابۋىلعا شىققاندا جانە قورعانىسى اشىق قالعاندا سەريالى سوققىلار جاساپ قالۋعا تىرىسادى. فيزيكالىق دايىندىعى مىقتى, اشىق شايقاستان قاشپايدى. ۇرىس مانەرى كاسىپقوي بوكسشىلارعا كەلەدى. ابىلايحان اۋىر سوققىنى سول قولىمەن جاساسا, سادريددين كەرىسىنشە ەكى قولمەن دە ۇرادى. وڭ قولىنىڭ سوققىسى سول قولىنا قاراعاندا الدەقايدا اۋىر.جەتىستىكتەرى
ابىلايحان ءجۇسىپوۆ: جاسوسپىرىمدەر اراسىندا قر چەمپيونى (2013), ازيا جانە الەم چەمپيونى (2013); جاستار اراسىندا قر چەمپيونى, حالىقارالىق ءتۋرنيردىڭ جەڭىمپازى (گەرمانيا, 2014), ازيا جانە الەم چەمپيونى (2014), جاستار اراسىنداعى وليمپيادانىڭ جەڭىمپازى (2014), ەرەسەكتەر اراسىندا ع.جارىلعاپوۆتى ەسكە تۇسىرۋگە ارنالعان حالىقارالىق ءتۋرنيردىڭ جەڭىمپازى (قاراعاندى, 2014), مينسك (2015) جانە ع.جارىلعاپوۆ تۋرنيرلەرىنىڭ قولا جۇلدەگەرى (2015), ۆەنگريا (2016) جانە قىتايدا وتكەن ازيالىق ىرىكتەۋ تۋرنيرلەرىنىڭ جەڭىمپازى (2016). ەرەسەكتەر اراسىندا قازاقستان چەمپيونى, پاۆلودار (2016). سادريددين احمەدوۆ: جاستار اراسىنداعى قازاقستان چەمپيونى (2011), جاستار اراسىنداعى قازاقستان چەمپيونىنىڭ كۇمىس جۇلدەگەرى (2012), جاستار اراسىنداعى قازاقستان چەمپيوناتىنىڭ قولا جۇلدەگەرى (2013), جاستار اراسىنداعى قازاقستان چەمپيونى (2014), احمەت كومەرت مەميورالىنىڭ جەڭىمپازى (2015), جاستار اراسىنداعى قازاقستان چەمپيونى (2015), ايىعندى كليچكو ءتۋرنيرىنىڭ جەڭىمپازى (2016), يسپانياداعى حالىقارالىق ءتۋرنيردىڭ چەمپيونى (2016), سەربيادا وتكەن 34-ءشى Golden Glove of Vojvodina حالىقارالىق ءتۋرنيرىنىڭ جەڭىمپازى (2016), جاستار اراسىنداعى قازاقستان چەمپيونى (2016), جاستار اراسىنداعى الەم چەمپيونى (سانكت-پەتەربۋرگ 2016).ءتۇيىن
ابىلايحان ءجۇسىپوۆ ەرەسەكتەر قۇراماسىنا سادريدديننەن 2 جىل ەرتە اۋىسقانى بولماسا, ەكى بوكسشىنىڭ الەۋەتى بىردەي. دەگەنمەن, ءدال قازىرگى ساتتە 69 كەلىدە ۇلتتىق قۇرامانىڭ ءبىرىنشى ءنومىرلى بوكسشىسى ابىلايحان ءجۇسىپوۆ بولۋى مۇمكىن. ويتكەنى, ول 2016 جىلعى بوكستان قر چەمپيونى. ال, سادريددين جاستار قۇراماسىنان ەرەسەكتەر قۇراماسىنا بيىل قوسىلدى. 2017 جىلدىڭ ەنشىسىندە حالىقارالىق ءىرى تۋرنيرلەردەن بولەك, الەم جانە ازيا چەمپيوناتى بار. قاي چەمپيوناتقا كىم باراتىنىن جانە ءبىرىنشى ءنومىرلى بوكسشى كىم بولاتىنىن ۇلتتىق قۇراما باپكەرى مىرزاعالي ايتجانوۆتىڭ ءوزى تاڭدايتىن بولادى. ال قۇرمەتتى وقىرمان, ءسىزدىڭ ويىڭىزشا كىم ءبىرىنشى ءنومىرلى بوكسشى بولۋعا لايىقتى؟ ءالي بيتورە, جۋرناليست
