بۇل – جاھان كوز تىككەن ۇدەرىس

كەشە استاناداعى «Rixos President Astana» قوناق ۇيىندە سيرياداعى شيەلەنىستى رەتتەۋ بويىنشا حالىقارالىق كەلىسسوزدەر باستالعانى بەلگىلى. جابىق ەسىك جاعدايىندا ءوتىپ جاتقان كەلىسسوزدەر ءبىر تاۋلىككە سوزىلادى دەپ جوسپارلانۋدا. «قازمەديا» ورتالىعىندا ءباسپاسوز ءماسليحاتىن وتكىزگەن سىرتقى ىستەر ءمينيسترىنىڭ ورىنباسارى رومان ۆاسيلەنكو كەلىسسوزدەرگە حالىقارالىق قوعامداستىقتىڭ قىزىعۋشىلىعى وتە جوعارى ەكەنىن مالىمدەدى. ول شاراعا 7 تاراپتىڭ وكىلى قاتىسىپ جاتقانىن جەتكىزدى. اتاپ ايتقاندا, سيريا ۇكىمەتىنىڭ دەلەگاتسياسىن بۇۇ جانىنداعى وسى ەلدىڭ تۇراقتى وكىلى باسار ءال-دجافاري باسقارادى. سيريا وپپوزيتسياسىنىڭ دەلەگاتسيا­سىندا شامامەن 15 وپپوزيتسيالىق توپتىڭ وكىلى بار. رەسەي دەلەگاتسياسى وسى ەل پرەزيدەنتىنىڭ سيريا ءىسى بويىنشا ارنايى وكىلى الەكساندر لاۆرەنتەۆتىڭ باسشىلىعىمەن كەلىپ وتىر. تۇرىك جانە يران دەلەگاتسيالارىن اتالعان مەملەكەتتەردىڭ سىرتقى ىستەر مينيسترلەرىنىڭ ورىنباسارلارى – سەدات ونال مەن سادەك حۋسەين دجابەري انساري باستاپ كەلدى. بۇدان بولەك, سيرياداعى داعدارىستى رەتتەۋ پروتسەسىنە بۇۇ باس حاتشىسىنىڭ سيريا جونىندەگى ارناۋلى وكىلى ستاففان دە ميستۋرا مەن اقش-تىڭ قازاقستانداعى ەلشىسى دجون كرول قاتىسىپ وتىر. سونىمەن قاتار, ۆيتسە-مينيستر استانا پروتسەسى بويىنشا اقپارات تاراتۋعا الەمنىڭ تۇكپىر-تۇكپىرىنەن 320 جۋرناليست كەل­گەنىن ءمالىم ەتتى. ولاردان بولەك, 120 وتاندىق باق وكىلى بار. «بۇقارالىق اق­پارات قۇرالدارىنىڭ وكىلدەرى كەلىسسوز­دەردىڭ باسىندا عانا فوتو جانە ۆيدەو ءتۇسى­­رى­لىمگە جىبەرىلەدى. ويتكەنى, ونىڭ نەگىز­گى بولىگى جابىق رەجىمدە وتەدى. ءوز­دەرى­­ڭىز بايقاپ وتىرعانداي, قازىرگى ۋاقىت­­تا استاناداعى سيرياارالىق كەلىس­سوز­­دەر­گە حالىقارالىق قوعام­داس­تىقتىڭ قى­زى­عۋ­شىلىعى وتە جوعارى», – دەدى قا­زاق­ستان سىرتقى ىستەر ءمينيسترىنىڭ ورىنباسارى. ول, سونداي-اق, قاجەت بولعان جاع­دايدا قازاقستان الداعى ۋاقىتتا دا سيريا ءما­سەلەسى بويىنشا حالىق­ارالىق كەزدەسۋ الاڭىن ۇسىنۋعا دايىن ەكەندىگىن ءمالىم­دەدى. ايدار ورىسباەۆ, «ەگەمەن قازاقستان»