ەلباسى: مەملەكەتتىڭ قامقورلىعىنا بيزنەستىڭ قايتارىمى بولۋى كەرەك

مەملەكەت باسشىسى «اتامەكەن» ۇلتتىق كاسىپكەرلەر پالاتاسىنىڭ باسشىلىعىن قابىلدادى, دەپ حابارلايدى اقوردانىڭ رەسمي سايتى. كەزدەسۋدە قازاقستان پرەزيدەنتىنە ۇلتتىق پالاتانىڭ 2016 جىلعى جۇمىسىنىڭ قورىتىندىلارى, رەسپۋبليكالىق بيزنەس قوعامداستىعىنىڭ دامۋى, سونداي-اق الداعى كەزەڭگە ارنالعان جوسپارلار تۋرالى پرەزيديۋم توراعاسى ت.ق ۇلىباەۆ پەن باسقارما توراعاسى ا.مىرزاحمەتوۆ باياندادى. ەلباسى بيزنەستى قولداۋ جونىندە ۇكىمەت ماقساتتى تۇردە تۇراقتى جۇمىس جۇرگىزىپ وتىرعانىن اتاپ ءوتتى. "زاڭنامالىق اكتىلەرگە دەر كەزىندە وزگەرىستەر ەنگىزۋ باعىتىندا جۇيەلى جۇمىستار جۇرگىزىلۋدە, تەكسەرۋشى مەكەمەلەر سانى قىسقارتىلدى, جوسپارلى تەكسەرىستەر الىنىپ تاستالدى. كاسىپكەرلەر زاڭنامالىق ۇدەرىستەرگە بەلسەنە اتسالىسىپ كەلەدى, بۇل ەلدىڭ ىشكى جالپى ونىمىندەگى بيزنەستىڭ ۇلەسىن ارتتىرۋعا ىقپال ەتۋگە ءتيىس", – دەدى نۇرسۇلتان نازارباەۆ. سونداي-اق, قازاقستان پرەزيدەنتى ەلدەگى كاسىپكەرلىكتى دامىتۋ ءۇشىن مەملەكەت قابىلداپ جاتقان شارالارعا بيزنەس وكىلدەرى تاراپىنان لايىقتى قايتارىم بولۋعا ءتيىس ەكەنىنە نازار اۋداردى. "مەملەكەت تاراپىنان كورسەتىلگەن قامقورلىق پەن قولداۋعا بيزنەستىڭ جاۋاپ بەرەتىن كەزى كەلدى. ازاماتتاردى كاسىپكەرلىك سالاسىنا تۇراقتى تۇردە تارتىپ, ەل ەكونوميكاسىنداعى ولاردىڭ ۇلەسىن ارتتىرۋ ءۇشىن جۇمىس جۇرگىزۋ قاجەت", – دەدى مەملەكەت باسشىسى. پالاتا باسشىلىعى قازىرگى ۋاقىتتا شاعىن جانە ورتا بيزنەس ۇلەسى ىشكى جالپى ءونىمنىڭ 25%-ىن قۇراپ, وندا 3 ميلليوننان استام ادام جۇمىس ىستەپ جاتقانىن مالىمدەدى. 2016 جىلى 11,2 ترلن تەڭگەنىڭ ءونىمى وندىرىلگەن, بۇل – 2015 جىلعى كورسەتكىشپەن سالىستىرعاندا 6%-عا ارتىق. سونىمەن بىرگە, باسقارما توراعاسى ەلباسىنىڭ تاپسىرماسى بويىنشا رۇقسات بەرۋ جانە باقىلاۋ-قاداعالاۋ سالاسىندا رەۆيزيالىق جۇمىس جۇرگىزىلىپ جاتقانىن اتاپ ءوتتى. ونىڭ ناتيجەسىندە رۇقسات بەرۋ قۇجاتتارى ايتارلىقتاي ازايتىلىپ, جوسپارلى تەكسەرىستەر الىنىپ تاستالدى. "باس پروكۋراتۋرامەن, پارلامەنت دەپۋتاتتارىمەن بىرلەسىپ, قازىر شاعىن جانە ورتا بيزنەس قىزمەتىنىڭ ءتۇرلى سالاسىنداعى سانيتارلىق-ەپيدەميولوگيالىق تالاپتاردى قايتا قاراستىرۋدامىز", – دەدى ا.مىرزاحمەتوۆ. بۇدان بولەك, ۇلتتىق پالاتا باسشىلىعى وتاندىق كاسىپكەرلەردىڭ جۇمىسىن وڭتايلاندىرۋ جانە تيىمدىرەك ەتە ءتۇسۋ ءۇشىن ءموبيلدى قىزمەتتەر قالىپتاستىرۋعا قاتىستى جۇرگىزىلىپ جاتقان جۇمىستار تۋرالى باياندادى. نۇرسۇلتان نازارباەۆ كەزدەسۋ قورىتىندىسى بويىنشا بىرقاتار ناقتى تاپسىرما بەردى.