«قازاقستاننىڭ تۇرعىن ءۇي قۇرىلىس جيناق بانكىنە» جاڭا باسشى كەلدى

«بايتەرەك» ۇلتتىق باسقارۋشى حولدينگىنىڭ ءباسپاسوز قىزمەتىنىڭ حابارلاۋىنشا, بۇگىن «بايتەرەك» ۇبح» اق باسقارما توراعاسى ەربولات دوساەۆ «قازاقستاننىڭ تۇرعىن ءۇي قۇرىلىس جيناق بانكى» اق ۇجىمىنا جاڭا باسشىنى تانىستىردى, دەپ حابارلادى "بايتەرەك" ۇلتتىق باسقارۋشى حولدينگى" اق ءباسپاسوز قىزمەتى. «بانكتىڭ باسشىلىعىنا ديرەكتورلار كەڭەسىنىڭ مۇشەسى, 2016 جىلدىڭ 3 اقپانىنان باستاپ «بايتەرەك» حولدينگى باسقارما توراعاسىنىڭ ورىنباسارى قىزمەتىن اتقارعان ءلاززات يبراگيموۆا تاعايىندالدى. جاڭا باسشىنى تانىستىرا وتىرىپ, ەربولات دوساەۆ ءلاززات يبراگيموۆانىڭ «بايتەرەك» حولدينگى قۇرىلىمى اياسىندا جەتكەن جەتىستىكتەرىن, «تۇرعىن ءۇي قۇرىلىس جيناق بانكىن» جاڭا دەڭگەيگە كوتەرۋگە سەپتەسەتىن كاسىبي بىلىكتىلىگى مەن جەكە قاسيەتتەرىن اتاپ ءوتتى. ل.يبراگيموۆا گۋميلەۆ اتىنداعى ەۋرازيا گۋمانيتارلىق ۋنيۆەرسيتەتىندە وقىتۋشى قىزمەتىنەن باستاپ, «بايتەرەك» حولدينگىنە كىرەتىن جانە باسقا دا ءىرى دامۋ ينستيتۋتتارىنىڭ باسشىلىعىنا دەيىنگى لاۋازىمداردى اتقارعان. ءتۇرلى جىلدارى بۇۇ دامۋ باعدارلاماسى جوباسىنىڭ ەكونوميكالىق دامۋ بويىنشا ۇلتتىق ساراپشىسى, «دامۋ» كاسىپكەرلىكتى دامىتۋ قورىنىڭ ساراپتاۋ مەن دامۋ ستراتەگياسى, وقىتۋ مەن كونسالتينگ, كورپوراتيۆتى دامۋ دەپارتامەنتتەرىنىڭ باسشىسى, «سامۇرىق-قازىنا» ۇاق» اق ارنايى باعدارلامالار دەپارتامەنتىنىڭ باس مەنەدجەرى قىزمەتتەرىن اتقاردى. 2011 جىلدان بەرى «دامۋ» كاسىپكەرلىكتى دامىتۋ قورى» اق باسقارما ءتورايىمى لاۋازىمىندا جۇمىس ىستەدى. ايتا كەتەيىك, «قازاقستاننىڭ تۇرعىن ءۇي قۇرىلىس جيناق بانكى» «بايتەرەك» حولدينگىنىڭ ەنشىلەس ۇيىمى بولىپ تابىلادى.