ەركەبۇلان سەيداحمەت: گراناتكين ءتۋرنيرىن كەلەسى جىلى جەڭەمىز دەپ ۇمىتتەنەمىن

گراناتكين مەموريالى-2017 ءتۋرنيرىنىڭ ۇزدىك شابۋىلشىسى ەركەبۇلان سەيداحمەت جارىستان العان اسەرى, العا قويعان ماقساتى, قازاقستان پرەمەر-ليگاسىندا كىمنىڭ ويىنىنا ەلىكتەيتىنىن مالىمدەدى. بۇل تۋرالى sports.kz حابارلادى. «بىزگە ۇلكەن سەنىم ارتىپ, تىلەۋىمىزدى تىلەگەن جانكۇيەرلەرگە العىسىمىز شەكسىز. بۇل تۋرنيردەن ۇلكەن تاجىريبە جيناپ قايتتىق. جىبەرگەن قاتەلىكتەرىمىزدىڭ ورنىن تولتىرىپ, بۇل ماقساتىمىزعا كەلەسى جىلى جەتەمىز دەگەن ۇمىتتەمىن. جەڭىسكە قارىس قادام جەتپەي قالدى. بىراق كۇمىس جۇلدەگە جەتۋ ءۇشىن دە از تەر توكپەدىك», – دەدى ول. «اقتىق سىندا قاتتى قوبالجىعان بولۋىمىز كەرەك بىردەن ءوز ويىنىمىزدى كورسەتىپ كەتە المادىق. ەكىنشى تايمدا جيناقىلىق تانىتىپ, قارقىنىمىزدى ۇدەتتىك. وكىنىشكە وراي, قانشا قاۋىپتى ساتتەر جاساعانىمىزبەن ءبىر عانا قاتەلىكتىڭ ورنىن تولتىرا المادىق», – دەدى جاس تالانت. وتكەن جىلدىڭ قازان ايىندا ەۋروپا-2017 ءتۋرنيرىنىڭ ىرىكتەۋ كەزەڭىندە قازاقستان گرەكيادان ۇتىلعان. الايدا, ول كەزدە كەتكەن ەسەنى بۇل جولى قايتارا ءبىلدى. «ول ويىندى ۇمىتپاسپىن. باپكەرىمىز يسپانيالىق بولاتىن, ال قازىر ءوزىمىزدى جاقسى بىلەتىن جاتتىقتىرۋشىمىز بار. الەكساندر كۋزنەتسوۆ بىلىكتى مامان. ءتورت كۇننىڭ ىشىندە جەڭىمپاز كوماندانى جاساقتاپ شىقتى», – دەدى ەركەبۇلان. ءتۋرنيردىڭ «ۇزدىك شابۋىلشىسى» اتاعىن يەلەنگەن ول: «مۇنداي اتاقتى يەلەنگەنىمە قۋانىشتىمىن. بىراق بۇل جالعىز مەنىڭ ەمەس بۇكىل كوماندامنىڭ ەڭبەگى», – دەدى. جاس تالانت بۇگىندە جەكەمەنشىك كوماندالاردىڭ بىرىندە دوپ تەۋىپ ءجۇر. حالىقارالىق تۋرنيردە ۇزدىك اتانعان فۋتبولشىنىڭ پرەمەر-ليگا كلۋبتارىنىڭ بىرىندە ويناعىسى كەلە مە ەكەن؟ «قازىر تارازدىڭ «مونتاجنيك» كلۋبىندا ءجۇرمىن. بۇعان دەيىن ۇسىنىستاردىڭ تۇسكەنى جونىندە بىلمەيدى ەكەنمىن. ءوزىمنىڭ گەورگي پالوۆيچ ەسىمدى جەكە اگەنتىم بار. بۇل ماسەلەنىڭ ءبارى سول كىسىنىڭ موينىندا. تەك قانا قازاقستان پرەمەر-ليگاسىندا عانا ەمەس ەۋروپانىڭ الپاۋىت كوماندالارىندا ويناعىم كەلەدى. فۋتبولشىلاردان باۋىرجان يسلامحانعا قاتتى ەلىكتەيمىن. ول سەكىلدى ەلىمنىڭ ماقتانىشى بولعىم كەلەدى», – دەدى گراناتكين مەموريالى-2017 ءتۋرنيرىنىڭ ۇزدىك شابۋىلشىسى.