شقو-دا الپىسقا جۋىق ادام قار قۇرساۋىنان قۇتقارىلدى

دەمالىس كۇندەرى شىعىس قازاقستان قۇتقارۋشىلارى 60-قا جۋىق ادامدى قار باسقان جولداردان الىپ شىقتى, دەپ حابارلادى تج دەپارتامەنتى. جارما اۋدانىندا «شار-باقىرشىق» جول بولىگىندە تۇرىپ قالعان ادامدارعا كومەك كورسەتىلدى. ولاردى شىعىس ايماقتىق اەروموبيلدى جەدەل قۇتقارۋ جاساعى كورشىلەس شالاباي ەلدى مەكەنىنە جەتكىزىپ سالدى. جالپى سانى 48 ادام جانە 3 ءسابي قۇتقارىلدى. جولدا 16 جەڭىل كولىك جانە 7 دانا جۇك كولىگى قالدى. سونىمەن بىرگە, شااجقج ەكىنشى توبى «سەمەي-وسكەمەن» جول بولگىندەگى ءۇش ازاماتتى پريۆولنوە اۋىلىنىڭ مەديتسينالىق-قۇتقارۋ بولىمىنە جەتكىزدى. «وسكەمەن-الماتى» جولىنداعى جولاۋشىلار دا كومەككە مۇقتاج ەدى. شقو تجد «ءورت ءسوندىرۋ جانە اپاتتان-قۇتقارۋ جۇمىستارى قىزمەتىنىڭ» ءورت سوندىرۋشىلەرى ارنايى تەحنيكامەن 3 ادامدى قالباتاۋ اۋىلىنا اپاردى. جولاۋشىلار اراسىندا زارداپ شەككەندەر جوق. قۇزىرلى ورگان وكىلدەرىنىڭ حابارلاۋىنشا, دەمالىس كۇندەرى قاتتى بوران مەن جولدىڭ كورىنبەۋىنەن بىرقاتار جولدار جابىلعان. شقو تجد قىزمەتتەرى تۇرعىندارعا جول جاعدايىن الدىن الا ەسكەرتتى.