قاشاعاندا «بولاشاق» جەرۇستى كەشەنىنىڭ قۇرىلعىسى سىناقتان ءوتتى

قاشاعان تەڭىز كەن ورنىندا مۇناي ءوندىرىسىن قايتا باستاۋ الدىندا «بولاشاق» مۇناي جانە گاز دايىنداۋ قوندىرعىسى سىناقتان ءوتتى, دەپ حابارلادى قر ەنەرگەتيكا مينيسترلىگىنىڭ ءباسپاسوز قىزمەتى. «مۇناي ءوندىرىسى توقتاپ تۇرعاندا, «بولاشاق» جەرۇستى كەشەنىنىڭ بارلىق جابدىعى كونسەرۆاتسيا جاعدايىندا تۇردى. مۇناي ءوندىرىسى قايتا جاڭعىرتىلعاندا, جابدىقتار مەن قۇبىر جەلىلەرىن تەحنيكالىق تەكسەرىستەن جانە سىناقتان وتكىزۋ بويىنشا ءىس-شارالار كەشەنى جۇزەگە اسىرىلدى. قۇبىرلاردى ودان ءارى پايدالانۋ تەحنيكالىق قىزمەت كورسەتۋ مەن جوسپارلى الدىن الۋ جۇمىستارىنىڭ بەكىتىلگەن كەستەسىنە سايكەس ىسكە اسىرىلاتىن بولادى», - دەلىنگەن حابارلامادا. ەسكە سالا كەتسەك, «بولاشاق» جەرۇستى كەشەنى 2013 جىلى, قاشاعان كەن ورنىندا مۇناي ءوندىرۋ جۇمىستارى باستالعاندا پايدالانۋعا بەرىلدى. الايدا, كەن ورنىنان شيكىزات تاسىمالدايتىن قۇبىر جەلىلەرىنەن اقاۋ شىعىپ, مۇناي ءوندىرىسى توقتاپ قالدى. ول 2016 جىلدىڭ قىركۇيەگىندە قايتا قالپىنا كەلتىرىلدى. قاڭتار ايىنىڭ باسىندا قاشاعاندا مۇنايدىڭ العاشقى ميلليونى ءوندىرىلدى. ونىڭ ەكسپورت الدىنداعى دايىندىعى «بولاشاق» جەرۇستى كەشەنىندە جۇرگىزىلدى.