Forbes: الۆارەس گولوۆكينمەن جەكپە-جەككە شىقسا عانا جۇرتتىڭ پىكىرى وزگەرۋى مۇمكىن

Forbes جۋرنالى مەكسيكالىق بوكسشى ساۋل «كانەلو» الۆارەستىڭ (48-1-1, 34 كو) مانسابى مەن بەدەلىنىڭ ارتۋى نەلىكتەن قازاقستاندىق گەننادي گولوۆكينمەن بايلانىستى ەكەنىن ءتۇسىندىردى, دەپ حابارلادى vesti.kz. بەلگىلى بولعانداي, ول 6 مامىر كۇنى ءوزىنىڭ وتانداسى كىشى حۋليو سەزار چاۆەسپەن  (50-2-1, 32 كو) جۇدىرىقتاسادى. اتالعان باسىلىمنىڭ پىكىرى بويىنشا, بۇل وعان قارجىلىق جاعىنان ءتيىمدى كەزدەسۋدىڭ ءبىرى بولماق. «جەڭىسكە جەتكەن كۇننىڭ وزىندە «كانەلونىڭ» جۇرت الدىنداعى بەدەلى ارتا ما؟ جوق. تەك گولوۆكيندى جەڭسە عانا (ەڭ بولماعاندا جەكپە-جەك وتكىزسە) كوپشىلىكتىڭ وعان دەگەن پىكىرى وزگەرۋى مۇمكىن. Forbes نۇسقاسى بويىنشا ر4ر-ءدىڭ كوشباسشىسى ساۋل الۆارەس بۇل تىزىمدە ءۇشىنشى كەلە جاتقان قازاقستاندىق بوكسشىمەن كەزدەسۋدەن باس تارتقاندىقتان ودان جاسقانادى دەگەن وي قالىپتاسىپ كەتكەن. ال چاۆەسپەن ايقاسى مانسابىنىڭ ورلەۋىنە سەپتىگىن تيگىزەدى مە؟ ولاي ەمەس سياقتى. سەبەبى, بۇل كۇنى ونىڭ ءباسى جوعارى بولادى. بىراق كوبىرەك اقشا تابۋى ابدەن مۇمكىن. دەگەنمەن, PPV-ساتىلىمىندا باسەڭدەپ بارا جاتقانىن ايتا كەتكەن ءجون. (2015 جىلى قاراشادا ميگەل كوتتومەن وتكەن جەكپە-جەگى 900 مىڭ PPV, بىلتىر امير حانعا قارسى 600 مىڭ, ال وتكەن جىلدىڭ قىركۇيەگىندە وتكەن ليام سميتكە قارسى 300 مىڭداي عانا جينادى) ەندى وسى ولقىلىقتىڭ ورنىن تولتىرۋ ءۇشىن گولوۆكينمەن كەلىسسوزدەر وتكىزۋى ءتيىس. العاشىندا GGG مەن الۆارەس اراسىنداعى جەكپە-جەك 2016 جىلى ءوتۋى ءتيىس بولاتىن, الايدا مەكسيكالىق بوكسشى ورتا سالماقتاعى WBC بەلبەۋىنەن باس تارتىپ, ءبىرىنشى ورتا سالماققا اۋىسىپ كەتتى. ال بەلدىك تيىسىنشە قازاقستاندىققا بەرىلدى. بىراق قوس تاراپ ءالى دە بولسىن كەلىسسوزدەر وتكىزىپ جاتقانى الەمدىك باق بەتتەرىندە وسىعان دەيىن بىرنەشە مارتە جاريالانعان. ايتا كەتەيىك, گولوۆكين 18 ناۋرىز كۇنى نيۋ-يورك قالاسىنداعى Madison Square Garden ارەناسىندا امەريكالىق دەننيەل دجەيكوبسپەن (32-1, 29 كو) كۇش سىناسادى.