اۋىز سۋ حلورسىز تازارتىلادى

وركەنيەتتى ەلدەردە ءبىرىنشى كەزەكتە ادام دەنساۋلىعىنا, ءومىر ءسۇرۋ ساپاسىنا ەرەكشە ءمان بەرىلەدى. وزىق يننوۆاتسيالىق جوبالاردى وندىرىسكە كەڭىنەن ەنگىزۋدىڭ ارقاسىندا حلورلانباعان تىرشىلىك كوزىن پايدالانۋ تاجىريبەسىنىڭ كەڭىنەن قانات جايۋى دا سوندىقتان. ەندى وسى تەكتەس تەحنولوگيا ەلىمىز بويىنشا العاش رەت م.قوزىباەۆ اتىن­داعى سولتۇستىك قازاق­ستان مەملەكەتتىك ۋنيۆەر­سيتە­تىندە قولعا الىنعالى وتىر.  ىرگەلى وقۋ ورنىندا «تازا ەكولوگيالىق سۋ» يننوۆاتسيالىق باعدارلاماسىنىڭ تۇساۋكەسەر ءراسىمى ءوتىپ, وعان قاتىسقان ەكولوگتار, پروفەسسور-وقىتۋ­شىلىق قۇرام, تابيعات جاناشىرلارى رەسەيدىڭ توم پوليتەحنيكالىق ۋنيۆەر­سيتە­تىنىڭ عالىمدارى ۇسىنعان باعدارلامانىڭ ماڭىز­دى­لىعى مەن تيىمدىلىگىن اتاپ ءوتتى. جەرگىلىكتى جەردەگى جوبا جەتەكشىسى يرينا گولودوۆانىڭ ايتۋىنشا, ونى جۇزەگە اسىرۋعا 150 ميلليون تەڭگە ءبولىنىپ, ءتيىستى قۇجاتتار رەسىمدەۋگە جولدانىپتى. «قىزىلجار سۋ» جشس, قازسۋشار رەسپۋب­ليكا­لىق مەملە­كەتتىك كاسىپ­ورنى «ەسىل سۋ» فيليالى سەكىل­دى ىرگەلى كاسىپورىندار سۋ تازارتقىش قۇرالداردى پايدا­لانۋعا مۇددە­لىلىك تانىتىپ وتىر. ءوڭىر تۇرعىندارىن اۋىز سۋمەن قامتاماسىز ەتەتىن جالعىز تىرشىلىك كۇرەتامىرى – ەسىل وزەنىنىڭ بارعان سايىن لايلانىپ بارا جاتقانى, زياندى زاتتار كوپ تاستالاتىنى بەلگىلى. اسىرەسە, ءتۇرلى يوندار, اۋىر مەتال­دار, قىشقىلدار از كەز­دەسپەيدى. قار ەرىپ, ىلعال كوپ بولعان ۋاقىتتاردا سۋدى تازارتاتىن كواگۋليانتتاردى قولدانۋ مولشەرى كۇرت ۇلعايادى. مۇنىڭ ءوزى ادام دەنساۋلىعىنا كەرى اسەرىن تيگىزەرى ءسوزسىز. ال, بۇل پروتسەسس «اەروزون» سۋ تازارت­قىش كەشەنى ارقىلى اتقارىلسا, سۋدى حلورلاماي-اق زياندى زات­تار­دان ءجۇز پايىز ارىلتۋعا بولادى. سۋدىڭ ساپاسىن جاقسار­تاتىن قۇرىلعىلاردى جاساۋمەن كيروۆ اتىنداعى زاۋىت اينالىسادى. ءومىر ەسقالي, «ەگەمەن قازاقستان» سولتۇستىك قازاقستان وبلىسى