مۇمكىندىگى شەكتەۋلى جاندار جۇمىسپەن قامتىلدى

«نۇر وتان» پارتياسىنىڭ «كەدەرگىسىز كەلەشەك» جوباسى اياسىندا اقتوبە قالاسىنداعى بوس جۇمىس ورىندار جارمەڭكەسىنە تەك مۇمكىندىگى شەكتەۋلى ادامدار شاقىرىلدى. ءبىر كۇندە بارلىعى 40 مۇگەدەك جۇمىسقا ورنالاستى, دەپ حابارلايدى قازاقپارات. جارمەڭكەدە 24 مەكەمە 67 جۇمىس ورنىن ۇسىنعان. الدىن-الا شاقىرتۋ العان مۇمكىندىگى شەكتەۋلى جاندارعا ءبىلىم, دەنساۋلىق ساقتاۋ مەكەمەلەرىمەن قاتار, ءوندىرىس ورىندارىنان جۇمىس بەرىلدى. كوممۋنالدىق مەكەمەلەر دە وزدەرىنە قاجەتتى ماماندى ىزدەدى. مۇگەدەكتەرگە تىگىنشى, كۇزەتشى, ابونەنتتەردى باقىلاۋ, كومپيۋتەر باعدارلاماشىلارى سەكىلدى بىرنەشە جاۋاپتى جۇمىس ورىندارى ۇسىنىلدى. «جارمەڭكەگە 63 مۇگەدەك جان كەلدى. ولاردىڭ 32-ءسى تۇراقتى جۇمىسقا جولداما الىپ, سەگىز ادام قوعامدىق جۇمىسقا تارتىلدى. ءبىلىمىن جەتىلدىرۋ, جاڭا ماماندىق يگەرۋگە نيەت بىلدىرگەن ءۇش ادام قايتا دايارلاۋ كۋرسىنا جىبەرىلدى», – دەدى «نۇر وتان» پارتياسى اقتوبە وبلىستىق فيليالىنىڭ ساياسي ءبولىمىنىڭ مەڭگەرۋشىسى اقىلبەك ساحيەۆ. مۇگەدەكتەر اراسىندا كاسىپكەر بولىپ, شاعىن بيزنەستى قولعا الۋعا نيەت بىلدىرۋشىلەر دە بار. ولارعا شاعىن نەسيە الۋدىڭ جولدارى ءتۇسىندىرىلدى.