ءۇندىستان ازاماتى جازىقسىز 10 جىل تۇرمەدە وتىرعان

ءۇندىستاننىڭ ۋتتار-پرادەش شتاتى بيدجنور قالاسىنىڭ تۇرعىنى تۋعان باۋىرىنىڭ جاساعان قىلمىسى ءۇشىن 10 جىل تۇرمەدە وتىرىپ شىقتى, دەپ جازدى Times of India باسىلىمى. 43 جاستاعى بالا سينگح كەشە, 21 قاڭتار كۇنى بوستاندىققا شىقتى. بەلگىلى بولعانداي, پوليتسيا ونى كىسى ءولتىردى دەگەن كۇدىك تاڭىلعان تۋعان باۋىرى پاپپۋ سينگحپەن شاتاستىرىپ العان. «مەن جەكە باسىمدى كۋالاندىراتىن قۇجاتىم بولماعانى ءۇشىن 10 جىل ءومىرىمدى تەمىر توردىڭ ار جاعىندا وتكىزۋگە ءماجبۇر بولدىم», – دەدى بالا سينگح جۋرناليستەرگە بەرگەن سۇحباتىندا. ونىڭ ادىلەتسىزدىكپەن جاۋاپقا تارتىلۋىنا سەبەپ بولعان قىلمىس 2001 جىلى جاسالىپتى. ول كەزدە پوليتسيا 4 كۇدىكتىنى ۇستاعان ەكەن. ولاردىڭ اراسىندا اعايىندى سينگحتار بولعان. الايدا, بەلگىسىز سەبەپتەرمەن پاپپۋ جاۋاپكەرشىلىكتەن قۇتىلىپ كەتكەن. سوت تەز ارادا ءىستىڭ جابىلۋىن تالاپ ەتىپ, قىسىم كورسەتكەننەن كەيىن پوليتسيا 2006 جىلى بالانى پاپپۋ دەپ تانىپ, ونى باۋىرىنىڭ ورنىنا جاۋاپقا تارتقان. «بىزدە پاپپۋ سينگحتىڭ بۇدان بۇرىنعى ىسىنەن قالعان ساۋساق ىزدەرى ساقتالعان. وتكەن جىلى ونى بالانىڭ ساۋساق ىزدەرىمەن قوسىپ سوت-كريميناليستىك ساراپتاماعا جىبەردىك. سونىڭ ناتيجەسىندە پوليتسيانىڭ كۇدىكتىلەردى شاتاستىرىپ العانى انىقتالدى», – دەپ مالىمدەدى تۇزەتۋ مەكەمەسىنىڭ وكىلى س.ميشرا.