بەلگىلى قازاقستاندىق جاتتىقتىرۋشى بولات ەسماعامبەتوۆ گراناتكين مەموريالى تۋرنيرىندە قازاقستان جاستار قۇراماسى پەنالتي سەرياسىندا رەسەيدى جەڭەدى دەپ ۇمىتتەنەدى. بۇل تۋرالى vesti.kz حابارلادى.
«جىگىتتەر فينالعا دەيىن جەتكەن ەكەن ەندى بويلارىندا قورقىنىش سەزىمى بولماۋى ءتيىس. رەسەي وڭاي قارسىلاس ەمەس, الايدا جاستارىمىز ەۋروپانىڭ ازۋلى ۇجىمدارىن جەڭىپ وتىرعانىن ەستەن شىعارماۋ كەرەك. ەندى تەك ساتتىلىكتەر تىلەيمىز. بۇعان دەيىن ناعىز كوماندا ەكەندىكتەرىن دالەلدەي ءبىلدى. بۇل جولى جەڭىمپاز پەنالتي سەرياسى ارقىلى دا انىقتالىپ قالار. بالكىم, ءبىرىنشى سوققان كوماندا جەڭىسكە جەتەر. نە بولسا دا, ناعىز تەكە-تىرەستىڭ بولارى انىق. بىراق ۇلاندارىمىز ءبارىن جوسپار بويىنشا جۇزەگە اسىرادى دەپ ويلايمىن», – دەدى ول.
«شابۋىلشى ەركەبۇلان سەيداحمەتتى ەرەكشە اتاپ وتەر ەدىم. ونى پرەمەر-ليگاداعى كوماندالاردىڭ بىرىندە تالانتىن سىناپ كورۋگە بولاتىن سياقتى. دەر كەزىندە دوپتى تارتىپ الا بىلەدى. بار جاۋاپكەرشىلىكتى ءوز موينىنا الىپ, شەشۋشى گولدى سوعۋعا دا قابىلەتتى. سونداي-اق, ايدوس ورالدىڭ دا ويىنى كوڭىلىمنەن شىعىپ ءجۇر. تۋرنيردە ەكى دوپتىڭ اۆتورى اتاندى. قارسىلاسىنىڭ تەگەۋرىندى شابۋىلدارىن توقتاتا بىلەتىن قورعاۋشى دىنمۇحاممەد قاشكەن دە بار. جالپى, شابۋىلدا دا, قورعانىستا دا, جارتىلاي قورعانىستا دا كوشباسشى جىگىتتەر بار. كوماندانىڭ بار جۇگى نەگىزىنەن سولارعا ارتىلادى», – دەدى ەسماعامبەتوۆ.
ءتۋرنيردىڭ توپتىق كەزەڭىندەگى ويىندارىنان كەيىن دىنمۇحاممەد قاشكەن «استانا» كلۋبىمەن جاتتىققان. العاشىندا اۋىزشا كەلىسىم بولعانمەن, باپكەرلەر سەنىم ارتپاعان بولسا كەرەك, بۇل ءىس زاڭ جۇزىندە جۇزەگە اسپادى.
«كوماندا بۇعان دەيىن بيىكتەردەن كورىنبەگەننەن سوڭ تالانتىن دۇرىس باعالامادى دەپ ويلايمىن. تۋرنير كەزىندە ويىنشىنىڭ كوڭىلىن باسقا جايتپەن بولگەن دۇرىس ەمەس. گراناتكين مەموريالىنىڭ فينالىنا دەيىن جەتۋدىڭ قيىن ەكەندىگىن ەسكەرگەن ءجون. ونىڭ ۇستىنە قازىر «استانانىڭ» رەسمي ويىندارى جوق. مۇمكىن كەلەسى وقۋ-جاتتىعۋ جيىنىندا جاقسى قىرىنان كورىنىپ قالار», – دەدى ول.
ايتا كەتەيىك, اتالمىش جارىستىڭ فينالىندا قازاقستان قۇراماسى كورشىلەس رەسەيمەن سىنعا تۇسەدى. ماتچ 21 قاڭتار كۇنى استانا ۋاقىتى بويىنشا ساعات 22:00-دە وتەدى.
الەكساندر كۋزنەتسوۆتىڭ شاكىرتتەرى توپتىق كەزەڭدە سلوۆاكيامەن 0:0, ازەربايجانمەن 2:2 ەسەبىمەن تەڭ ويناسا, ليتۆادان 2:0 ەسەبىمەن باسىم ءتۇستى. شيرەك فينالدا سلوۆەنيانى 2:0, جارتىلاي فينالدا گرەكيانى 2:1 ەتىپ ۇتتى.
