ۋنيۆەرسيادادا الەم ەلدەرىنەن 3 مىڭ ەرىكتى جۇمىس ىستەيدى

الماتى اكىمى باۋىرجان بايبەك 2017 جىلعى 28-ءشى دۇنيەجۇزىلىك قىسقى ۋنيۆەرسيادانىڭ ەرىكتىلەرىمەن كەزدەستى. ستۋدەنتتىك ويىندار كەزىندە ءۇش مىڭ جاس اتلەتتەر اۋىلىندا, سپورت نىساندارىندا, ءتۇرلى فۋنكتسيونالدى ۋچاسكەلەردە ورنالاستىرۋ, اككرەديتاتسيالاۋ, كولىك, لوگيستيكا جانە باسقادا قىزمەت تۇرلەرىن اتقارۋعا كومەكتەسەدى, دەپ جازادى strategy2050.kz. قالا اكىمدىگى حابارلاعانداي, ەرىكتىلەرمەن جۇمىس ىستەۋ جونىندەگى دەپارتامەنت باسشىسى ابىلاي قوندىباەۆ ءوزىنىڭ سوزىندە جاستاردى ىرىكتەۋ كەزىندە 15 مىڭنان استام ءوتىنىش تۇسكەنىن, ولاردىڭ ىشىنەن الماتىنىڭ 15 جوعارى وقۋ ورىندارىنان 2800 ەرىكتىنىڭ تاڭدالعاندىعىن, ەلىمىزدىڭ وزگە وڭىرلەرىنەن 100 جاستىڭ, جاقىن جانە الىس شەتەلدەن 100 ەركىتىنىڭ قابىلدانعانىن ايتتى. رەسەيدىڭ, اقش-تىڭ, گەرمانيانىڭ, پولشانىڭ, كورەيا مەن قىتايدىڭ, ۇلىبريتانيانىڭ جانە باسقا دا ەلدەردىڭ ەرىكتىلەرى ۇلكەن قىزىعۋشىلىق بىلدىرگەن. ەرىكتىلەردى ىرىكتەۋ بارىسىندا ءىرى سپورتتىق شارالار وتكىزۋدە ەرىكتى رەتىندە مول تاجىريبە جيناقتاعان ءارى اعىلشىن مەن وزگە تىلدەردى ەركىن مەڭگەرگەن جاستارعا باسىمدىلىق بەرىلدى. ۋنيۆەرسيادا بارىسىندا ەرىكتىلەر 32 فۋنكتسيونالدى باعىت بويىنشا جۇمىس ىستەيدى. ارنايى توپ قوناقتاردى كۇتىپ الادى, ولاردى اتلەتتەر اۋىلىنا ورنالاستىرادى, قالانى ارالاتادى, سونىمەن قاتار تورەشىلەر مەن تەحنيكالىق قىزمەتكەرلەر ءۇشىن ارنايى اۋماقتار دايىندايدى. ەركىتىلەردىڭ بارلىعى ءوزىنىڭ جۇمىس باعىتتارىنا قاتىستى كوممۋنيكاتسيانى دامىتۋ, ءتىل ۇيرەنۋدى جاقسارتۋ سياقتى ارنايى ترەنينگتەردەن ءوتتى.