تىركەۋ ونلاين تۇردە قولجەتىمدى بولدى

ازاماتتاردى ۋاقىتشا تىركەۋ ۇدەرىستەرى كۇننەن-كۇنگە قاناتىن جايىپ, قارقىنىن ۇدەتىپ كەلەدى. بىراق تىركەلۋگە ءتيىستى بارلىق ازاماتتى از كۇندە تىركەپ شىعارۋ وڭاي ەمەس. وعان ءبىراز ۋاقىت كەرەك ەكەنى انىق. سوعان بايلانىستى دا ەلىمىزدىڭ حقو-لارىندا ازاماتتاردى تۇرعىلىقتى جەرى بويىنشا ۋاقىتشا تىركەۋدە ءتۇرلى ماسەلەلەر تۋىنداپ, قالىڭ كەزەك پايدا بولدى. بۇل ءتۇرلى كەلەڭسىزدىكتەرگە دە سوقتىردى. مىنە, قازىر وسى ماسەلەنىڭ دە شەشىمى تابىلىپ وتىر. ەندى قالىڭ كەزەك قاپتاعان حقو-لارعا بارماي-اق تىركەلۋدى جۇزەگە اسىرۋعا بولادى. بۇعان دالەل بۇگىنگى كۇنى قازاقستاننىڭ ەلەكتروندىق ۇكىمەتى پورتالىندا eGov.kz ازاماتتاردىڭ تۇرعىلىقتى جەرى بويىنشا ۋاقىتشا تىركەلۋ قىزمەتى قولجەتىمدى. بۇل تۋرالى اتالعان پورتال­دا حابارلانىپ وتىر. مۇندا بۇل قىزمەت ءتۇرىن پايدالانۋ ءۇشىن, الدىمەن تۇرعىن ءۇي يەسى مەن وندا تىركەلۋ نيەتىن بىلدىرگەن ازاماتتاردا ەلەكتروندىق تسيفرلىق قولتاڭبا (ەتسق) بولۋى جانە ولاردىڭ پورتالدا اۆتور­لان­دىرۋدان ءوتۋى قاجەتتىگى ايتىلادى. ال قىزمەتتىڭ ءوزى «ازاماتتىق, ميگراتسيا جانە يمميگراتسيا» بولىمىندە, «حالىقتى تىركەۋ جانە تىركەۋ ەسەبىنەن الىپ تاستاۋ» قوسىمشا پاراعىندا قولجەتىمدى ەكەن. بۇدان سوڭ «ونلاين قىزمەتىنە تاپسى­رىس بەرۋ» تۇيمەشەگىن باسقاننان كەيىن, ءوتىنىش بەرۋشى ۇسىنىلعان نىسان­دى تولتىرادى, وندا تىركەلۋگە نيەتتى تۇر­عىن ءۇيدىڭ مەنشىك يەسى بولىپ تابى­لا­تىنىن نەمەسە تابىلمايتىنىن كورسەتۋى ءتيىس. ەگەر دە ءوتىنىش بەرۋشى جىلجىمايتىن م ۇلىك يەسى بولسا, ول مەكەنجايدى, تىركەلۋ مەرزىمىن (1 ايدان 12 ايعا دەيىن) كورسەتۋى ءتيىس, سودان سوڭ ونلاين تۇردە كورسەتىلگەن قىزمەت ءۇشىن مەملەكەتتىك باجدى تولەپ جانە ەتسق وتىنىمگە قول قويۋى كەرەك. تۇرعىن ءۇيدىڭ مەنشىك يەسى ءۇشىنشى تاراپ بولعان جاعدايدا, ءوتىنىش بەرۋشى مەنشىك يەسىنىڭ جسن-ىن, جىلجىمايتىن م ۇلىكتىڭ مەكەنجايىن, ۋاقىتشا تىركەلۋدىڭ مەرزىمىن كورسەتۋى جانە مەنشىك يەسىنىڭ جەكە كابينەتىنە كەلىپ تۇسەتىن سۇراۋ سالۋدى جىبەرۋى قاجەت. ەگەر دە تۇرعىن ءۇيدىڭ بىرنەشە مەنشىك يەسى بولسا, ولاردىڭ بىرەۋىنىڭ عانا دەرەكتەرىن كورسەتۋ جەتكىلىكتى, قالعاندارى جۇيەمەن قازاقستان رەسپۋبليكاسى «جىلجىمايتىن م ۇلىك تىركەلىمى» مەملەكەتتىك دەرەكتەر قورى ارقىلى اۆتوماتتى تۇردە انىقتالاتىن بولادى. مەنشىك يەسى (بىرەۋ نەمەسە بىرنەشەۋ) ءوزىنىڭ كەلىسىمىن ەتسق ارقىلى راستايدى, ودان سوڭ ءوتىنىم تىركەلۋگە نيەتتى ازاماتتىڭ جەكە كابينەتىنە ورالىپ كەلەدى. وعان مەملەكەتتىك باج تولەمىن ونلاين تۇردە جۇرگىزىپ جانە دە ءوزىنىڭ سۇراۋ سالۋىنا ەتسق قول قويۋى قاجەت. وسىدان كەيىن, ءوتىنىم قازاقستان رەسپۋبليكاسى ىشكى ىستەر مينيسترلىگىنىڭ جۇيەسىنە تۇسەدى, ونىڭ وڭدەلۋىنە 10 مينۋتتاي عانا ۋاقىت كەتەدى. وڭدەلىپ بولعان سوڭ, پورتالدا «ۋاقىتشا مەكەن­جايدىڭ تىركەلۋى ءساتتى تۇردە ءوتتى» دەگەن مارتەبە كورسەتىلەدى. مەكەنجاي انىق­تاماسىن الا وتىرىپ, ۋاقىتشا تىركەلۋ مەكەنجايىن تەكسەرۋگە بولادى. eGov.kz نەمەسە حقو ارقىلى ۋاقىت­شا تىركەلۋ جونىندەگى بارلىق سۇراق­تار بويىنشا ازاماتتار تەگىن, تاۋلىك بويى جۇمىس ىستەيتىن بىرىڭعاي بايلانىس ورتالىعىنىڭ 1414 نومىرىنە قوڭىراۋ شالا الادى. وسىلايشا بارىنشا ساپالى جانە جىلدام قىزمەت كورسەتۋدى قامتاماسىز ەتۋ ماقساتىندا بىرىڭعاي بايلانىس ورتالىعىندا اعىمداعى جىلدىڭ باسىنان بەرى وپەراتورلار سانى كوبەيتىلىپ, ولاردىڭ جۇمىس كەستەسى قايتا قارالعان. الەكساندر تاسبولاتوۆ, «ەگەمەن قازاقستان»