قازاقستاننىڭ جاس ونەرتاپقىشتارى اشقان جاڭالىقتار

17 قاڭتاردا الەم بويىنشا ونەرتاپقىش بالالار اشقان جاڭالىقتار كۇنى اتالىپ وتىلەدى. بۇل تۋرالى Bnews.kz جازادى. وسى رەتتە قازاقستاندىق جاس ونەرتاپقىشتاردىڭ اشقان جاڭالىقتارىن نازارلارىڭىزعا ۇسىنامىز. 1. دياگنوستيكاعا ارنالعان مەديتسينالىق اپپارات 2013 جىلى الماتى قالاسىنداعى دارىندى بالالارعا ارنالعان №10 مەكتەپ-ينتەرناتىنىڭ 11-سىنىپ وقۋشىسى حاكىم سادۋاقاس «لاماباتەل» اتتى ءموبيلدى اپپارات ويلاپ تاپتى. مەديتسينالىق قۇرىلعى دياگنوستيكا مەن تەراپيادا ءتورت ءتۇرلى قىزمەت اتقارادى: لازەروتەراپيا, ماگنيتوتەراپيا, بيولوگيالىق بەلسەندى نۇكتەلەردى تابۋ مەن ەلەكتروماسساج. قۇرىلعى ەلەكتر قۋاتىمەن دە, اككۋمۋلياتورمەن دە, قاراپايىم باتارەيامەن دە جۇمىس ىستەيدى. 2. ايدى زەرتتەۋگە ارنالعان زەرتحانا 2013 جىلى قوستاناي وبلىسى نوۆوترويتسك اۋىلىنىڭ كىشكەنتاي تۇرعىنى ولەگ ليلو "اي" اتتى زەرتحانا جاسادى. سەگىز جاسار عالىمنىڭ ايتۋىنشا, ايدىڭ بەتىندەگى جاعدايدى انىق كورۋگە بولادى. قۇرىلعىنىڭ كامەراسى, لازەرى بار. ولەگتىڭ جاڭالىعى استانادا وتكەن عىلىمي-تەحنيكالىق فورۋمدا "اەروعارىشتىق تەحنيكا, اۆياتسيا جانە عارىش ءىسى" نوميناتسياسى بويىنشا ءبىرىنشى ورىن الدى. 3. زاعيپتارعا ارنالعان روبوت سەمەي قالاسىنداعى جەتىنشى سىنىپ وقۋشىسى ۆيكتور حەگاي زاعيپ ادامداردىڭ قوزعالۋىنا كومەكتەسەتىن روبوت ويلاپ تاپتى. روبوتتاعى سەنسور الدىنان كەدەرگى كەزدەسكەندە يەسىنە بەلگىلى ءبىر دىبىس بەرەدى. سالماعى 200 گراممدىق بۇل قۇرىلعى كيىمگە نەمەسە باس كيىمنىڭ الدىنا تاعىلادى. 4. ەلەكتر قۋاتىنسىز قۋاتتاعىش قاراعاندىلىق وقۋشى الديار بوجبانوۆ تەك قانا بۇلشىق ەت كومەگىمەن جۇمىس ىستەيتىن قۋاتتاعىش قۇرىلعى ويلاپ تاپتى. 5. جاساندى بال استانالىق ونىنشى سىنىپ وقۋشىسى تەمىرلان ءنابي جاساندى بال ويلاپ تاپتى. جاساندى بال تۇماۋعا قارسى ەم جانە اللەرگيا شىعارمايدى. ونىڭ قۇرامىنا سۋ, قانت, ليمون قىشقىلى مەن ازداعان ەفير مايى كىرەدى. ال ءدامى جاعىنان مەنتولعا ۇقسايدى. 6. "اقىلدى" كيىز ءۇي

استانا قالاسىنداعى نازارباەۆ زياتكەرلىك مەكتەبىنىڭ وقۋشىسى قازبەك توقتاروۆ ءوزىنىڭ ەڭبەگىن ەكسپو-2017 كورمەسىنە شىعارادى. "اقىلدى" كيىز ءۇي كۇن باتارەياسىمەن جۇمىس ىستەيدى.