گولوۆكين: الۆارەستىڭ ىسىنەن ءسوزى كوپ

WBA (Super), IBO, WBC جانە IBF تۇجىرىمدارى بويىنشا ورتا سالماقتا الەم چەمپيونى گەننادي گولوۆكين (36-0, 33 كو) لوس-اندجەلەستە جۋرناليستەرگە بەرگەن سۇحباتىندا 2016 جىلى بوكسقا دەگەن قۇشتارلىعى باسىلىپ قالعانىن مالىمدەدى. بۇل تۋرالى vesti.kz حابارلادى. «2016 جىلى شىنىمەن دە بوكسقا دەگەن قۇشتارلىعىم باسىلىپ قالدى. تۇسىنەسىز بە, مەنىڭ اتىمدى اتاپ, جەكپە-جەككە شاقىرعاندار كوپ بولعانمەن, ءىس جۇزىندە ەشكىم كىرىسپەيدى. ءتىپتى بۇعان دايىن دا ەمەس. «كانەلو», سوندەرس, فروچ, يۋبەنك, چاۆەس. اقىلعا قونىمسىز. سوزدەرى مەن ىستەرى ساي كەلمەيدى», – دەدى GGG. «بىراق ەندى وزىمە ناعىز قارسىلاستى تاپقان سياقتىمىن. دجەيكوبستىڭ سۇحباتتارى مەنى جىگەرلەندىرە تۇسەدى. الۆارەس؟ مۇمكىن بولاشاقتا كەزدەسىپ قالارمىز, ال قازىرگى ۋاقىتتا بۇعان ەشقانداي قىزىعۋشىلىعىم جوق», – دەدى گولوۆكين. ايتا كەتەيىك, قازاقستاندىق بوكسشىمەن مەكسيكالىق ساۋل الۆارەستىڭ اراسىنداعى ايقاس 2016 جىلى ءوتۋى ءتيىس ەدى. بىراق مامىر ايىندا «كانەلو» مىندەتتى جەكپە-جەكتەن باس تارتقاننان كەيىن ونىڭ WBC بەلبەۋى گەنناديگە بەرىلگەن بولاتىن. ال 18 ناۋرىزدا نيۋ-يورك قالاسىنداعى Madison Square Garden ارەناسىندا امەريكالىق دەننيەل دجەيكوبسپەن جۇدىرىقتاسادى.