SPL
جانۋارلارعا جاسالعان سىناق ناتيجەسىندە قاتەرلى ىسىكتىڭ دەنەگە تاراۋ كورسەتكىشى تورتتەن ۇشكە ازايدى. بۇل تۋرالى BBC باسىلىمى Nature جۋرنالىندا جاريالانعان زەرتتەۋ ناتيجەلەرىنە سىلتەمە جاساپ حابارلادى. بۇل سىرقاتتان كوز جۇماتىنداردىڭ ولىمىنە 90 پايىز جاعدايدا ىسىكتىڭ اعزاعا جايىلۋى سەبەپ بولادى. جاڭا زەرتتەۋلەر تىشقانداردىڭ يممۋندىق جۇيەسىنە ەنگىزىلگەن وزگەرىستەر قاتەرلى ىسىك اۋرۋىنىڭ وكپەدە تاراۋىن باسەڭدەتكەن. بريتانيا قاتەرلى ىسىك زەرتتەۋ ينستيتۋتى ەرتەرەكتە جاسالعان زەرتتەۋدىڭ قورىتىندىسىمەن ءبولىسىپ, قاتەرلى ىسىكتىڭ قالاي تارايتىنى مەن ونىڭ ەمى تۋرالى تىڭ مالىمەتتەر ۇسىندى. قاتەرلى ىسىكتىڭ تاراۋى عىلىمدا "مەتاستازا" دەپ اتالادى. قاراپايىم تىلمەن ايتساق, مەتاستازا دەگەنىمىز تەز تارالىپ جاتقان ىسىك پەن اعزا اراسىنداعى كۇرەس. كەمبريدج سانگەر ينستيتۋتى عالىمدارى ىسىكتىڭ دەنەگە تاراۋىنا نە تۇرتكى بولاتىنىنا زەرتتەۋ جاساعان. ولار قاتەرلى ىسىكتىڭ تارالۋىنا قارسى كۇرەسكە قانداي دنق-لار قاتىساتىنىن ءبىلۋ ءۇشىن گەنەتيكالىق تۇرلەندىرىلگەن 810 تىشقاندى سىناققا العان. الدىمەن عالىمدار تىشقاندارعا تەرى ىسىك اۋرۋىن ەگىپ, سودان سوڭ ىسىك اۋرۋىنىڭ ولاردىڭ وكپەسىنە تارالۋىن باقىلادى. ناتيجەسىندە, سىناق تىشقانداردىڭ كوپشىلىگىنىڭ يممۋندىق جۇيەسى مىقتىلىعىن بايقاتىپ, Spns2 اتالاتىن ءبىر گەن تەرىدەگى ىسىك اۋرۋىنىڭ وكپەگە ءوتۋ مۇمكىندىگىن تورتتەن ۇشكە دەيىن قىسقارتقان. "بۇل وكپەدەگى يممۋندىق جۇيەنىڭ كۇشتىلىگىنەن," - دەيدى زەرتتەۋ توبىنىڭ مۇشەسى دوكتور دەۆيد ادامس. - كەي اعزالاردا يممۋندىق جۇيە قاتەرلى ىسىك اۋرۋىنان باسىم تۇسەدى». كەي ادامداردا ءدارى-دارمەك ىسىك اۋرۋىن ەمدەۋدە السىزدىك تانىتىپ جاتقانىمەن, كەي اعزالاردا قاتەرلى ىسىك اۋرۋى وزىنەن ءوزى جوعالىپ كەتىپ جاتاتىن كورىنەدى. بريتانيا قاتەرلى ىسىك اۋرۋىن زەرتتەۋ ورتالىعى مامانى دوكتور دجاستين الفوردتىڭ ايتۋىنشا, جوعارىدا اتالعان زەرتتەۋ الداعى ۋاقىتتا قاتەرلى ىسىكتى ەمدەۋ جولىن كورسەتە الادى.
