ەرلىكتىڭ ەسكەرتكىشى قاشاندا ەڭسەلى

اقتوبەدە وتكەن جىلعى 5 ماۋسىمدا اسكەري بولىمگە قارۋلى قىلمىسكەرلەردىڭ شابۋىلى كەزىندە ەرلىكپەن قازا تاپقان اسكەري قىزمەتشىلەرگە ارنالعان مەموريالدىق تاقتا اشىلدى. ۇلتتىق ۇلاننىڭ قۇرىلۋىنا 25 جىل تولۋىنا وراي «باتىس» وڭىرلىك قولباسشىلىعىنا قاراستى №6655 اسكەري ءبولىمىنىڭ اۋماعىندا قارۋلى قىلمىسكەرلەردىڭ شابۋىلى كەزىندە ەرلىكپەن قازا تاپقان اسكەري قىزمەتكەرلەردى  ەسكە الۋ شاراسى وتكىزىلدى. مەموريالدىق تاقتانىڭ سالتاناتتى اشىلۋ راسىمىنە وبلىس اكىمى بەردىبەك ساپارباەۆ, وڭىردە جۇمىس ساپارىمەن جۇرگەن پارلامەنت دەپۋتاتتارى ۆلاديمير بوجكو, ەلەۋسىن ساعىندىقوۆ, اباي تاسبولاتوۆ, باقتىقوجا ىزمۇحامبەتوۆ, گلەب ششەگەلسكي, جامبىل احمەتبەكوۆ, قۇرالاي قاراكەن, cوعىس جانە ىشكى اسكەر ار­داگەرلەرى, قۇقىق قورعاۋ ورگاندارىنىڭ قىز­­مەتكەرلەرى, سونداي-اق, قازا بولعان سار­بازداردىڭ اتا-انالارى مەن تۋىستارى قاتىستى. وبلىس اكىمى مەملەكەتىمىز جاڭا قۇ­رىل­عان كەزدە ەلباسى قارۋلى كۇشتەردى, سو­نىڭ ىشىندە بۇرىنعى  ىشكى اسكەرلەر, قازىرگى ۇلتتىق ۇلاندى  قۇرۋ تۋرالى ماڭىزدى شەشىم قابىلداعانىن اتاپ ءوتتى. قازاقستان تاۋەلسىز مەملەكەت بولىپ جاريالانعان سوڭ, 1992 جىلى 10 قاڭتاردا العاشقى بولىپ  قۇقىقتىق ءتارتىپ اسكەرى قۇرىلعانىن جەتكىزدى. – بۇگىن ءبىز ءومىرىنىڭ سوڭىنا دەيىن وتان الدىنداعى انتىن ادال ورىنداعان,  ەلىمىز تۇرعىندارىنىڭ قاۋىپسىزدىگىن قامتاماسىز ەتكەن باتىرلاردىڭ قۇرمەتىنە ارنالعان  ەسكەرتكىش تاقتانى اشىپ وتىرمىز. بۇل ءبىزدىڭ قازا تاپقاندارعا كورسەتەتىن قۇرمەتىمىزدىڭ باسى عانا بولسىن, – دەدى ءوز سوزىندە پارلامەنت ءماجىلىسى توراعاسىنىڭ ورىنباسارى ۆلاديمير بوجكو. مەموريالدىق تاقتانىڭ اشىلۋ ءرا­سى­مىن­دە قازا تاپقانداردىڭ اتا-انالارى مەن جا­قىن تۋىستارى دا ءسوز سويلەدى. ايتا كەتەيىك, 2016 جىلدىڭ 5 ماۋسىمىندا 18 ادامنان قۇرالعان لاڭكەستىك توپ اقتوبە قالاسىنىڭ ەكى قارۋ-جاراق دۇكەنىنە شابۋىل جاساپ, اسكەري ءبولىمنىڭ اۋماعىندا ورنالاسقان قارۋ-جاراق قويماسىن باسىپ الۋعا ۇمتىلعان بولاتىن. وقىستان شابۋىلداعان قارۋلى قىلمىسكەرلەرگە قايمىقپاي توتەپ بەرگەن ۇقك «باتىس» وڭىرلىك قولباسشىلىعىنىڭ مايورى دانيەل مايلىباەۆ, كەلىسىمشارت نەگىزىندەگى اسكەري قىزمەتكەر, كىشى سەرجانت بەرىكجان قاليەۆ, مەرزىمدى قىزمەتتەگى سارباز دوسبول ساپار ەرلىكپەن قازا تاپتى. قازاقستان پرەزيدەنتىنىڭ 2016 جىلعى 5 جەلتوقسانداعى №382 جارلىعىمەن «اسكەري جانە قىزمەتتىك بورىشىن ۇلگىلى ات­قارعانى, زاڭدىلىق پەن قۇقىقتىق ءتار­تىپتى قامتاماسىز ەتۋدە, ەلدىڭ ۇلتتىق قا­ۋىپ­سىزدىگى مەن قورعانىس قابىلەتىن نىعايتۋ كە­زىندە كورسەتكەن ەرلىگى مەن قاجىرلىعى ءۇشىن» مايور دانيەل مايلىباەۆ ءىى دارەجەلى «ايبىن» وردەنىمەن ماراپاتتالىپ (قازا بولعاننان كەيىن), «پودپولكوۆنيك» اسكەري اتاعى بەرىلدى, كىشى سەرجانت بەرىكجان قاليەۆ پەن قاتارداعى جاۋىنگەر دوسبول ساپار (قازا بولعاننان كەيىن) ءىىى دارەجەلى «ايبىن» وردەنىمەن ماراپاتتالدى. سونىمەن قاتار, ءىىى دارەجەلى «ايبىن» ور­دەنىمەن باقتيار قايىربەكوۆ, «جاۋىن­گەر­لىك ەرلىگى ءۇشىن» مەدالىمەن سىرىم ءسۇن­دەتوۆ, دەنيس چەرنىشوۆ ماراپاتتال­دى. ساتىبالدى ءساۋىرباي, «ەگەمەن قازاقستان» اقتوبە سۋرەتتى تۇسىرگەن حايرەدەن راۋشانوۆ