قۋاتتى قارۋلى كۇشتەر – مەملەكەتتىڭ مىزعىماس قالقانى

ەلىمىز شەكاراسىنا جاقىن ماڭداعى ەلدەردەگى سوعىس قيمىلدارىنىڭ جۇرگىزىلىپ جاتۋى الاڭداتپاي قويمايدى. بۇل, ءوز كەزەگىندە, قانداي دا بولسىن قاۋىپ-قاتەرلەردىڭ الدىن الۋعا قاجەتتى شارالاردىڭ جان-جاقتى پىسىقتالۋىن تالاپ ەتەدى. سوڭعى جىلدارى قازاقستان رەسپۋبليكاسى قارۋلى كۇشتەرىندە ايتارلىقتاي وڭدى وزگەرىستەردىڭ ءجۇرۋى وسى جاعدايمەن دە ۇندەسىپ جاتىر. اسكەري وقۋ-جاتتىعۋلاردىڭ ءجيى وتكىزىلىپ تۇرۋى ەلىمىز اسكەر تۇرلەرى مەن تەكتەرىنىڭ بارلىق جەكە قۇرامىنىڭ كەز كەلگەن جاعدايعا دايىن بو­لۋىن ۇشتاي تۇسەدى. الىسقا بارماي-اق, وتكەن جىل­دىڭ 9 جەلتوقسانىنداعى كەشەندى تاكتيكالىق-ساپ­تىق جاتتىعۋلاردى وتكىزۋ شەڭبەرىندە قازاقستان رەس­پۋبليكاسى قارۋلى كۇشتەرى جاۋىنگەرلىك ازىرلىكتىڭ جوعارى دارەجەسىنە كەلتىرىلۋىن ەرەكشە اتاپ كەتۋگە بولادى. دابىل بويىنشا قورعانىس مينيسترلىگى ورتالىق اپپاراتى قۇرىلىمدىق بولىمشەلەرىنىڭ, وڭىرلىك اسكەرلەرى, جالپى قارۋلى كۇشتەردىڭ بارلىق اسكەري تۇرلەرى مەن تەكتەرىنىڭ جەكە قۇرامدارى كوتەرىلدى. جالپى, جىل سايىن اسكەرلەر وزدەرىنىڭ دايىندىعىن وسىلايشا شىڭداپ كەلەدى. ول وقۋ-جاتتىعۋلاردا قۇرلىق اسكەرلەرى بولىمشەلەرىنىڭ قۇرىلۋ اۋداندارىنا شىعۋى, بارلىق اۆياتسيالىق تەحنيكادا قوزعالتقىشتاردىڭ ىسكە قوسىلۋى, اسكەري-تەڭىز كۇشتەرىندە كەمەلەردىڭ اۋداندارعا شوعىرلانۋى سياقتى تاكتيكالىق ءىس-قيمىلدار جان-جاقتى پىسىقتالادى. سول وقۋ-جاتتىعۋلار بارىسى كورسەتىپ جۇرگەندەي, قازىرگى تاڭدا ەل اسكەرىنىڭ دايارلىعى جوعارى دەڭگەيدە. قازاقستان پرەزيدەنتى – قارۋلى كۇشتەردىڭ جوعارعى باس قولباسشىسى ن.ءا.نازارباەۆ بۇل رەتتە بىلاي دەگەن ەدى: «بۇگىن ەلىمىزدىڭ قارۋلى كۇشتەرىنىڭ ءبىرتۇتاس جۇيەسىن قۇرايتىن زاماناۋي, سانى جاعىنان جيناقى, جاقسى جابدىقتالعان جانە ۇرىسقا قابىلەتتى قۇرلىق اسكەرلەرى, اۋە قورعانىسى كۇشتەرى مەن اسكەري-تەڭىز كۇشتەرى قۇرىلدى». ايتسا ايتقانداي, ەلىمىزدىڭ قازىرگى قارۋلى كۇشتەرى كەز كەلگەن سىرتقى اگرەسسسياعا جاۋاپ بەرە الاتىنداي دارەجەدە دەسەك, قاتەلەسپەيمىز. ەلىمىز وقۋ-جاتتىعۋلاردى وتكىزىپ قانا قويماي, سونىمەن قاتار, اسكەري تەحنيكالاردى ساتىپ الۋ, ينفراقۇرىلىمداردى جونگە كەلتىرۋ جانە اسكەري قىزمەتكەرلەردىڭ الەۋمەتتىك ماسەلەلەرى سياقتى وزەكتى جايتتاردى دا رەتىمەن شەشىپ كەلەدى. جاقىندا قورعانىس ءمينيسترى گەنەرال-پولكوۆنيك ساكەن جاسۇزاقوۆ اقتاۋعا ارنايى باردى. وندا مينيستر اسكەري-تەڭىز كۇشتەرى كەمەلەرىنىڭ ورنالاسۋىنا قاجەتتى ءپيرستىڭ سالتاناتتى اشىلۋىنا قاتىستى. بۇل اسكەري ءپيرستىڭ قاجەتتىگى سوندا, كاسپي تەڭىزىنىڭ قازاقستاندىق سەكتورىندا ورىن الۋى ىقتيمال دەگەن قاۋىپ-قاتەرلەرگە قارسى دەر كەزىندە جانە ۇتىمدى ارەكەت ەتۋگە مۇمكىندىك بەرەدى. سونداي-اق, ماتەريالدىق-تەحنيكالىق جاراق­تان­دىرۋدىڭ بارلىق تۇرلەرىمەن قامتاماسىز ەتىپ قانا قويماي, كەمەلەردىڭ شوعىرلانۋ اۋداندارىنا شىعۋىن جەدەل ءارى وڭتايلى شەشۋگە وڭ ىقپال ەتەدى. «جەتكىلىكتى ينفراقۇرىلىمى بار جەكە ءپيرستىڭ قۇرىلۋى قازاقستان اسكەري-تەڭىز كۇشتەرىنىڭ كەمەلەرىن تەحنيكالىق ازىرلىكتە ۇستاۋ, قويىلعان تاپسىرمالاردى شەشۋ كەزىندە قىسقا مەرزىمدە ولاردىڭ جاۋىنگەرلىك قابىلەتتىلىگىن ساقتاۋ جانە قالپىنا كەلتىرۋ ءۇشىن اسا ماڭىزدى جاعداي بولىپ تابىلادى», دەدى قورعانىس ۆەدومستۆوسىنىڭ باسشىسى. بۇدان باسقا, «KADEX-2016» IV حالىقارالىق كورمەسىندە «ۆەرتولەتى روسسي» اق, «قازاقستان ينجينيرينگ» ۇك» اق جانە «اۆيارەمونتنىي زاۆود №405» اق اراسىندا قول قويىلعان سوڭ قازاقستاندا تىكۇشاق تەحنيكالارىنا قىزمەت كورسەتۋ ءوز ناتيجەسىن بەرە باستاعانىن ورنىمەن ايتا كەتۋ كەرەك. سونىمەن قاتار, «قازاقستان ينجينيرينگ» ۇك» اق-تىڭ قۇرا­مىنا كىرەتىن قازاقستاندىق «گيدروپريبور» عزي» العاش رەت اسكەري-تەڭىز كۇشتەرىنىڭ ارنايى ماقسات­تاعى بولىمشەلەرىنە ءموبيلدى سۇڭگۋىر كەشەنىن جەت­كىزىپ بەرۋدى قولعا العاندىعىن دا اتاپ كورسەتكەن ءجون. بۇل كەشەن اسكەري-تەڭىز كۇشتەرى بولىمشەلەرىنىڭ جا­ۋىن­گەرلىك ازىرلىگى مەن  قابىلەتتىلىگىن ارتتىرۋى ءتيىس. قازاقستاننىڭ قارۋلى كۇشتەرىندە «س.م.كيروۆ اتىنداعى زاۋىت» اق-تىڭ ماماندارى ازىرلەگەن قۋاتتىلىعى ورتاشا «قاراعاي» راديوستانساسى مەن «اقتەرەك» راديورەلەلىك ستانساسى سىناقتان ءساتتى وتكەن بولاتىن. «كازاحستان اسەلسان ينجينيرينگ» جشس «ارميا-2016» حالىقارالىق اسكەري-تەحنيكالىق كورمەسىندە تۇندە كوزدەۋ قۇرىلعىسىن, تەپلوۆيزيالىق جۇيە, تۇراقتاندىرىلعان الىستان باسقارىلاتىن اسكەري مودۋل سياقتى ونىمدەرىن جاريا ەتكەن-ءتىن. جانە دە قازاقستاندىق «كازاحستان پاراماۋنت ينجينيرينگ» كومپانياسى دوڭعالاقتى «ارلان» بروندى ماشيناسىن كوپشىلىك نازارىنا ۇسىندى. سول سياقتى «Zhasampaz» كونسورتسيۋمى كوپشىلىك نازارىنا «تىنىس» اق زاۋىتىنىڭ بروندى كەۋدەشەلەرىن, قازاقستاندىق اسكەري باس كيىم مەن كيىم-كەشەگىن كورسەتتى. قازىرگى كەزدە قازاقستان زاۋىتتارىندا كەمە جاساۋ ءىسى جولعا قويىلعان. قازاقستان اسكەريلەرىنە ارنالعان قۇرال-جابدىقتار مەن تەحنيكا تۇرلەرىن سىرتتان ساتىپ الۋ دا وڭدى شەشىم دەپ بىلەمىن. ويتكەنى, اسكەردىڭ بارىنشا ۇتقىر قيمىلداۋى, دەر كەزىندە ارەكەت ەتە الۋى كوبىنەسە اسكەري تەحنيكالار مەن قۇرال-جابدىقتاردىڭ جەتىلگەندىگىندە ەكەنى داۋسىز. وسىلايشا, قازاقستان قارۋلى كۇشتەرى جىلدان-جىلعا ءوزىنىڭ كاسىبي دايىندىعىن ارتتىرىپ كەلەدى. اسىرەسە, اسكەري كادرلارىن الەمنىڭ ۇزدىك وقۋ ورىندارىندا جانە وتاندىق ءبىلىم وشاقتارىندا وقىتۋ جولعا قويىلعان. اسكەري سالاداعى كاسىپورىندار سانىن كوبەيتىپ وتىرعاندىعىن جوعارىدا ايتتىق. ولاي بولسا, وتكەن جىلى قازاقستاندىق اسكەريلەر ءبىر ساتى بولسا دا العا قادام باستى. وتاندى قورعاۋ وڭاي ءىس ەمەستىگىن قاپەرگە الساق, بۇل جەتىستىكتەردىڭ بارلىعى مەملەكەتتىڭ مىزعىماستىعىن جانە ايبىنىن پاش ەتەدى. قايرات جاڭابەرگەنوۆ, زاپاستاعى پولكوۆنيك, اۋعان سوعىسىنىڭ ارداگەرى