قادىر مىرزا ءالى تۋرالى دەرەكتى فيلم

بۇگىنگى كۇنى قادىر مىرزا ءالى ابايدان كەيىنگى ەڭ كوپ وقىلاتىن اقىن دەگەن پىكىرلەر ايتىلىپ قالىپ ءجۇر. ونى شىندىقتىڭ اۋى­لى­نان الىس دەۋگە بولمايدى. ويتكەنى, اقىن­نىڭ ءار ادامنىڭ كوكىرەگىنە بىردەن جات­تالىپ قالاتىن ولەڭ جولدارى مەن ۇلاعاتتى سوزدەرى جانە ايشىقتى افوريزمدەرى قازاقتىڭ كەڭ­بايتاق دالاسىن ارالاپ كەتكەلى قاشان. وسى ورايدا قايتالانباس ءسوز زەرگەرى ءابىش كەكىلباەۆ بيىك باعانى بۇدان ەكى-ءۇش جىل بۇرىن ورال قالاسىندا, قادىر مىرزا ءالىنىڭ ەسكەرتكىشى اشىلۋ ءراسىمى كەزىندە بەرگەنىن دە ايتا كەتۋگە بولادى. بۇدان ءارى ول ءوز ويىن قادىردى ءالى ءارىپ تانىماعان بالدىرعاننان باستاپ, ءارىپتى كوزىلدىرىكسىز كورە المايتىن قاريالارعا دەيىن بىلەدى. ءوزىن بىلمەسە دە, ءسوزىن بىلەدى. مۇنداي داۋسىز داڭق, تاتاۋسىز تانىمالدىقتىڭ سىرى – قادىر تالانتىنىڭ قاراپايىمدىلىعىندا دەپ, جالعاستىرىپ اكەتكەنى دە ۇمىتىلا قويعان جوق. قاڭتاردا دۇنيەگە كەلىپ, قاڭتاردا دۇنيەدەن وتكەن قادىر مىرزا ءالىنىڭ ەسىمى قاشاندا حالىقتىڭ جادىندا. بۇگىنگى كۇنى اقىن جونىندە «ماڭگىلىك مايدان ساربازى» اتتى دەرەكتى-عۇمىرنامالىق ءفيلمنىڭ كورەرمەندەرگە جول تارتۋى دا وسى پىكىرىمىزدىڭ ءبىر دالەلى. ونى شاكەن ايمانوۆ اتىنداعى «قازاقفيلم» كينوستۋدياسى تۇسىرگەن. بۇل ارادا اتالعان كينوستۋديانىڭ دەرەكتى فيلمدەر جونىندەگى رەجيسسەرى ورال ءجۇنىسوۆتىڭ ەرەكشە ەڭبەگىن اتاپ وتكەن ءجون. ءفيلمنىڭ ۇزاقتىعى ءبىر ساعات. مۇندا اقىننىڭ ءومىرى مەن شىعارماشىلىق قىزمەتىنەن الىنعان دايەكتى دەتالدار, ۇزىك سىرلار, شۋاقتى لەبىزدەر مەن ەستەلىكتەر ەشكىمدى دە ەنجار قالدىرا المايدى. عۇمىرنامالىق كينوتۋىندى اقىننىڭ ءومىر ەسىگىن اشىپ, ۇشقان ۇياسىنان باستاۋ العان. دەرەكتى فيلمدە ءابىش كەكىلباەۆ, اقۇشتاپ باقتىگەرەەۆا, نۇرلان ورازالين, ەسەنعالي راۋشانوۆ جانە تەمىرحان مەدەتبەك سەكىلدى ادەبيەتىمىزدىڭ قابىرعالى وكىلدەرى قادىر مىرزا ءالىنىڭ كوپشىلىك بىلە بەرمەيتىن قىرلارىن قاپىسىز اڭگىمەلەپ بەرگەن. اقىننىڭ جانىن ءبىر تۇسىنسە, اقىننىڭ جارى عانا تۇسىنە الاتىن شىعار. وسى ورايدا قادەكەڭنىڭ قۇداي قوسقان قوساعى سالتانات زياناتكەلىنى ايتقان اشىق سىرلار دا دەرەكتى ءفيلمنىڭ قۇندىلىعىن كوتەرىپ تۇر.  تەمىر قۇسايىن, «ەگەمەن قازاقستان» ورال