پوليتسياعا جۇمىسقا تۇرۋ ءتارتىبى وزگەرەدى

قۇقىق قورعاۋ ورگاندارىنا كادرلاردى ىرىكتەۋ ءتارتىبى تۇبەگەيلى وزگەردى, دەپ حابارلادى باس پروكۋراتۋرا جانىنداعى قۇقىق قورعاۋ ورگاندارى اكادەمياسى. «مەملەكەت باسشىسى «100 ناقتى قادام» ۇلت جوسپارىندا كاسىپتىك مەملەكەتتىك اپپارات قۇرۋ مىندەتىن قويعان بولاتىن. ونىڭ نەگىزى مەملەكەتتىك قىزمەتتى تۇبەگەيلى جاڭارتۋ بولۋى ءتيىس. بۇل ەڭ جاقسى دايارلانعان جانە قابىلەتتى مامانداردى ىرىكتەۋگە مۇمكىندىك بەرەدى», - دەلىنگەن حابارلامادا. تاپسىرمانى ىسكە اسىرۋ اياسىندا جىل باسىنان بەرى قۇقىق قورعاۋ ورگاندارىنا كادرلاردى ىرىكتەۋ ءتارتىبى تۇبەگەيلى وزگەردى. قىزمەتكە العاش رەت تۇسەتىن ۇمىتكەرلەردى ىرىكتەۋدىڭ ءۇش ساتىلى جۇيەسى ەنگىزىلدى. بۇل تۋرالى باس پروكۋراتۋرا جانىنداعى قۇقىق قورعاۋ ورگاندارى اكادەمياسىنىڭ ءباسپاسوز قىزمەتى حابارلادى. ءبىرىنشى كەزەڭدە مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىندە نەمەسە ونىڭ اۋماقتىق بولىمشەلەرىندە مەملەكەتتىك ءتىلدى جانە زاڭنامانى بىلۋگە تەستىلەۋدەن ءوتۋ, سونداي-اق ۇمىتكەردىڭ جەكە قاسيەتتەرىن زەرتتەۋ كوزدەلەدى. ۇمىتكەر راسىمدەردى وڭ ناتيجەمەن وتكەن جاعدايدا ءتيىستى سەرتيفيكات الىپ, تىكەلەي قۇقىق قورعاۋ ورگانىندا (پروكۋراتۋرا, ىشكى ىستەر ورگاندارى, سىبايلاس جەمقورلىققا قارسى قىزمەت جانە ەكونوميكالىق تەكسەرۋ قىزمەتى) ىرىكتەۋ مەن كونكۋرسقا قاتىسۋعا قۇقىلى بولادى. سوڭعى كەزەڭدە ۇمىتكەرلەر كونكۋرستىق كوميسسيامەن اڭگىمەلەسۋدەن وتەدى. ەنگىزىلگەن جاڭالىقتار كادرلاردى ىرىكتەۋ تيىمدىلىگىن ارتتىرۋعا ارنالعان, ۇمىتكەرلەردىڭ جەكە تۇلعاسى تۋرالى كوبىرەك بىلۋگە مۇمكىندىك بەرەدى. قۇقىق قورعاۋ قىزمەتىنە العاش رەت تۇسەتىن ازاماتتاردى تەستىلەۋ قاعيدالارى, باعدارلامالارى جانە ۇيىمداستىرىلۋى قازاقستان رەسپۋبليكاسى مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگى توراعاسىنىڭ 2016 جىلعى 20 قىركۇيەكتەگى بۇيرىعىمەن بەكىتىلگەن.