رونالدۋ فيفا نۇسقاسى بويىنشا ۇزدىك ويىنشى اتاندى

«رەال» فۋتبول كلۋبىنىڭ جانە پورتۋگاليا ۇلتتىق قۇراماسىنىڭ شابۋىلشىسى كريشتيانۋ رونالدۋ فيفا (حالىقارالىق فۋتبول فەدەراتسياسى) نۇسقاسى بويىنشا 2016 جىلدىڭ ۇزدىك ويىنشىسى اتاندى. سالتاناتتى كەش شۆەيتساريانىڭ تسيۋريح قالاسىندا ءوتتى. بۇل باسەكەدە ول «بارسەلونانىڭ» شابۋىلشىسى ليونەل مەسسي مەن «اتلەتيكونىڭ» فورۆاردى انتۋان گريزماننان باسىم ءتۇستى. وتكەن جىلى 31 جاستاعى فۋتبولشى كورولدىك كلۋب ساپىندا چەمپيوندار ليگاسىن جانە كلۋبتار اراسىنداعى الەم چەمپيوناتىن جەڭىپ السا, پورتۋگاليا قۇراماسىمەن ەۋروپا چەمپيونى اتانعان. ماراپات يەسى ۇلتتىق قۇرامالار كاپيتاندارىنىڭ, باس جاتتىقتىرۋشىلارىنىڭ جانە جۋرناليستەردىڭ داۋىس بەرۋى ارقىلى انىقتالدى. 2010-2015 جىلدار ارالىعىندا فيفا مەن France Football بىرىگىپ, جىلدىڭ ۇزدىك ويىنشىسىن تاڭداعان. سىيلىق «فيفا-نىڭ التىن دوبى» دەپ اتالعان. بىراق 2016 جىلدىڭ قىركۇيەك ايىندا ەكى تاراپ ارىپتەستىگىن توقتاتاتىنى بەلگىلى بولدى. سونىمەن قاتار, كريشتيانۋ رونالدۋ بىرەر اي بۇرىن France Football باسىلىمىنىڭ ۇزدىگى اتانىپ, «التىن دوپ» جۇلدەسىنە قول جەتكىزگەن.