سەكسەۋىل سيرەپ بارادى

قايبىر جىلى تالاس اۋدانى, ءۇشارال اۋىلىنىڭ جولدارىن قۇم كوشكىنى باسىپ قالعاندا جەرگىلىكتى جۇرت وبلىس باسشىلارىنان كومەك سۇراپ, ارەڭ دەگەندە اشىپ العان بولاتىن. سوندا ماماندار قۇم كوشكىنىنىڭ بۇلايشا اۋىلعا باسىپ كىرۋىنىڭ ءبىر سەبەبىن وسى ماڭدا سەكسەۋىلدىڭ تىم سيرەپ, دالانىڭ جالاڭاش قالۋىمەن تۇسىندىرگەن ەدى. شىنىندا ءشول دالاعا «ءشوپ» بولىپ, شىرايىن كەلتىرىپ, كەي جەرلەردە بيىكتىگى 10 مەترگە دەيىن جەتەتىن سەكسەۋىلدى جاپپاي وتاۋ – قۇرعاقشىلىق پەن قۇم كوشكىنىنە, تابيعاتتىڭ تەپە-تەڭدىگىنىڭ بۇزىلۋىنا الىپ كەلەدى. بۇگىندە جامبىل وبلىسىندا سەكسەۋىل ورمانىنىڭ قورى 1126,4 مىڭ گەكتاردى قۇرايدى ەكەن. – دەسەك تە سەكسەۋىل ورمانىن تەك وتىن رەتىندە عانا كورىپ, مۇمكىندىگىنشە وتاپ العىسى كەلەتىندەردىڭ جولى ءبىرجولاتا كەسىلمەي تۇر, – دەيدى جامبىل وبلىسى پروكۋرورىنىڭ اعا كومەكشىسى داستان اسقار. – ءالى دە كەڭ القاپتى قورعاۋ, باقىلاۋ ماسەلەسى تولىق شەشىلمەگەن. جاز كۇندەرى ءتىلسىز جاۋ دا اياق استىنان ءورشىپ, قانشاما القاپتى ءورت قۇشاعىنا ورادى. وسى تۇستا جىل سايىن سەكسەۋىلدى پايدالانۋ كولەمىنىڭ ارتىپ كەلە جاتقانى دا قاتتى الاڭداتادى. مىسالعا, 2014 جىلى 12 مىڭ تەكشە مەتر سەكسەۋىلدى كەسۋگە رۇقسات بەرىلسە, 2015 جىلى بۇل كولەم 16 مىڭعا, وتكەن جىلى 22 مىڭعا ءوستى. بۇل وتە قاۋىپتى جاعداي. وبلىستىق پروكۋراتۋرانىڭ مالىمەتىنە قاراعاندا, سوڭعى ءۇش جىلدا سەكسەۋىلدى زاڭسىز كەسۋ, تاسىمالداۋ بويىنشا 270-تەن استام وقيعا ءتىر­كەل­گەن. بۇل شامامەن 500 تەكشە مەتردەن اس­تام سەكسەۋىل زاڭسىز كەسىلدى دەگەن ءسوز. 56 فاكتى بويىنشا قىلمىستىق ءىس قوز­عالدى. ارينە, سەكسەۋىلدى ەگۋ, كوبەيتۋ باعى­تىندا دا كوپتەگەن جۇمىستار اتقارى­لۋدا. سوڭعى بەس جىلدا 30 مىڭ گەك­تاردان استام جەرگە سەكسەۋىل ەگىلگەن. بىراق, تابيعاتقا باس-كوز بولاتىن قورىقشىلاردىڭ ازدىعى, بۇل باعىت­تاعى جۇمىستاردىڭ ءتيىمدى جولعا قويىل­ماۋى سەكسەۋىلدىڭ سيرەۋىن جەدەلدەتە تۇسۋدە. «سوندىقتان بۇل ماسەلەگە تىڭ كوز­قاراسپەن قاراپ, جۇمىستى جانداندىرۋ قاجەت», دەيدى پروكۋراتۋرا قىزمەتكەرلەرى. ورالحان ءداۋىت, «ەگەمەن قازاقستان» جامبىل وبلىسى