ۇلتتىق تاعامدارىمىز قىتاي نارىعىنا شىقتى

«Kaznex Invest» ۇلتتىق اگەنتتىگى ۇيىمداستىرعان «ازىق-ت ۇلىك پەن اۋىلشارۋاشىلىق ونىمدەرىن تانىستىرۋ» بويىنشا قىتايدا وتكەن كورمەگە پاۆلودارلىق «ساعىپ» شارۋا قوجالىعى, «اقجار-ءوندىرىس», «Jet Logistic» كومپانياسى, «كەممي», «كرەندەل» جانە «رۋبيكوم» فيرمالارى دا ءوز ونىمدەرىن تانىستىرىپ قايتتى. قىتاي كۇنتىزبەسى بويىنشا 15 قاڭتار – 15 اقپان ارالىعىندا ءبىر اي جاڭاجىلدىق مەرەكە اتالىپ وتىلەدى. كورمەگە بارعان ءبىزدىڭ ەلىمىزدىڭ كاسىپكەرلەرىنە جاڭاجىلدىق مەيرام كەزىندە ورتا ازياداعى ەڭ ۇلكەن سۋپەرماركەتتەن 500 شارشى مەتر اۋماقتى جالعا الىپ, ءبىر اي وزدەرى شىعاراتىن ونىمدەردى ساتۋ تۋرالى ۇسىنىس جاسالىپتى. ءسويتىپ, «ساعىپ» شارۋا قوجا­لىعى قىمىزىنىڭ زاماناۋي وركەنيەتتى ءوندىرىسى وزگەلەردىڭ دە كوزىنە ءتۇسىپ, سۇرانىس وزىنەن-ءوزى ەسىك اشتى. «ساعىپتىڭ» سارى قى­مى­زىنا ورىستار دا, قىتايلار دا قىزىعۋدا. تولەۋ اپايىمىز بيە ساۋىپ, قىمىز اشىتۋمەن 12 جىل بويى اينالىسىپ كەلەدى. العاشقى جىلدارى كاسىبىن 3 ساۋىن بيەمەن عانا باستاعان شارۋاشىلىق بۇگىندە ەلىمىزدەگى ىرگەلى كاسىپ­ورىن­داردىڭ بىرىنە اينالدى. رەسپۋبليكالىق «التىن ساپا» بايقاۋىندا جۇلدەگەر اتاندى. بۇل كۇندەرى قوجالىقتىڭ شەتەلدىك قوندىرعىلارى تاۋلىگىنە 1 توننا قىمىزعا دەيىن, ال, اپتاسىنا 5 توننا قىمىز وندىرۋگە مۇمكىندىك بەرەدى. ەلباسى وبلىسقا كەلگەن ءىسساپارلارىنىڭ بىرىندە تولەۋدىڭ «ساعىپ» شارۋا قوجالىعىندا بولدى. قازىر شارۋاشىلىقتا 400 بيە بار, ولاردىڭ 180-ءى ساۋىلادى. كاسىپكەر «بيزنەستىڭ جول كارتاسى-2020» باعدارلاماسىنىڭ اياسىندا نەسيە الىپ, 2007 جىلدان باستاپ ءوندىرىستى دامىتا باستادى. مەملەكەتتىڭ قولداۋى – وتاندىق تاۋار وندىرۋشىلەرگە ۇلكەن دەمەۋ. بۇل كۇندەرى قىمىز ءوندىرۋ تسەحتارىن­­دا 30-عا جۋىق مامان ەڭبەك ەتۋدە. ۇدە­مە­لى يندۋستريالىق-يننوۆاتسيا­­لىق دامۋ باعدارلاماسىنىڭ شەڭ­بەرىن­دە جاڭا قوندىرعىلار ساتىپ الۋ ءۇشىن 52 ميلليون تەڭگە ءبولىنىپتى. شارۋاشىلىق قۇرىلعان كۇننەن باستاپ-اق, قىمىزدى تمد ەل­دەرى مەن ەۋروپاعا ەكسپورتتاۋ ماق­ساتىندا جۇمىس باستادى. كاسىپ­ورىن تاۋلىگىنە 900 ليتر قىمىز وندىرەدى. زاماناۋي قۇرىلعى قىمىزدى 0,3, 0,5 جانە 1 ليترلىك شىنى قۇتىلارعا قۇيىپ شىعارادى, قازى-قارتا, شۇجىق, قۇرت, قوسپا, سۇزبە, قايماق جاسالادى. وندىرىستە اتا-بابادان ميراس بولعان ەجەلگى ءادىس-تاسىلدەر دە قولدانىلادى. سوندىقتان شارۋا­شىلىق ەت پەن ءسۇت ونىمدەرىنەن جاسالاتىن قازاق تاعامدارىن ۇلتتىق برەند رەتىندە تمد جانە ەۋروپا ەلدەرى نارىعىنا شىعارۋدى جوسپارلاپ وتىر. تولەۋ قۇشمانوۆانىڭ ايتۋىنشا, كورمەدەن كورىپ, ءدامىن العان قىتايلىق كاسىپكەرلەر قىمىز بەن قۇرتتى ارنايى زەرتحانالىق ساراپتامادان وتكىزىپ, جوعارى ساپالى ءونىم دەپ باعالاسا كەرەك. ەندى ەشبىر قوسپاسىز, تازا تابيعي ونىمگە قىزىققان قىتايلىق كاسىپكەرلەر جاڭا جىلدىق مەيرامدارىنا ارنايى تاپسىرىس بەرۋدە. ول جاقتىڭ كاسىپكەرلەرىنىڭ تالابى بويىنشا قىمىز 0,3, 0,5 ليترلىك شىنى شولمەكپەن, ال, قۇرت 150 گراممدىق قوراپتارعا سالىنىپ, ساتىلادى. – بۇعان دەيىن ماسكەۋدە ءوت­كەن «قازاقستاندىق تاۋارلار مەن ونىمدەر» كورمەسىنىڭ قورىتىندى­سى بويىنشا رەسەي نارىعىنا قى­مىز ساتۋ ءۇشىن مەموراندۋمعا قول قويىپ, 4 توننا قىمىز جىبەر­دىك. ماسكەۋدە «باۋىرساق» ساۋدا ورنىمىز, استانادا دا دۇكەندەرىمىز بار. ەندى قىتايلىقتارعا دا قۇرت پەن قىمىزىمىز ۇنايدى دەگەن ۇمىتتەمىز, – دەيدى «ساعىپ» شارۋا قوجالىعىنىڭ باسشىسى تولەۋ قۇشمانوۆا. فاريدا بىقاي, «ەگەمەن قازاقستان» پاۆلودار وبلىسى