حالىقارالىق وليمپيادا كوميتەتى قازاقستاندىق اتلەتتى 2012 جىلعى لوندون جانە 2008 جىلعى بەيجىڭ وليمپياداسىنىڭ جۇلدەلەرىنەن ايىرعانى بەلگىلى. مۇنداي شەشىم ءيليننىڭ دوپينگ-سىنامالارىنان تىيىم سالىنعان زاتتاردىڭ تابىلۋىنا بايلانىستى بولدى. «ا» جانە «ۆ» سىنامالارىن قايتا ساراپتاۋ قورىتىندىسى بويىنشا حوك-تىڭ تارتىپتىك كوميسسياسىنىڭ شەشىمىمەن سپورتشىنىڭ جەتىستىگى جوققا شىعارىلىپ, ول جۇلدەلەرى مەن ديپلومدارىنان ايىرىلدى. مۇنىڭ الدىندا قر اۋىر اتلەتيكا فەدەراتسياسىنىڭ باستاماسىمەن قازاقستاندىق سپورتشىلاردىڭ سىنامالارىن قايتا تەكسەرۋدىڭ قورىتىندىسىن بىرنەشە اي زەرتتەگەن قورعاۋشىلار مەن زەرتحانالىق ساراپاتاما سالاسىنىڭ ماماندارىنان توپ قۇرىلعان بولاتىن. «دەگەنمەن تانىمال ماماندار دوپينگ-سىنامانى قايتا تەكسەرۋدەن كەمشىلىك تاپپادى. وسىنىڭ سالدارىنان قازاقستاندىق اتلەتتەردىڭ وليمپيادالىق جەتىستىكتەرىن قورعاپ قالۋعا ەش مۇمكىندىك بولمادى. ال قورعاۋشىلار توبى سپورتشىنىڭ الەمدىك جانە قۇرلىقتىق بىرىنشىلىكتەردە ۇتقان جۇلدەلەرى مەن اتاقتارىن قورعاۋدى جالعاستىرادى. سونىمەن بىرگە, اۋىر اتلەتتى جارىسقا قاتىستىرماۋ جازاسىن جەڭىلدەتۋگە تىرىسادى. حالىقارالىق اۋىر اتلەتيكا فەدەراتسياسى جارىسقا قاتىستىرماۋ مەرزىمى تۋرالى شەشىمدى جاقىن ارادا قابىلدايدى», – دەلىنگەن فەدەراتسيا حابارلاماسىندا. وسى جىلدىڭ ماۋسىم ايىندا 28 جاستاعى سپورتشى وسى جاعدايلارعا بايلانىستى 2016 جىلعى وليمپياداعا قاتىسا المادى.
