قالا ءماسليحاتىنىڭ كەزەكتى سەسسيا وتىرىسىندا استانا اكىمدىگى ءدىن ىستەرى باسقارماسىنىڭ باسشىسى دانيار ەسىن وسىلاي دەپ مالىمدەدى. بۇل تۋرالى BNews.kz حابارلادى. باسقارما باسشىسىنىڭ ايتۋىنشا, مەكەمە ماماندارى جىل سايىن باس قالاداعى ءدىني احۋالعا تالداۋ جۇرگىزەدى. وسى ماقساتتا ءدىن احۋالىن زەرتتەۋ ورتالىعى دا جۇمىس ىستەيدى. استانادا جات اعىم يدەولوگياسىنا ۋلانعان ازاماتتارمەن قاتار وسى باپ بويىنشا سوتتالعان تۇلعالارعا دا وڭالتۋ ورتالىعىنىڭ كومەگى قاجەت. «قازىرگى ۋاقىتتا ءداستۇرلى ەمەس ءدىني اعىمدى ناسيحاتتاعانى ءۇشىن سوتتالعاندار ءتىزىمى, سونداي-اق, ولاردىڭ بوستاندىققا شىققاندارى دا بار. بىراق, بۇل ساناتتاعى ازاماتتاردىڭ كەيىنگى جاعدايىن باقىلايتىن, قاداعالاۋدا ۇستايتىن, پسيحولوگيالىق جانە باسقا دا كومەك كورسەتەتىن جۇيە ازىرگە جوق. مۇنداي قولداۋدى ولاردىڭ وتباسى, تۋعان-تۋىستارى دا قاتتى قاجەت ەتەدى. وڭالتۋ ورتالىقتارى ارقىلى ءبىز وسىنداي ازاماتتارعا كومەكتەسىپ قانا قويماي, ودان كەيىنگى جاعدايلاردى دا قاداعالاي الامىز», – دەيدى دانيار ەسىن. ۆەدومستۆو باسشىسى بۇل جۇمىستارعا جەرگىلىكتى يمامدار دا جۇمىلدىرىلاتىنىن جەتكىزدى. يمامدار بىلىكتىلىكتەرىن ارتتىرۋ ءۇشىن ارنايى كۋرستاردان وتكىزىلەدى. مامانداردىڭ پىكىرىنشە, بۇل يمامدارعا تەولوگيالىق پىكىرتالاس وربىتۋگە مۇمكىندىك بەرەدى. راديكالدى باعىتقا ەرگەن ازاماتتاردىڭ ساناسىندا تولىق زەردەلەنبەگەن ءدىني مالىمەتتەر ساقتالادى. بىلىكتىلىك ارتتىرۋ كۋرستارىندا ءدىن قىزمەتكەرلەرى جاڭىلىس باسقان جانداردىڭ ءداستۇرلى دىنگە بەت بۇرۋىنا دالەل-دايەكتەرمەن ىقپال جاساۋدى جانە پسيحولوگيالىق اسەر ەتۋدى مەڭگەرەدى ءارى شەشەندىك شەبەرلىكتەرىن شىڭدايدى. ءماسليحات دەپۋتاتتارى بۇل ىستە تەولوگتار مەن ءدىن ماماندارىن كوپتەپ تارتۋدى ۇسىندى. ءدىن ىستەرى باسقارماسىنىڭ باسشىسى د.ەسىن ءدىن ماماندارىنىڭ كومەگى قاشاندا ماڭىزدى ەكەنىن, الايدا, بىلىكتى كادرلاردىڭ از ەكەنىن ايتتى. ايتا كەتەيىك, بۇگىنگى كۇنى ءدىن سالاسى وتە ماڭىزدى ماماندىق قاتارىنا شىققان. وسىعان بايلانىستى وتكەن جىلى جوعارى وقۋ ورىندارىندا ءدىنتانۋ ماماندىقتارىنا ءبىلىم گرانتتارىنىڭ سانى كوبەيتىلدى.
