«بياتلونعا ءبىرجولا بەت بۇردىم»

– دەيدى جاسوسپىرىمدەر اراسىنداعى الەم چەمپيونى ارينا پانتوۆا قاراشانىڭ 25-ءى كۇنى نورۆەگيانىڭ بەيتوستولەن قالاسىندا IBU كۋبوگىنىڭ ءبىرىنشى كەزەڭى وتۋىمەن بياتلوننىڭ جاڭا ماۋسىمى اشىلعالى تۇر. اتالمىش دودادا ەل نامىسىن قورعايتىندار قاتارىندا 17 جاستان ەندى اسقان پاۆلودارلىق ارينا پانتوۆا دا بار. بيىلعى جىل باسىندا جاسوسپىرىمدەر الەم چەمپيوناتىندا التىن مەدال الىپ, وليمپيا ويىندارىندا قولا جۇلدەگەر اتانعان ول وسى جولى ەرەسەكتەر اراسىنداعى جارىسقا العاش رەت قاتىسپاقشى. ءبىز بولاشاعىنان كوپ ءۇمىت كۇتتىرەتىن بياتلونشى قىزبەن اڭگىمەلەسكەن ەدىك. – ەرەسەكتەر توبىنداعى ءبىرىنشى سايىسقا دايىندىعىڭىز قالاي؟ – دايىندىق ءالى بىتكەن جوق, ول جارىس باستالعانعا دەيىن سوزىلادى. سوڭعى كەزەڭدە ءجۇرمىز. جەكە جاتتىقتىرۋشىلارىم (ولار – ءوزىمنىڭ اتا-انام) مەن قۇراما باپكەرلەرى اقىلدارىن ايتىپ باعۋدا. جارىس بارىسىندا قوبالجىساڭ, بار ەڭبەگىڭ زايا كەتەدى. سوندىقتان «سىنىپ» كەتپەۋىمىز كەرەك. ۇلكەن­دەرمەن حالىقارالىق ارەنادا تۇڭعىش رەت سىنعا تۇسەتىندىكتەن, ەپتەپ ۇرەي مەن قوبالجۋ بار. ونىڭ ءبارى جارىس­قا شىققان ساتتە-اق ۇمىتىلىپ كەتەدى دەپ ويلايمىن. – ەرەسەكتەر مەن جاستار اراسىنداعى جارىستاردى قاتار الىپ ءجۇرۋ قيىن بولماي ما؟ – قاي جارىسقا قاتىساتىنىمىزدى قۇراما جاتتىق­تىرۋشىلارىنىڭ شتابى شەشەدى. ءبىزدىڭ ماقسات – بارىنشا ءساتتى ونەر كورسەتىپ, ارتىلعان سەنىمدى اقتاۋ. وتكەن جىلى دا وزىمنەن بىرنەشە جاس ۇلكەن قارسىلاستارمەن سايىسقا تۇسكەنمىن. مەن ءۇشىن ءبارىبىر. ءوزىمنىڭ دايىندىعىم دۇرىس بولسا – جەتەدى. ءبىر جىلعا ەسەيدىم, قاتەلىكتەردى جىبەرمەۋ جولىندا ءبىراز جۇمىس جاسادىم. بۇرىن اتۋ الاڭىنا كەلگەندە دەمدى دۇرىس الماي, ۋاقىت وتكىزىپ الۋشى ەدىم, ول ولقىلىق جويىلدى. – ءسىز بياتلونمەن كاسىبي تۇردە اينالىساتىن وتباسىدان شىقتىڭىز. اكەڭىز بەن اناڭىز – وسى سالادا جاتتىقتىرۋشى بولسا, اعاڭىز انتون ۇلتتىق قۇراما ساپىندا ءتاۋىر ونەر كورسەتىپ ءجۇر. دەسە دە, بياتلون مەن ارينانىڭ ەگىز ۇعىم ەكەنىن قاشان سەزدىڭىز؟ – بالا كۇنىمنەن بۇل سپورتتان الىس كەتپەيتىنىمدى ءبىلدىم, كەتۋگە مۇمكىندىك تە جوق ەدى. سەبەبى, اعام مەن اكە-شەشەمنىڭ جاتسا-تۇرسا ويلايتىنى بياتلون بولاتىن. باسىندا جاي حوببي تۇرىندە اينالىساتىنمىن, تەك بىلتىر جاستار اراسىنداعى رۋمىنيادا وتكەن الەم چەمپيوناتىندا جەڭىسكە جەتكەن سوڭ عانا ونىمەن كاسىبي تۇرعىدا اينالىسۋعا شەشىم قابىلدادىم. – جەڭىستىڭ ءدامىن تاتقان سوڭ قىزىعۋشىلىق ارتا تۇسكەن عوي؟ – ءيا. الەمدىك دەڭگەيدەگى جارىستا بيىك تۇعىردا تۇرىپ, سەن ءۇشىن ەلىڭنىڭ تۋى بيىككە كوتەرىلىپ ءانۇرانى شىرقالعاندا, ەرەكشە سەزىمدە بولادى ەكەنسىڭ. ساعان قولداۋ ءبىلدىرىپ, تىلەۋىڭدى تىلەپ وتىرعان جانكۇيەرلەر مەن جاتتىقتىرۋشىلاردىڭ ەڭبەگى اقتالعانى كوزگە ەرىكسىز جاس اكەلەدى. – قارسىلاستارىڭىز وزىڭىزدەن 2 جاس ۇلكەن بولسا دا, مارەگە ءبىرىنشى جەتىپ, الەم چەمپيونى اتاندىڭىز. سول كەزدە قانداي كۇيدە بولدىڭىز؟ – شىنىمدى ايتسام, قارسىلاستارىمنىڭ جاسىنا ءمان بەرمەدىم. بار ويىم اتۋ الاڭىنا كەلگەندە كوپ قاتەلەسپەسەم دەپ ويلادىم. مارەگە ءبىرىنشى بولىپ جەتكەندە, اتا-انامنىڭ ءۇمىتىن اقتاعانىم ءۇشىن ءوزىمدى باقىتتى سەزىندىم. سول كەزدە وزىمە كەلەشەكتە ەرەسەكتەر اراسىندا الەم چەمپيونى اتانىپ, وليمپيادادا مەدال الامىن دەپ ءسوز بەردىم. – وتكەن جىلعى ماۋسىم ءسىز ءۇشىن ءساتتى بولدى. بيىلعى جوسپارلار قانداي؟ – الەم چەمپيونى اتانعان سوڭ وزىمە جۇكتەلگەن جۇكتىڭ اۋىر ەكەندىگىن سەزىندىم. جانكۇيەرلەردىڭ مەنەن جوعارى ناتيجەلەر كۇتەتىنى انىق. باستى ماقساتىم – پسيحولوگيالىق تۇرعىدان ءوز-ءوزىمدى دايىنداۋ. مورالدىق تۇرعىدان دا­يىن بولسام, باسقاسى وڭاي بولاتىنىن سەزەمىن. سوندىقتان, بىلتىرعى ماۋسىمدا كورسەتكەن بيىك مەجەنى بيىل اسىرا ورىنداۋعا تىرىسامىن. – بياتلون ءبىر عانا جارىستان تۇرمايدى. سپرينت, ءىز كەزۋ سەكىلدى قىسقا-ۇزىن قاشىقتىققا جۇگىرۋ كەزەڭدەرى بار. ءوزىڭىز قايسىسىن ۇناتاسىز؟ – ناقتى ايتۋ قيىن. ۇزاق قاشىقتىققا جۇگىرۋدى ۇناتامىن. قۋالاپ جەتۋگە مۇمكىندىك كوپ. الايدا, سپرينت تە وتە ۇنايدى, ويتكەنى, وندا ەكى اتۋ كەزەڭى عانا بار. – بياتلونداعى ءپىرىڭىز كىم؟ – مەنىڭ باستى ۇلگى تۇتار ادامىم – اعام. ول – مەن ءۇشىن اركەز ءنومىرى ءبىرىنشى. ونىڭ ايتقان اقىلى, اعا عانا ەمەس, سپورت مامانى رەتىندەگى كەڭەستەرى مەن ءۇشىن ماڭىزدى. – بيىل مەكتەپ بىتىرەتىن جىلىڭىز. سپورت پەن وقۋدى قاتار الىپ ءجۇرۋ قيىن ەمەس پە؟ – جوق. ۇستازدارىما مىڭ العىس. بارلىعى تۇسىنىستىكپەن قاراپ, قاتالدىق كورسەتە بەرمەيدى. وبلىستىڭ, قازاقستاننىڭ نامىسىن قورعاپ جۇرگەنىم – ولار ءۇشىن ماقتانىش, سوندىقتان باعالارىم جامان ەمەس. – بوس ۋاقىتىڭىزدا نەمەن اينالىساسىز؟ – بوس ۋاقىت كوپ بولا بەرمەيدى, قولىم قالت ەتكەندە توقىما توقىپ, سۋرەت سالعاندى ۇناتامىن. كىتاپ وقيمىن. ءار ادام ءوزىن جان-جاقتى دامىتۋ كەرەك. سپورت پەن اقىل قاتار دامىسا, ۇلكەن بايلىق سول دەپ ويلايمىن. اڭگىمەلەسكەن ايدوس رىمقۇلوۆ, ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ ستۋدەنتى استانا