ستانيمير ستويلوۆ: ءبىز ءۇشىن ماڭىزدى ەمەس ماتچ بولعان جوق

سەنبى كۇنى قازاقستان كۋبوگىن جەڭىپ العاننان كەيىن «استانا» فۋتبول كومانداسىنىڭ باس جاتتىقتىرۋشىسى ستانيمير ستويلوۆ ماۋسىمنىڭ قورىتىندىسى تۋرالى ءوز ويلارىن ورتاعا سالدى. – بيىل «استانا» تاريحتا تۇڭعىش رەت «التىن دۋبل» جاسادى, ياعني چەمپيوندىقتى دا, كۋبوكتى دا جەڭىپ الدى... – شىنىندا دا, بۇل ماۋسىمدا ءبىزدىڭ فۋتبولشىلارىمىز وراسان زور جۇمىستار اتقاردى. «استانا» قاتارىنان ءۇشىنشى مارتە چەمپيون اتانۋمەن بىرگە, الماتىدا كۋبوك ءۇشىن «قايراتپەن» وتكەن فينالدا جەڭىسكە جەتتى. بۇعان دەيىن كوماندا الماتىلىقتاردى جارىستىڭ بۇل ساتىسىندا ۇتىپ كورمەگەن ەدى. بۇعان قوسا, ەۋروپا ليگاسىنىڭ توپتىق كەزەڭىنە شىقتىق. وسىلاي­شا ءۇش مايداندا شايقاسقان ۇجىم جىلدىڭ سوڭىنا قاراي سوڭعى تروفەيدى دە جەڭىپ الىپ, ماۋسىمدى جوعارى جەتىستىكپەن تياناق­تاپ وتىر. وسى ماتچتىڭ الدىن­دا مەن ەندى كۋبوكتى قوسا جەڭىپ الماساق, بيىلعى جەتىستىگىمىزدىڭ جارىم-جارتىلاي بولاتىنىن, قالاي­دا ماقساتقا جەتۋگە ۇمتىلا­تى­نى­مىزدى مالىمدەپ  ەدىم. سول مەجەنى العانىمىزعا وتە قۋانىشتىمىن. – دەگەنمەن, فينالدىق ماتچ الدىندا جۇرتتىڭ كوبى «قايراتتىڭ» جەڭىسكە جاقىن تۇرعانىن ايتىپ ەدى. – ال ءبىز ولاي دەپ ەسەپتەگەن جوقپىز. وسى ماتچتا قايتكەندە دە جەڭىسكە جەتۋدى كوزدەدىك. سوعان وراي كۇشىمىزدى دە دۇرىس ەسەپتەدىك. جالپى, مەن جۇمىس جاساسىپ كەلە جاتقان 2,5 جىلدىڭ ىشىندە «استانا» اسا ماڭىزدى ماتچتاردا الدىنا قويىلعان جۇكتى كوتەرىپ كەتە الاتىن كوماندا ەكەنىن ۇدايى كورسەتۋمەن كەلەدى. ءبىز كەز كەلگەن ماتچتا فاۆوريت بولىپ ءجۇرمىز. مۇنىڭ ۇستىنە, ءبىزدىڭ جاساق ءۇشىن ماۋسىم ىشىندە ماڭىزدى ەمەس ماتچ بولعان ەمەس. ەندى ناقتىلى مىنا ويىنعا كەلسەك, ەكى جاقتىڭ جەڭىسكە دەگەن ۇمتىلىستارى مەن مۇمكىندىكتەرى شامالاس كورىندى. اتالمىش ەكى كوماندا كەزدەسكەندە, تۇبىندە كىمنىڭ ۇتاتىنىن الدىن الا ايتۋ قاشاندا قيىن. بۇل ويىندا دا سولاي بولدى. جاع­دايدى تەك اۋا رايى ءبىراز ءوز­گەر­تىپ جىبەردى. قار باسقان الاڭدا ويناۋ ەكى جاققا دا وڭايعا تۇسكەن جوق. بىراق سول قيىن ساتتەردە ءبىزدىڭ ويىنشىلار ءبىرىنشى بولىپ شالتتىق تانىتتى. – دوپ ەكىنشى تايمنىڭ باس جا­عىندا سوعىلعاسىن, ءسىز سول ەسەپ­تى ۇستاپ تۇرۋدىڭ ورنىنا شابۋىلدى كۇشەيتۋگە كۇش سال­دى­ڭىز عوي. بۇل نەلىكتەن جاسال­دى؟ – الاڭنىڭ سيپاتى مىناداي بول­عا­سىن, تابلوداعى ەسەپتىڭ كەز كەلگەن ۋاقىتتا وزگەرىپ كەتۋى ءمۇم­كىن ەدى. سوندىقتان قولدا بار شابۋىل­شىلاردىڭ ءبارىن ىسكە قوسۋ­عا تاۋەكەل ەتتىك. ماقساتىمىز قالاي­دا تاعى ءبىر گول سالۋ بولدى. سول كەزدە عانا ءبىزدىڭ جەڭىسكە دە­گەن سەنىمىمىز وسە تۇسەتىنىن پايىم­دادىق. ال الاڭ قاردان جاقسىلاپ تازارتىلعاننان كەيىن قورعانىستا ويناۋىمىز جەڭىلدەي ءتۇستى. – «استانا» ماۋسىم تولىق اياقتالماي جاتىپ, ءوز قۇرامىنا جاڭا ويىنشىلار الا باستاعان با؟ – بىزدە قورعانىستا وينايتىن قازاقستاندىقتار جەتەرلىك. بىراق شابۋىل وتىندە وينايتىندار اراسىندا جەرگىلىكتى فۋتبولشىلاردىڭ ۇلەس-سالماعى ونشالىقتى كوپ ەمەس. سول ولقىلىقتىڭ ورنىن تولتىرۋ ماقساتىندا پاۆلوداردان رومان مۋرتازاەۆتى شاقىرىپ وتىرمىز. ول بيىلعى چەمپيوناتتا جەرار گوۋدان كەيىنگى ەكىنشى مەرگەن شابۋىلشى اتاندى. ءبىز سوندىقتان «ەرتىستىڭ» فورۆاردىن ءوز قاتارىمىزدان كورگىمىز كەلدى. – ال بۇگىنگى ماتچتا قاقپاشى نەناد ەريچتىڭ كورىنبەۋىنە نە سەبەپ؟ – ونىڭ ويىنىنا قاتىستى ەشقانداي سەبەپ جوق. تەك بىزدە بيىل­عى كۋبوك ويىندارىندا الەك­ساندر موكيننىڭ الاڭعا شىعۋى وزىندىك ءبىر ءداستۇر سياقتى بولىپ قالىپ ەدى, سونى بۇزعىمىز كەلمەدى. – «استانا» ءۇشىن بۇل جىلعى ماۋسىم ءالى جابىلعان جوق قوي. – دۇرىس ايتاسىز. بۇگىننەن باستاپ قازاقستانداعى بارلىق كوماندالار قىسقى ۇزىلىسكە شىقتى. ال بىزگە چەمپيوندار ليگاسىنىڭ توپتىق راۋندىندا ءالى ەكى ماتچ وتكىزۋ كەرەك. الدىمەن, 24 قاراشا كۇنى ءوز الاڭىمىزدا كيپردىڭ اپوەل-ءىن قابىلداساق, 8 جەلتوقساندا شۆەيتساريادا جەرگىلىكتى «يانگ بويز» كلۋبىمەن كۇش سىناسىپ, توپتىق ويىنداردى اياقتايمىز. اڭگىمەلەسكەن تالعات ءسۇيىنباي, «ەگەمەن قازاقستان»   الماتى