الەكسەي ني: توكيو تالانتتى تولقىن ءوسىپ كەلە جاتقانىن تانىتتى

قازاقستاننىڭ اۋىر اتلەتيكادان جاسوسپىرىمدەر مەن جەتكىنشەكتەر قۇراما كوماندالارى توكيودا بولىپ وتكەن ازيا چەمپيوناتىندا جاقسى ونەر كورسەتتى. قۇرلىق بىرىنشىلىگى رەس­پۋبليكادا تالانتتى تولقىننىڭ ءوسىپ كەلە جاتقانىنا كوز جەتكىزدىردى. ءبىزدىڭ ەلىمىز قۇراما كومانداسىنىڭ باس جاتتىقتىرۋشىسى الەكسەي نيمەن اڭگىمەمىز وسى توڭىرەكتەن ءورىس الدى. – الەكسەي گەننادەۆيچ, جاپون استاناسىنداعى جەتىستىك دوپينگ داۋى تەڭسەلتىپ تۇرعان قازىرگى كەزدە كوڭىلگە ءۇمىتتىڭ شوعىن ۇرلەپ جىبەرگەندەي جاقسى اسەر ەتىپ وتىر. – ءيا, بۇل قازاقستاننىڭ شىن مانىندە دە الەمدەگى اۋىر اتلەتيكاسى دامىعان دەرجاۆالاردىڭ بىرىنەن تابىلاتىنىن تاعى ءبىر مارتە دالەلدەپ بەرگەن وقيعا بولدى. سول جارىسقا بارعان جەتى سپورتشىمىزدىڭ التاۋى جۇلدەلى ورىنداردان كورىندى. مەدالدار قۇنىن ساراپتاساق, چەمپيوناتتا قورجىنىمىزعا 4 التىن, 1 كۇمىس جانە 1 قولا جۇلدە ءتۇستى. بىزگە العاشقى التىن مەدالدى ءجاسوسپىرىم ارىستانبەك جاحانشا اپەردى. ول 69 كيلوعا دەيىنگىلەر شوعىرىندا 283 كگ (128+155) سالماقپەن الدىنا جان سال­مادى. تاپ وسى سالماقتا تاعى ءبىر اتلەتىمىز – جەتكىنشەك البەرت ليندەر 315 كيلومەن (142+173) ازيانىڭ ەڭ مىقتىسى اتاندى. بۇدان كەيىنگى التىن مەدال 77 كيلودا جەتكىنشەك ميحايل ماكەەۆتىڭ ەنشىسىنە جازىلدى. ول بۇعان جيىنتىقتا 321 كگ (143+178) زىلتەمىردى كوتەرۋ ارقىلى جەتتى. قولا مەدالدى وسى سالماقتاعى ءجاسوسپىرىم امانجول سەرىكبول الدى. مەدالدار اۋىلىنان تىس قالعان 56 كيلو سالماقتاعى يگور سونعا وسى بەلەستەن كورىنۋگە 1 بالل عانا جەتپەدى. ول قوسسايىستا 246 كگ (110+136) سالماقتى ەڭسەردى. قىز­دار توبىندا التىن مەدال 69 كگ سالماقتاعى انجەلا چالكاروۆاعا بۇيىردى. ول سايىستا 188 كگ (87+101) سالماقتى باعىن­دىردى. ال +75 كيلو سالماقتا نادەج­دا نوگاي 251 كگ (113+138) كورسەت­كىشى­مەن كۇمىس مەدالدى قاناعات تۇتتى. – چەمپيونات قارساڭىندا اتلەتتەر الدىنا قانداي مىندەت قويىلدى؟ –  سەنەسىز بە, ولارعا چەمپيوناتتا قالايدا جەڭىسكە جەتۋ كەرەك دەگەن سياقتى جوعارى مەجەلى مىندەت قويىلعان جوق. ولارعا بەرىلگەن تاپسىرما قازاقستان چەمپيوناتى كەزىندە قول جەتكىزگەن كورسەتكىشتەرىنەن تومەن ناتيجە كورسەتپەۋ عانا بولدى. مەن ءۇشىن ولاردىڭ باسقا ەلدەردەگى قار­سىلاستارىمەن تەكەتىرەستە وزدە­رىن قالاي ۇستاي الاتىندارىن بايقاپ, كورۋ بارىنەن ماڭىزدى سا­نالدى. سەبەبى, جاس اتلەتتەرىمىز وسى جاعىنان تاجىريبەسىز بولاتىن. سونىڭ ارقاسىندا ءوسىپ كەلە جاتقان جاس بۋىنىمىزدىڭ جارىس بارى­سىنداعى مىنەز-ق ۇلىقتارى مەن الەۋەتتەرىنە ءبىراز قانىعىپ قالدىق. – بۇرىن ازيادا بىردەن ءتورت التىن مەدال الۋ بولعان ەمەس ەدى.  – دۇرىس ايتاسىز. الدارى­نا ايتارلىقتاي ماقسات قويىل­ماعاسىن جاس سپورتشىلارىمىز توكيودا ەركىن ونەر كورسەتتى. پسيحولوگيالىق جاعىنان العان ازاتتىق ولاردىڭ ءوز قابىلەتتەرىن بارىنشا اشا بىلۋلەرىنە مۇمكىن­دىك بەردى. ءسويتىپ, ءبىز ءوز تاريحىمىزدا ءبىرىنشى رەت قۇرلىقتا ءتورت بىردەي چەمپيون شىعاردىق. ال بۇعان دەيىنگى بيىگىمىز دوحادا ءۇش التىن مەدال الۋ بولسا, ەندى سودان اسىپ ءتۇسىپ وتىرمىز. ەگەر الدىمىزعا قالايدا بەس التىن مەدال الۋ مىندەتىن بەلگىلەپ العاندا, وعان دا جەتە الاتىن ەدىك. بىراق بۇرىننان بار جاراقاتىنان تولىق ايىعا قويماعان نادەجدا نوگايدى ارتىعىراق كۇش جۇمساۋدان ءوزىمىز ساقتاندىردىق. ونىڭ ريودا ءوز دارەجەسىندە ونەر كورسەتە الماۋىنا دا وسى جاراقاتى كەدەرگى كەلتىرىپ ەدى. سوندىقتان وقيعانىڭ الدىنا تۇسپەي, اتلەتتى اقىرىن دايىنداي بەرگەندى ءجون كوردىك. – بۇل اتلەتتەردىڭ اراسىنان قازىردەن باستاپ ەرەسەكتەر توبىندا ونەر كورسەتۋگە دايىندارى بار ما؟ – بار. ماسەلەن, 2017 جىلدىڭ باسىنان البەرت ليندەر مەن نادەجدا نوگاي ۇلتتىق قۇراما ساپىنا الىنادى. جالپى, وسى توپتى بولاشاقتىڭ كومانداسى رەتىندە قاراستىرىپ وتىرمىز. بۇلار – ءدال قازىرگى تاڭدا ەلىمىزدە ءوز قاتارلارىنىڭ الدى. باسىندا توكيوعا 7 قىز, 8 ۇل قالپىندا تولىق قۇراممەن بارماقشى بولعانبىز. سوڭىنان تەك كورسەتكىش كورسەتەتىندەرىن عانا اپاردىق. قالعاندارى جەلتوقساننىڭ باسىندا قىزىلوردادا وتەتىن قازاقستان كۋبوگى ءۇشىن جارىسقا دايىندالادى. جالپى, جاس اتلەتتەرىمىزدىڭ بۇل جولعى تابىسىنا ريزامىن. اڭگىمەلەسكەن سەرىك ءپىرنازار, «ەگەمەن قازاقستان»