بقو بيۋدجەتى قانشا تەڭگە؟

باتىس قازاقستان وبلىسىنىڭ بيۋدجەتى 3,2 ملرد. تەڭگەگە ناقتىلانىپ, كىرىستەرى مەن شىعىستارى بويىنشا 134,7 ملرد. تەڭگەگە جەتتى. بۇل تۋرالى بۇگىن وبلىس اكىمى التاي كولگىنوۆتىڭ قاتىسۋىمەن وتكەن وبلىستىق ءماسليحاتتىڭ كەزەكتەن تىس 7-سەسسياسىندا ايتىلدى, دەپ حابارلايدى قازاقپارات. وندا وبلىستىق ەكونوميكا جانە بيۋدجەتتىك جوسپارلاۋ باسقارماسىنىڭ باسشىسى قايسار ماڭقاراەۆتىڭ ءمالىم ەتكەنىندەي, ءوڭىر بيۋدجەتىنىڭ وسىنشا كولەمدە ناقتىلانۋى رەسپۋبليكالىق بيۋدجەت پەن ۇلتتىق قوردان قوسىمشا بولىنەتىن 1698,9 ملن. تەڭگەنىڭ ماقساتتى ترانسفەرتتەرىنە, وبلىستىق بيۋدجەت كىرىس بولجامىنىڭ 677,6 ملن. تەڭگەگە تۇزەتىلۋى جانە بيۋدجەتتىك باعدارلامالار اكىمشىلەرى اراسىندا 877,2 ملن. تەڭگە قاراجاتتىڭ قايتا بولىنۋىنە بايلانىستى بولىپ وتىر. سونىڭ ىشىندە ماقساتتى ترانسفەرتتەر ەسەبىنەن 2013-2020 جىلدارعا ارنالعان «اگروبيزنەس - 2020» باعدارلاماسى اياسىندا اگروونەركاسىپ كەشەنىن قولداۋعا - 1028,8 ملن. تەڭگە, گاز تاسىمالداۋ جۇيەسىن دامىتۋعا - 700 ملن. تەڭگە, مەكتەپتەردى سالۋ مەن قايتا قۇرۋعا 293,2 ملن. تەڭگە بەرىلمەك. ەسەسىنە «وڭىرلەردە جەكە كاسىپكەرلىكتى قولداۋ» باعدارلاماسى بويىنشا ترانسفەرتتەر 681 ملن. تەڭگەگە ازايتىلدى. سونىمەن قاتار وبلىستىق بيۋدجەتتەن دەنساۋلىق ساقتاۋعا 11,9 ملن. تەڭگە, اۋىل شارۋاشىلىعىنا 20,3 ملن. تەڭگە, مادەنيەت پەن سپورتقا 99,5 ملن. تەڭگە, تۇرعىن ءۇي-كوممۋنالدىق شارۋاشىلىق سالاسىنا 475,5 ملن. تەڭگە قوسىمشا قارجى بولىنبەك. «جۇمىسپەن قامتۋدىڭ جول كارتاسى - 2020» باعدارلاماسى اياسىندا التى بىردەي نىساندى كۇردەلى جوندەۋگە 236,8 ملن. تەڭگە قارالدى. اتاپ ايتقاندا, ءبىر-بىردەن ءبىلىم بەرۋ مەن دەنساۋلىق ساقتاۋ نىساندارى, زەلەنوۆ, قازتالوۆ, تەرەكتى اۋداندارىندا جول جوندەۋ بويىنشا ءتورت جوبا قارجىلاندىرىلدى. وعان قوسا قۇرىلىسى باستالعان نىسانداردى سالۋعا 204 ملن. تەڭگە جۇمسالماقشى. سەسسيادا ەلباسى جارلىعىنا سايكەس وبلىس اكىمى التاي كولگىنوۆ دەپۋتاتتار الدىندا ەسەپ بەرىپ, تاۋەلسىزدىگىمىزدىڭ 25 جىلدىعى تويلاناتىن بيىلعى جىلدىڭ ون ايىندا ءوڭىردىڭ الەۋمەتتىك-ەكونوميكالىق دامۋىندا وڭ كورسەتكىشتەر بار ەكەندىگىن اتاپ كورسەتتى.