بۇگىن ەل تاۋەلسىزدىگىنىڭ 25 جىلدىعىنا وراي جولعا شىققان «تاۋەلسىز قازاقستان» پويىزى ورال قالاسىنا كەلدى, دەپ حابارلايدى
قازاقپارات.
رەسپۋبليكالىق شاراعا قاتىسۋشىلاردى اق جايىق جۇرتشىلىعى تەمىر جول ۆوكزالىنان قۇرمەتپەن قارسى الدى. وسىنداعى الاڭدا وتكەن سالتاناتتى ميتينگىدە بقو اكىمىنىڭ ورىنباسارى باعدات ازباەۆ مارتەبەلى مەيماندارعا قوش كەلدىڭىز ايتىپ, ەل تاۋەلسىزدىگىنىڭ 25 جىلدىعىنا وراي قولعا الىنعان مۇنداي شارالاردىڭ ءمانى زور ەكەندىگىن اتاپ كورسەتتى.
«جيىرما بەس جىل ىشىندە ەلىمىز قول جەتكىزگەن كوپتەگەن تابىستاردى بايانداپ, ەلباسىنىڭ «100 ناقتى قادام» ۇلت جوسپارىن, «ماڭگىلىك ەل» يدەياسىن حالىققا جەتكىزۋ ماقساتىندا بەلگىلى قوعام قايراتكەرلەرى, بىرقاتار مينيسترلىكتەر وكىلدەرى مەن ءتۇرلى سالا ماماندارى, ءماجىلىس دەپۋتاتتارى كەلىپ وتىر. ولار تۇرعىندارمەن كەزدەسىپ, ەلىمىزدە اتقارىلعان ناقتى ىستەردى ءمالىم ەتىپ, ءوز وي-تولعامدارىمەن بولىسپەك», - دەدى ب.ازباەۆ.
«ەلىمىزدىڭ باتىس قاقپاسى سانالاتىن ورالعا كەلگەنىمىزگە قۋانىشتىمىز. تاۋەلسىزدىگىمىزدىڭ 25 جىلدىق تورقالى تويىن اتاپ وتەر تۇستا استانادان ەلباسى تاپسىرماسىمەن, قازاقستان حالقى اسسامبلەياسىنىڭ قولداۋىمەن شىققان «تاۋەلسىز قازاقستان» پويىزى حالىق پەن بيلىكتىڭ, ەل مەن ۇكىمەتتىڭ اراسىنداعى كوپىر ىسپەتتەس. ءبىز حالىقپەن بىرگە بولايىق, الەۋمەتتىك ماسەلەلەرى بولسا, سونى شەشەيىك دەپ كەلدىك», - دەدى «تاۋەلسىز قازاقستان» پويىزى شتابىنىڭ جەتەكشىسى, تاريح عىلىمدارىنىڭ كانديداتى, ل.گۋميلەۆ اتىنداعى ەۇۋ حالىقارالىق قاتىناس كافەدراسىنىڭ پروفەسسورى ءامىرجان الپەيىسوۆ.
اتالمىش پويىزدىڭ ساپارىنا بايلانىستى ورالدا 18-19 قاراشا كۇندەرى كەزدەسۋلەر مەن باسقا دا ءىس-شارالار جوسپارلانعان. سونىڭ ىشىندە ماماندار الەۋمەتتىك, قۇقىقتىق, دەنساۋلىق ساقتاۋ, ءبىلىم بەرۋ, اۋىل شارۋاشىلىعى, كاسىپكەرلىك ماسەلەلەرى, زەينەتاقى تولەمدەرى, تۇتىنۋشىلار قۇقىعىن قورعاۋ بويىنشا تۇرعىنداردى قابىلداپ, كەڭەس بەرەدى. مىسالى, وبلىستىق دەنساۋلىق ساقتاۋ باسقارماسىنان تۇسكەن مالىمەتكە قاراعاندا, وبلىستىق دياگنوستيكالىق ورتالىققا بىلىكتى مامانداردىڭ الدىنا اۋرۋى كۇردەلى ادامدار كەلىپ, اقىل-كەڭەس الماقشى. سول سەكىلدى جۋىردا ورالداعى كافەلەردىڭ بىرىندە تاماقتان ۋلانىپ, سالمونەللەز اۋرۋى انىقتالعان تۇرعىندار مورالدىق جانە ماتەريالدىق تۇرعىدا ءوز قۇقىقتارىن قورعاۋ ءۇشىن زاڭ قىزمەتكەرلەرىنىڭ كومەگىنە جۇگىنبەكشى.
