قازاقستاننىڭ گرەك رەسپۋبليكاسىنداعى ەلشىلىگى «ش.ايمانوۆ اتىنداعى قازاقفيلم» اق-مەن بىرلەسىپ, ەل تاۋەلسىزدىگىنىڭ 25 جىلدىعى مەن قازاقستاننىڭ تۇڭعىش پرەزيدەنتى كۇنىنە وراي, احارنە قالاسىندا «جۇلدىزدار توعىسقاندا» ءفيلمىنىڭ كورسەتىلىمىن وتكىزدى. گرەكيا جۇرتشىلىعى فيلمگە دەگەن قىزىعۋشىلىقتارىن جارناما شىققان كۇننەن باستاپ تانىتا باستاعان. فيلمنىڭ بۇرىنعى وتانداستىرىمىز – قازاقستاندىق گرەكتەر كوپتەپ قونىستانعان قالادا وتكىزىلۋى سيمۆوليكالىق مانگە يە. سالتاناتتى شاراعا شاقىرىلعان قوناقتار اراسىندا گرەك رەسپۋبليكاسىنىڭ قوعام جانە ساياسي قايراتكەرلەرى, ديپلوماتيالىق كورپۋس, ىسكەر جانە مادەنيەت وكىلدەرى, احارنە قالاسىنىڭ باسشىلىعى مەن ءبىزدىڭ بۇرىنعى وتانداستارىمىز بولدى.
قازاقستان رەسپۋبليكاسىنىڭ توتەنشە جانە وكىلەتتى ەلشىسى ا.ۆولكوۆ فيلم الدىندا سويلەگەن سوزىندە «قازاقستاننىڭ تۇڭعىش پرەزيدەنتى تەك ءوز مەملەكەتىنىڭ عانا ەمەس, ورتالىق ازيانىڭ كوشباسشىسى, سونىمەن قاتار, يادرولىق قارۋدى تاراتپاۋعا, قارۋسىزدانۋعا قوسىپ كەلە جاتقان زور ۇلەسى ارقىلى الەم مەملەكەتتەرىنىڭ باسشىلارى مەن حالىقارالىق ۇيىمدار تاراپىنان مويىندالعان تۇلعا» ەكەنىن ايتتى.
ءىس-شارا سوڭىندا قوناقتار فيلمنەن العان جىلى اسەرلەرىن جاسىرماي, قازاقستاندا قالىپتاسقان ۇلتارالىق جانە شىنايى دوستىق ۇلگىسىن ەستەرىنە الىپ, ومىرلەرىنىڭ ەڭ قۋانىشتى مەزەتتەرىمەن, بۇرىنعى وتاندارىنا دەگەن ساعىنىشتارىمەن ءبولىستى.
