قازاقستان مەن نازارباەۆ – الەم ءۇشىن ەگىز ۇعىم

ۇلتتىق ۆاليۋتا – كەز كەلگەن تاۋەلسىز مەملەكەتتىڭ اجىراماس ءبىر بەلگىسى. وسىدان جيىرما ءۇش جىل بۇرىن ءتول تەڭگەمىز ومىرگە كەلىپ, اينالىمعا شىققاندا الىس-جاقىن اعايىننان ءسۇيىنشى سۇراپ, بوركىمىزدى اسپانعا اتا قۋانعان ەدىك. بۇل نەنى بىلدىرەدى؟ بۇل – عاسىرلار بويى ازاتتىقتى اڭساعان ەلدىڭ, تاۋەلسىز مەملەكەت ازاماتتارىنىڭ ءوز الدىنا دەربەس ەكونوميكالىق تىرشىلىككە قۋانۋى ەدى. قازاق توپىراعىنا اياق باسقان ءاربىر ادام قاجەتتىلىكتەن قولىنا ۇستايتىن اقشاعا ۇلتىمىزدىڭ بەتكە ۇستار ماقتانىشتارىن – ءابۋ ناسىر ءال-فارابيدەن باستاپ, ءسۇيىنباي, قۇرمانعازى, شوقان, اباي, ابىلقايىر, ابىلاي بەينەلەرىن سالدىق. سونىڭ ءبارى سول كەزدە اۋىزبەن ايتىپ جەتكىزگىسىز قۋانىش ءارى ۇلى ماقتانىش ەدى! 1993 جىلدىڭ قاراشاسىندا تەڭگەنىڭ اينالىمعا شىعارىلۋى ءبىزدىڭ جاس تاۋەلسىز رەسپۋبليكامىزدىڭ جىلناماسىنداعى ەڭ ماڭىزدى وقيعالاردىڭ ءبىرى بولعانى انىق. مەملەكەتىمىزدى سان قىسپاق پەن قىسىلتاياڭ شاقتاردان امان-ەسەن الىپ شىعىپ, بۇگىنگىدەي مامىراجاي زامانعا باستاپ اكەلگەن ەلباسىمىز نۇرسۇلتان ءابىش ۇلى نازارباەۆ ءاردايىم سونداي مەملەكەتتىك دەڭگەيدەگى يگى ىستەردىڭ باسى-قاسىندا بولدى. قازاقستان رەسپۋبليكاسىنىڭ تۇڭعىش پرەزيدەنتى رەتىندە ونىڭ سۋرەتىن العاشقى تەڭگەلەردىڭ بىرىنە باسقاندا دا ابدەن لايىق ەدى دەپ ويلايمىن. ونى حالىق سول كەزدىڭ وزىندە-اق قولدار ەدى. قازاق تىلىندە ارحايزمگە اينالعان «تەڭگە» ءسوزىن جاڭا ۆاليۋتامىزعا تەلىگەن دە نۇرسۇلتان ءابىش ۇلىنىڭ ءوزى بولاتىن. دەسەك تە, «جاقسىلىقتىڭ ەرتە-كەشى جوق», ەل تاۋەلسىزدىگىنىڭ 25 جىلدىق مەرەيتويى قارساڭىندا جارىققا شىققان 10 مىڭ تەڭگەلىك جاڭا كۋپيۋراعا ەلباسىنىڭ سۋرەتى بەدەرلەنگەنى وتە ورىندى بولدى. شىنىندا دا, مەملەكەتتىڭ ءبىرىنشى باسشىلارىنىڭ بەينەسىن ۇلتتىق ۆاليۋتادا بەدەرلەۋ الەمدىك تاجىريبەدە بۇرىننان بار. حالقىنا سىڭىرگەن ۇشان-تەڭىز ەڭبەگى, مەملەكەتتىك قايراتكەر رەتىندەگى كەلبەتى بولسا, بۇل قايتا قۇپتارلىق ءىس ەمەس پە!؟ قۇدايعا شۇكىر, ءبىزدىڭ ەلباسىمىز – دوسقا دا, دۇشپانعا دا «مەنىڭ پرەزيدەنتىم!» دەپ ماقتانىشپەن كورسەتۋگە لايىق تۇلعا. تاۋەلسىز ەلىمىزگە بۇگىندە سىرتتان ءتۇرلى ماقساتتارمەن اعىلىپ كەلىپ-كەتىپ جاتاتىن ادامدار كوپ. شەتەلدەردەن كەلگەن قوناقتاردىڭ قاي-قايسىسى دا قازاقتىڭ تەڭگەسىن ۇستاپ كورمەي كەتپەيدى. ساياساتپەن دە, حالىقارالىق قاتىناستارمەن دە شارۋاسى جوق بەيتاراپ ادامداردىڭ ءوزى ۇلتتىق ۆاليۋتاداعى تۇلعانى ەرىكسىز كورەدى. ياكي, بۇل ءبىر جاعىنان, قازاق ەلى ءۇشىن ۇلكەن جارناما. سوندىقتان مەن ءوز باسىم ۇلتتىق بانكتىڭ ەلباسى پورترەتىن جاڭا قازاقستاندىق بانكنوتقا بەينەلەۋ تۋرالى شەشىمىن قولدايمىن. نۇرسۇلتان نازارباەۆتىڭ تاۋەلسىز قازاقستاننىڭ نەگىزىن قالاعان مەملەكەتتىك تۇلعا ەكەنىنە ەشكىم تالاسا المايدى. قازاقستاننىڭ شيرەك عاسىر ىشىندە قول جەتكىزگەن جەتىستىكتەرىنىڭ ءبارى دە پرەزيدەنتىمىزدىڭ ەسىمىمەن تىعىز بايلانىستى. الەم حالقى قازاقستان دەسە – نازارباەۆتى, نازارباەۆ دەسە – قازاقستاندى بىلەدى. مەملەكەت تىزگىنىن شيرەك عاسىردان ارتىق مىعىم ۇستاپ, تۋعان حالقىن دامۋدىڭ داڭعىل جولىمەن جەتەلەپ كەلە جاتقان مەملەكەت باسشىسى بۇدان دا زور قۇرمەتتەرگە لايىق دەپ بىلەمىن! قۋانىش وماشەۆ, ەلباسىنىڭ سەرىكتەسى, ارداگەر مەتاللۋرگ, «پاراسات» جانە «قۇرمەت» وردەندەرىنىڭ يەگەرى, شەت اۋدانى مەن تەمىرتاۋ قالاسىنىڭ قۇرمەتتى ازاماتى قاراعاندى وبلىسى, تەمىرتاۋ قالاسى