اقپاراتتىق ساياساتتى جەتىلدىرۋگە ارنالدى

«نۇر وتان» پارتياسى ورتالىق اپپاراتىنىڭ عيماراتىندا اقپارات جانە كوممۋنيكاتسيالار مينيسترلىگىنىڭ جانە «نۇر وتان» پارتياسى ساياسي مەنەدجمەنت مەكتەبىنىڭ ۇيىتقى بولۋىمەن «باق-تاردى دامىتۋدىڭ قازىرگى زامانعى ادىستەرى» دەگەن تاقىرىپتاعى سەمينارلار سەرياسى جۇمىسىن اياقتادى. وعان پارلامەنت دەپۋتاتتارى, وتاندىق جانە شەتەلدىك جۋرناليستەر, سونداي-اق, مەملەكەتتىك ورگانداردىڭ وكىلدەرى قاتىستى. ونعا جۋىق تاقىرىپتان تۇراتىن سەمينارلار اتالعان ءىس-شارانىڭ ءمانى مەن ماقساتىن, ۇيىم­داستىرۋ جۇمىستارىنا بايلانىستى ماسە­لە­لەر ءتۇ­سىن­دىرىلگەن سەسسيامەن اشىلدى. سەسسيانى اق­پا­رات جانە كوممۋنيكاتسيالار مينيسترلىگى باق سا­لاسىنداعى مەملەكەتتىك ساياسات دەپارتامەنتىنىڭ دي­رەك­تورى ەلدوس ءناشىرالى جۇرگىزدى. ال تاقى­رىپ­تىق سەمينارلارعا قازاقستاندىق جانە رەسەيلىك جۋ­رناليستەر مەن بلوگەرلەر مودەراتورلىق ەتتى, ءتا­جىريبەلەرىمەن ءبولىستى. سەمينارلارعا قاتىسۋشىلار «قازىرگى زامانعى جۋرناليست: امبەباپ ساراپشى», «SMM – يدەيالاردى ىلگەرىلەتۋدىڭ جاڭا ارناسى», «داعدارىستى جاعدايدا ءتيىمدى جۇمىس ىستەۋ, ورتالىق جانە ايماقتىق مەم­لەكەتتىك ورگانداردىڭ ءباسپاسوز قىزمەتى مەن باق وكىل­دەرىنىڭ ءوزارا ءىس-قيمىلى», «باق – قوعامداعى قۇقىق بۇزۋشىلىقتارعا «نولدىك توزىمدىلىك» پەن حالىقتىڭ سىبايلاس جەمقورلىققا قارسى سانا-سەزىمىن قالىپتاستىرۋ قۇرالى», «ءباسپاسوز حات­شى­لارىنىڭ باق-پەن ءوزارا ءىس-قي­مىلى: اقپارات بەرۋ, جۋرناليستەرمەن جۇمىس ءىس­تەۋ داعدىلارى», «شەشەندىك ونەر جانە سايلاۋ پسيحولوگياسى» دەگەن تاقىرىپتار بويىنشا پىكىر الماستى, ۇسىنىس-پىكىرلەرىن ورتاعا سالدى. سەمينار سوڭىنان قاتىسۋشىلارعا سەرتيفيكاتتار تاپسىرىلدى. ءاليسۇلتان قۇلانباي, «ەگەمەن قازاقستان»