اكادەميانىڭ اسقارالى اسۋى

جاقىندا الماتىداعى «عىلىم ورداسىنىڭ» «عىلىم ساردارلارى» كلۋبىندا ۇلتتىق عىلىم اكادەمياسىنىڭ 70 جىلدىق مەرەيتويىنا جانە كورنەكتى عالىم, ۇلتتىق عىلىم اكادەمياسىنىڭ پرەزيدەنتى, اكادەميك, قازاقستان رەسپۋبليكاسى حالىقارالىق جوعارى مەكتەپ اكادەمياسىنىڭ, حالىقارالىق ينجەنەرلىك اكادەمياسىنىڭ جانە نيۋ-يورك اكادەمياسىنىڭ اكادەميگى, حيميا عىلىمدارىنىڭ دوكتورى, پروفەسسور مۇرات جۇرىنوۆتىڭ عىلىمي شىعارماشىلىعىنا ارنالعان كەزەكتى سالتاناتتى وتىرىس ءوتتى. مەرەكەلىك ءىس-شاراعا ەلىمىزدىڭ جەتەكشى عالىم­دا­رى مەن ۇعا اكادەميكتەرى, عىلىمي-زەرتتەۋ ين­ستيتۋتتارىنىڭ جەتەكشىلەرى, جوو رەكتورلارى مەن پروفەسسورلارى, جاس عالىمدار قاتىستى. سالتاناتتى شارا اياسىندا «عىلىم ورداسىنىڭ» ۇيىم­داستىرۋىمەن ۇلتتىق عىلىم اكادەمياسىنىڭ 70 جىلدىق مەرەيتويىنا ارنالعان فوتو-كورمە سال­تانات­تى تۇردە اشىلدى. «عىلىم ورداسى» مەم­لە­كەت­تىك كاسىپورنىنىڭ باس ديرەكتورى باۋىرجان تولتاەۆ پەن اكادەميك مۇرات جۇرىنوۆ كورمە لەنتاسىن قيدى. كورمەدە وتاندىق عىلىمنىڭ دامۋ كەزەڭدەرى بويىنشا فوتولار ۇسىنىلدى: اكادەميانىڭ قۇرىلۋ كەزەڭىنەن ۇزىندىلەر, ونىڭ العاشقى مۇشەلەرى,  ۇلتتىق عىلىم اكادەمياسىنىڭ ءبىرىنشى پرەزيدەنتى, عىلىمي-زەرتتەۋ ينستيتۋتتارىنىڭ العاشقى باسشىلا­رى, ۇلتتىق عىلىم اكادەمياسىنىڭ اكادەميكتەرى دەگەن تاقىرىپتاردا فوتولار قويىلعان. سونىمەن قا­تار, ۇلتتىق عىلىم اكادەمياسىنىڭ 70 جىل­دىق مەرەيتويىنا ارنالعان كىتاپ كورمەسى ۇيىمداستىرىلدى. كورمە قازاق عىلىمىنىڭ 70 جىلدا قول جەتكەن جەتىستىكتەرىن دارىپتەدى. ەلدىڭ رۋحىن اسقاقتاتار ۇيىمنىڭ بۇل مەرەيتويى عىلىم سالاسىنداعى تالاي جەتىستىگىمىزدى ايقارا اشىپ كورسەتەتىن ايتۋلى كۇن ەكەنى راس. سالتانات سوڭى ءان مەن كۇيگە ۇلاستى. كۇمبىرلەگەن كۇي مەن مىڭ بۇرالعان بي سونى اڭعارتسا كەرەك. ساپارباي پارمانقۇلوۆ, «ەگەمەن قازاقستان» الماتى