سارى اياز ساقىلداپ تۇر

ەگەر ايازدى كۇندەرى جولدا قالىپ قويساڭىزدار, كولىكتەرىڭىز بۇزىلسا, ءوز بەتتەرىڭىزبەن قيمىلداپ, تىعىرىقتان شىعامىن دەپ تىرىسپاڭىزدار, ويتكەنى, ومىرىڭىزگە قاۋىپ ءتونىپ تۇر, دەپ مالىمدەمە جاسادى سەمەيدەگى توتەنشە جاعدايلار باسقارماسى. ونداي جاعدايلاردا ۋاقىت وزدىرماي 112 نەمەسە 101 تەلەفونىنا حابارلاسقان ءجون. وبلىستىق توتەنشە جاعدايلار دەپارتامەنتىنەن حابارلاعانداي, مال قارايمىن دەپ 14 قاراشا كۇنى ۇيىنەن شىعىپ كەتكەن شوپان اداسىپ كەتىپتى. اداسقانىن سەزسە كەرەك, ءبىر رەت قوڭىراۋ شالىپ ۇلگەرىپتى. سول كۇنى قۇتقارۋشىلار دا ىزدەۋگە شىققانىمەن, كۇن رايى بۇزىلىپ, الاي-دۇلەي بوران سوققان ەدى. 12 ساعاتتان كەيىن قىزەمشەك اۋىلىنان 15 شاقىرىم جەردە 50 جاستاعى تۇرعىن تابىلدى. ونىڭ قاسىندا ءىرى قارا مال دا بولعان. شوپاننىڭ ۇسىگەنى ءوز الدىنا, ءبىر تاۋلىككە جۋىق اش جاتىپتى. تج وكىلدەرى وعان ىستىق شاي بەرىپ, ەسىن جيعىزىپ, ۇيىنە جەتكىزدى. قازىر وبلىستا اۋا تەمپەراتۋراسى 30 گرادۋسقا دەيىن تومەندەگەن. سونداي-اق, سەمەي مەن پاۆلودار وبلىسى اراسىنداعى جولاۋشىعا لىق تولى اۆتوبۋس اقتۇتەك بوراندا قاڭتارىلىپ قالعان. قۇتقارۋشىلار ءبىر كۇن ىشىندە ومبىعا باعىت العان پاۆلودار ماڭىنداعى ءۇش بىردەي اۆتوبۋستىڭ امالسىز ايالداعانىن ايتادى. بۇگىندە سارى شۇناق اياز تۇرىپ, مەكتەپتەر مەن كوللەدجدەردە ساباق توقتاعان. ال سۇيەكتەن وتەتىن سۋىققا ادام تۇگىلى تەمىر كولىك تە شىداي الماۋدا. قازىر مەكتەپ وقۋشىلارى مەن كوللەدجدەردىڭ 1-2-كۋرستارى مەرزىمسىز دەمالىسقا شىققان. تج ماماندارى كۇن سايىن جولدا قالعانداردى شىعارىپ الۋمەن اينالىسۋدا. ءتىپتى, اياز كولىك تالعامايتىن بولدى, جەڭىل كولىك, شەتەلدىك ءساندى كولىك, جۇك ماشينالارى دەيسىز بە, بىرىنەن كەيىن ءبىرى قيراپ جاتىر. ماسەلەن, 16 قاراشا كۇنى 112 تەلەفونىنا, ساعات 11.00 كەزىندە اقپارات ءتۇستى. وندا سەمەي تۇرعىنى ەكى بالا­سىن الىپ, «مىرزاعۇل» قىستاعىنان شىققان ەكەن. قاسىندا ايەلى بار. 12 شاقىرىم ءجۇرىپ وتكەن كەزدە دالادا قالىپ قويادى, ياعني سەمەي-وسكەمەن جولىنىڭ بويىن­دا كولىگى ايازعا شىداس بەرمەي بۇزىلعان. بۇل تۇسقا «پچ-7» دەپ اتالاتىن, باسشىسى ا. تىلەۋباەۆپەن ءبىر­گە قۇتقارۋشىلار جاساعى شىقتى. «ارم-137» اۆتو­كولىگىمەن بارىپ, ءتورت ادامدى قۇتقارىپ اكەلدى. مىنە, وسىنداي جاعدايلار كوپتەپ ورىن الۋدا. تج باسقارماسى ايازدى كۇندەرى دالاعا شىقپاڭىزدار, ءوز­دەرىڭىزدىڭ جانە تۋىستارىڭىزدىڭ ءومىرىن, دەنساۋلىعىن ويلاعان ءجون دەپ ەسكەرتىپ جاتىر. راۋشان نۇعمانبەكوۆا   سەمەي