اگەنتتىكتىڭ مەملەكەتتىك قىزمەت سالاسىنداعى باقىلاۋ دەپارتامەنتىنىڭ ديرەكتورى قۋانىش جاپاقوۆ قىزمەتشىلەردىڭ ارىپتەستەرىمەن, قول استىنداعىلارمەن, باسشىلارىمەن جۇمىس ۋاقىتىنداعى قاتىناستارى, سونداي-اق جۇمىستان تىس كەزدەگى جانە كوپشىلىك الدىنداعى مىنەز-ق ۇلىق ستاندارتتارى بەلگىلەنگەندىگىن ەرەكشە اتادى. ايتسە دە قىزمەتتىك ادەپتى بۇزعان مەملەكەتتىك قىزمەتشىلەر دە جەتەرلىك. ادەپ جونىندەگى كەڭەستىڭ ۇسىنىسىمەن ماڭعىستاۋ اۋداندىق اكىمدىك اپپاراتىنىڭ باسشىسى جاناتوۆ ماس كۇيىندە اۆتوكولىك جۇرگىزگەنى ءۇشىن قىزمەتىنەن بوساتىلعان. سول سياقتى اقمولا وبلىسىنىڭ ادەپ جونىندەگى كوميسسياسىنىڭ ۇسىنىسىمەن جارقايىڭ اۋدانى اترازين اۋىلدىق وكرۋگىنىڭ اكىمى مۇقانوۆ تا جۇمىستان شەتتەتىلىپتى. قول استىنداعى قىزمەتكەرلەرىنە الىمجەتتىك تاڭىتقانى ءۇشىن جامبىل وبلىسى بويىنشا ادەپ كوميسسياسىنىڭ ۇسىنىسىمەن تاراز قالاسى اكىمىنىڭ ورىنباسارى اقاەۆقا قاتاڭ سوگىس بەرىلگەن.
وسىنداي ورەسكەلدىككە بارعان جانە قىزمەت كولىگىن جەكە باسىنا پايدالانعان قوستاناي وبلىسى, ۇزىنكول اۋدانى اكىمدىگى اپپاراتىنىڭ باسشىسى مىرجاقىپوۆقا سوگىس جاريالاۋ جولىمەن تارتىپتىك جاۋاپكەرشىلىك بەلگىلەنىپتى. جانە دە قوعام تاراپىنان ايتىلعان سىنعا جاۋاپ بەرمەگەنى, ناقتى ايتقاندا, سىبايلاس جەمقورلىق ارەكەتكە باردى دەگەن ايىپتى ءبىر اي ىشىندە تەرىسكە شىعارماعانى ءۇشىن قاراعاندى وبلىسى, وساكاروۆ اۋدانى تەلمان اۋىلدىق وكرۋگىنىڭ اكىمى باليەۆانىڭ قىزمەتى تومەندەتىلگەن. جالپى, ۇستىمىزدەگى جىلدىڭ 9 ايىندا 3 535 مەملەكەتتىك قىزمەتشى جانە ولاردىڭ 10 پايىزى ادەپ قاعيدالارىن بۇزعانى ءۇشىن تارتىپتىك كوميسسيا ۇسىنىسىمەن جاۋاپقا تارتىلعان.
تارقاتىپ ايتقاندا, 8 مەملەكەتتىك قىزمەتشىنىڭ لاۋازىمدىق قىزمەتى تومەندەتىلگەن, 17-ءسى قىزمەتىنەن بوساتىلعان. ادەپ جونىندەگى ۋاكىلدەر بارلىق ورتالىق مەملەكەتتىك جانە جەرگىلىكتى اتقارۋشى ورگانداردا ەنگىزىلگەندىگىن ايتا كەتكەن ورىندى. ولاردىڭ نەگىزگى مىندەتتەرىنىڭ ءبىرى – مەملەكەتتىك قىزمەتشىلەردىڭ ادەپ كودەكسىن ساقتاۋىن قاداعالاۋ. ەگەر مەملەكەتتىك قىزمەتشى كودەكس تالاپتارىن بۇزسا, وندا ادەپ جونىندەگى كەڭەس الگى شەنەۋنىكتىڭ تارتىپتىك ءىسىن قاراپ, جاۋاپكەرشىلىككە تارتۋعا ۇسىنىس بەرە الادى. جىل باسىنان بەرى ادەپ جونىندەگى كەڭەس 753 ماسەلەنى قاراعان. ەنگىزىلگەن 207 ۇسىنىستىڭ 95 پايىزى ورىندالعان. ۇسىنىمدارعا سايكەس, 344 مەملەكەتتىك قىزمەتشى تارتىپتىك جاۋاپكەرشىلىككە تارتىلسا, سونىڭ ىشىندە 54 پايىزى قىزمەتتىك ادەپ تالاپتارىن بۇزعان.
اسقار تۇراپباي ۇلى, «ەگەمەن قازاقستان»
