التى ساعات بويىنا ءان اۋەلەدى

الماتىدا «جىل تاڭداۋى» – ۇزدىك اندەر بايگەسى مارەگە جەتتى كەشە «الماتى-ارەنا» مۇز ايدىنىندا قورىتىندىلانعان «قازاقستان» تەلەراديوكورپوراتسياسىنىڭ وسىناۋ جوباسى كوز الدىمىزدا جۇرگەن ونەر مايتالماندارىنىڭ ەگەمەندىك جىلدارى بەدەرىندەگى ەسەبى بولدى دەسەك تە بولادى. اياقتالىپ بارا جاتقان جىلدىڭ ەڭ ۇزدىك اندەرىن انىقتاۋدى ماق­سات تۇتقان بيىلعى جوبانىڭ ايىر­ماشىلىعى – ول تاۋەلسىزدىكتىڭ 25 جىلدىعىمەن تۇسپا-تۇس كەلىپ وتىر. سوندىقتان مەرەيلى شاراعا ۇلكەن ءمان بەرىلىپ, ارنايى ساراپتاۋ كوميسسياسى قۇرىلىپ, ياعني 50-گە تارتا ادامنان تۇراتىن قازىلار القاسى 160 ءانشىنىڭ ىشىنەن توپ جارعان تالانتتاردى تاڭدادى. التى ساعاتقا سوزىلعان تەلەۆي­زيالىق ءتۇسىرىلىم بارىسىندا 65 ءانشى ساحناعا شىقتى. ولاردىڭ قاتارىندا شەتەلدىك قوناقتار – بۋراي مەن قىتايدى باعىندىرعان قازاق ءانشىسى اراي دا بولدى. روزا رىمباەۆا, ماقپال ءجۇنى­سوۆا, ءمادينا سادۋاقاساوۆا, گۇل­نۇر ورازىمبەتوۆا سىندى ساحنا ساڭ­لاقتارى تىڭدارماندارىن ەرەك­شە نومىرلەرمەن تولقىتتى. مىسالى, روزانىڭ اسپاندا قالىق­تاتىپ ءان ايتۋى, ايقىننىڭ بيىك­تىكتە سالتو جاساۋى, سول سياق­تى بۋرايدىڭ تورەعالي ءتورالى رە­پەرتۋارىنداعى «ءبىر ءتۇرلى قىز» بەن قايرات نۇرتاستىڭ «باي­قا» ءانىن تۇرىك تىلىندە ناشىنە كەل­تىرىپ شىرقاۋى شىنىندا دا كورەرمەندەرگە قۋانىش سىيلادى. ەڭ قىزىعى, باستارى داۋعا قالىپ جۇرگەن «Ninety One» تو­بى تەلەۆيزيالىق شوۋ رەجيس­سەرلەرىنىڭ تالابىن ورىنداپ, كوس­تيۋم-شالبار, اق جەيدەمەن ساحناعا شىقتى. ابدەن سىنعا ۇشىراعان توپ ءبىرىنشى رەت بەتتەرىندەگى بوياۋ­ىن ءوشىرىپ, سىرعالارىن شەشىپ ونەر كورسەتتى. وسىلايشا جاستارىمىز قازاق ەستراداسىنىڭ ساحناسىن, الدىڭعى ونەر بۋىنىن سىيلايتىندارىن ءبىلدىردى. جوبا جۇلدەلەردى ورىندارعا بولگەن جوق. حالىقتىڭ كوز الدىندا جۇرگەن 30 بىردەي تانىمال ونەر يەسى تاۋەلسىزدىكتىڭ 25 جىلدىعىنا وراي جۇلدەگەر اتاندى. ال سارا تىنىشتىعۇلوۆا, ەسكەندىر حاسان­عاليەۆ, رامازان ستامعازيەۆ, روزا رىمباەۆا, ماقپال ءجۇنىسوۆا سىن­دى ساحنا ساڭلاقتارى ونەرگە ءسىڭىر­گەن ەڭبەگى ءۇشىن بولەك ماراپاتتالدى. كۆن سپارتا كومانداسى ارنايى جۇلدەگە يە بولدى. ەرەكشە ورىنداۋشىلىعىمەن كوزگە تۇسكەن جاس انشىلەرگە «جىل تاڭداۋى» التىن كۋبوگى تابىستالدى. شەتەلدەن كەلگەن قوناقتار – تۇرىك ءانشىسى بۋراي مەن اراي دا اتاۋسىز قالمادى. ايتقانداي, بۋ­رايدىڭ «Istersen» ءانى حيتكە اينالىپ, دۇنيەجۇزى چاتتارىنا ەنگەنىن انسۇيەر قاۋىم بىلسە كەرەك؟! ەسىمى مۋزىكا الەمىندە 2004 جىلى ەستىل­گەنىمەن, ول ءاندى كەيىن ايتا باس­تاعان. العاشىندا تۇرىك پوپ-مۋ­زىكانتتاردىڭ اندەرىنە ارانجيروۆكا جاساۋمەن اينالىسقان بۋراي بۇگىندە ەرەكشە داۋىسىمەن, سۇلۋ انىمەن ميلليونداعان ولەڭسۇيەر قاۋىمنىڭ جۇرەگىن جاۋلادى. سونداي-اق, ونلاين-داۋىس بەرۋ ارقىلى دا تانىمال ۇزدىك اندەردىڭ «جەڭىمپاز كۋبوگى» يەلەرىن تاپتى. ال داۋىس جيناۋ 2 قاراشادان باستالعان. كەش بارىسىندا 2016 جىلدىڭ تەك ۇزدىك اندەرى شىرقالسىن دەگەن ماقسات بولعان ەدى. ساحنا ءتو­رىندە سالتانات قۇرعان 65 ءانشى بۇل تالاپتىڭ ۇدەسىنەن شىقتى. «قازاقستان» تەلەراديوكورپوراتسياسى «جىل تاڭداۋى» اتاۋىمەن تالاي مۋزىكالىق شارالار وتكىزىپ جۇرسە دە, بۇل جولعىسى وزگەشە بولعانىن اتاپ ءوتۋ كەرەك. ەڭ باس­تىسى, بۇل سوڭعى شوۋ وتاندىق مامانداردىڭ ءوز كۇشىمەن وتكىزىلدى. تەحنيكالىق جاعىنان دا ەرەكشە جوبا بولدى. كەشتى ەكى بىردەي 2 پتس, 27 كامەرا ءتۇسىرىپ جاتتى. انشىلەردى ايتپاعاندا, شىعار­ماشىلىق توپ تا, تەحنيكالىق قىز­مەتكەرلەر دە قازاقستاندىقتار بولدى. ياعني بۇل جوبانى ەندى تو­لىققاندى ۇلتتىق مۋزىكالىق شوۋ دەپ ايتۋعا قاقىمىز بار. جىلدىڭ ەڭ جارقىن جوباسىندا ونەرپازداردىڭ بارلىعى اندەرىن تەك جاندى داۋىستا ورىندادى. ەل تاريحىنداعى تۇڭعىش ۇلتتىق مۋزىكالىق بايگەگە كوڭىلدى تاپقىرلار كلۋبىنىڭ كوماندالارى دا قاتىستى. وسىلايشا, جۋىردا عانا پاي­دالانۋعا بەرىلگەن «الماتى-ارە­نا» مۇز ايدىنى 10 مىڭنان اسا تىڭدارماندى ايا­سىنا سىيدىرىپ, اۋەلەگەن انگە بولەدى. ايناش ەسالي, «ەگەمەن قازاقستان» الماتى