1430 شاقىرىم جانە 9 كۇن

وفيتسەر شىمكەنت – استانا ارالىعىن ۆەلوسيپەدپەن ءجۇرىپ ءوتتى وڭتۇستىك قازاقستان وبلىسى بويىنشا مەملەكەتتىك كىرىستەر دەپارتامەنتىنىڭ ەكونوميكالىق تەرگەۋ قىزمەتىنىڭ وفيتسەرى ءسابيت مۇستافاەۆ تاۋەلسىزدىگىمىزدىڭ 25 جىلدىعى قۇرمەتىنە شىمكەنتتەن استاناعا ۆەلوسيپەدىمەن باردى. ول بۇل ساپارىن سولتۇستىك وڭىرلەردى اياز قىسپاي تۇرعاندا جاساپ ۇلگەردى. ال باردى دەپ ايتار اۋىزعا عانا وڭاي, تاسپاداي كەرىلگەن تاس جولدا ەرسىلى-قارسىلى قيدالاسقان ماشينالار, جاڭبىر مەن جەل, توبەنى تەسكەن اششى كۇن, قاراڭعى ءتۇن, اڭقانى كەپتىرگەن اڭىزاق, بارىنەن وتۋگە تۋرا كەلگەن. ول 1430 شاقىرىمدى 9 كۇندە ءجۇرىپ ءوتتى. – ارينە, جولدا قيىندىقتار بولماي قالعان جوق, – دەيدى وفيتسەر. – قاپ-قاراڭعى تۇندە ۆەلوسيپەدپەن كەلە جاتقاندا ءتۇرلى قورقىنىشتار بولدى. سول كەزدە «ءسابيت, ءوز ەلىڭ, ءوز جەرىڭدە ءجۇرىپ كەلە جاتىرسىڭ, نەمەنەدەن تارتىناسىڭ», دەپ كوڭىلىمدى باستىم. وتانىما دەگەن سەزىمىم قاناتتاندىردى. اتا-بابا ارمانداعان تاۋەلسىزدىككە اركىم ارقالاي ۇلەس قوسادى. مەن مەملەكەتىمە دەگەن قۇرمەتىمدى وسىلاي كورسەتتىم. ءسابيت مۇستافاەۆ ەرشىكتەن ءتۇس­پەيتىن كانىگى ۆەلوشاباندوز ەمەس. كەزەكتى ەڭبەك دەمالىسىن پايدالانىپ, وسى ىسكە تاۋەكەل ەتكەن. ءتاۋ­ەلسىزدىككە قۇرمەتتىڭ ۇلكەن-كىشى­سى بولمايدى. وفيتسەردىڭ ۇلگىسى وسى. باقتيار تايجان, «ەگەمەن قازاقستان» وڭتۇستىك قازاقستان وبلىسى