دامير رىسپاەۆ: "بارىسقا" قايتا ورالام

استانانىڭ «بارىس» حوككەي كلۋبىنىڭ بۇرىنعى قورعاۋشىسى دامير رىسباەۆپەن ويدا جوقتا كەزدەسىپ قالدىق. قازاقستاننىڭ جاستار قۇراما كومانداسىنىڭ ويىنشىسىن ەسىل وزەنىنىڭ سول جاعالاۋىندا ورىن تەپكەن ەڭسەلى عيماراتتاردىڭ بىرىندە اڭگىمەگە تارتتىق. – دامير, ءوزىڭدى سىرتتاي جاقسى بىلەمىز. حوككەي ماتچ­تارىندا سۇستى كورىنگەنمەن, جىلى ءجۇزدى, سىپايى, قازاقتىڭ كادىمگى سارى بالاسى ەكەنسىڭ. – راحمەت, اعاسى. – ءوزىڭدى جاقسى بىلەمىن دەپ جات­­قانىم, ويىندارىڭنان عا­نا ەمەس, مۇز ايدىنىنداعى ءتو­بە­لەس­تەرىڭدى دە ايتىپ وتىرمىن. – ونى مەن دە سەزىپ وتىرمىن.  – قازىر قايداسىڭ؟ – استانادا «بارىستىڭ» «نو­ماد» دەگەن فارم-كلۋبى بار. سوند­ا ويناپ ءجۇرمىن. – وندا بارعانىڭا قانشا بولدى؟ – ءبىراز ۋاقىت بولدى. «بارىس­تان» كەتكەن سوڭ سوندا باردىم. قازىر ءبارى جاقسى. ەل قاتارلى ويناپ ءجۇرمىن. – «ەل قاتارلى» دەگەندى قا­لاي تۇسىنەمىز؟ – «بارىستىڭ» ساپىندا سوڭعى 3 جىلدا شايبا سالعان ەمەسپىن. ال «نومادتا» 19 ماتچ ويناپ, بىرنەشە شايبا سوق­­تىم. – «بارىس» تۋرالى تاعى سۇ­­رايىن. سول كوماندادا ءجۇر­گە­نىڭدە توبەلەس ساعان نە ءۇشىن كەرەك بولدى؟ – نە ءۇشىن دەگەندە, ەگەر قارسى­لاستارىمىز دورەكى ويناپ جاتسا, وعان شىنىن ايتايىن, شىدامىم جەتپەيدى. كەيدە ءبىزدىڭ ويىنشىلار جاراقات الىپ قالادى. سول كەزدە ءبىر ورىندا تۇرا المايسىڭ. – ارقام بار دەيسىڭ عوي. ون­داي بولادى. قۇرلىقتىق حوككەي ليگاسىندا «بارىس» پەن «كۋنلۋن رەد ستار» كومان­دا­لارىنىڭ ويىنىندا جالعىز ءوزىڭ ءبىراز جىگىتتىڭ «سازايىن بەر­گەنىڭدى» كوردىك. ول نەدەن باس­تالدى؟ – قىتايلىقتار ءبىزدىڭ ويىنشىلاردى جاراقاتتادى, دورەكى وينادى. سوعان شىداي المادىم. – الگى اتويلاپ ۇرىس سال­عا­نىڭدى Youtube-تا ميل­ليون­داعان ادام كورەدى ەكەن. ايدىن­عا سول ءۇشىن دە شىعاسىڭ با؟ شى­­­نىڭدى ايتشى. – قازاقستاننىڭ جاستار قۇرا­ماسى ساپىندا شەت ەلگە شىقسام, مەنى جاتتىقتىرۋشىلار ويىنعا كوپ جىبەرمەيدى. ارينە, مەن ول ءۇشىن ەشكىمگە رەنجىمەيمىن. ولار كوماندانىڭ جاعدايىن ويلايدى. بىراق مەن جاتتىقتىرۋشىلاردىڭ تاپسىرمالارىن ورىنداپ جۇرەمىن. ەش جەردە قاتەلەسكىم كەلمەيدى. الايدا, ءبىزدىڭ جىگىتتەردى بىرەۋلەر ارانداتىپ جاتسا, ولارعا قارسى دورەكى ويناسا, قارسىلاستى ورنىنا قويۋعا تۋرا كەلەدى. – حوككەيدە جاعا ۇستاسقان ءجون ەمەس دەپ ەشكىم ايتپايدى. ونى ناعىز ەرلەردىڭ ويى­نى دەي­دى. مىسالى, ۇلتتىق حوك­­كەي ليگاسىندا ويىنشىلار قىرقى­سىپ جاتادى. بىراق ولار­عا قاتاڭ جازا قولدانىلا بەر­مەيدى. ال قۇر­لىقتىق حوككەي ليگاسىندا جاعداي باسقاشا سياق­تى... – ءيا, دۇرىس ايتاسىز. حوككەي – ەرلەردىڭ ويىنى. بىراق قازىر ول نازىك ويىنعا اينالىپ بارادى. سول جاعى وكىنىشتى. مەنىڭ «بارىستان» كەتۋىمە «كۋنلۋن رەد ستار» كومانداسىمەن كەزدە­سۋدەگى توبەلەستىڭ كەسىرى ءتيدى. قحل-دىڭ تارتىپتىك كوميسسياسى «رىسباەۆ ليگادان الاستاتىلسىن» دەگەن شەشىم شىعارىپتى. – ەندى «بارىسقا» قايتىپ كەلۋ ويدا بار ما؟ – ارينە, بار. قۇداي قالاسا, «بارىسقا» قايتا ورالۋعا ءتيىسپىن. اڭگىمەلەسكەن داستان كەنجالين, «ەگەمەن قازاقستان» استانا